ខេត្តពោធិ៍សាត់ ៖ យុវជន២នាក់ជិះម៉ូតូឌុបគ្នាចេញពីផ្លូវលំក្នុងភូមិ ឡើងទៅផ្លូវជាតិលេខ៥ បានជ្រុលចង្កូតទៅបុករថយន្តធុនធំមួយគ្រឿង ដែលកំពុងធ្វើដំណើរ បណ្ដាលឱ្យស្លាប់ម្នាក់ និងរបួសធ្ងន់ម្នាក់ កាលពីវេលាម៉ោង១២ និង១២នាទីថ្ងៃទី១៦ តុលា ២០១៥ ស្ថិតត្រង់ចំណុចភូមិត្រពាំងកន្ទួត ឃុំបឹងកន្ទួត ស្រុកក្រគរ ខេត្តពោធិ៍សាត់ ។
ប្រភពបានឱ្យដឹងថា ជនរងគ្រោះដែលស្លាប់ឈ្មោះសំ សុផុន អាយុ១៨ឆ្នាំ (ជាអ្នកបើកម៉ូតូ) និងម្នាក់ទៀត ជាអ្នករួមដំណើររងរបួសធ្ងន់ឈ្មោះម៉ៃ ភូថង អាយុ១៥ឆ្នាំ ទាំង២នាក់រស់នៅភូមិតាកែវក្រោម ឃុំបឹងកន្ទួត ស្រុកក្រគរ ជិះម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខពោធិ៍សាត់1D-9366 ។ ចំណែករថយន្តម៉ាក FUSO ពាក់ស្លាកលេខភ្នំពេញ3D-1050 អ្នកបើកបរមិនស្គាល់ឈ្មោះគេចខ្លួនបាត់ ។
ទាក់ទិននឹងករណីនេះ លោកអធិការនគរបាលស្រុកក្រគរឱ្យដឹងថា គេឃើញរថយន្តFUSOខាងលើ ដឹកម៉ាស៊ីនច្រូតស្រូវចំនួន២គ្រឿង កំពុងធ្វើដំណើរលើផ្លូវជាតិលេខ៥ ក្នុងទិសដៅពីលិចទៅកើត ពេលទៅដល់ចំណុចកើតហេតុ ស្រាប់តែមានអ្នកជិះម៉ូតូឌុបគ្នា២នាក់បោះពួយយ៉ាងលឿន ចេញពីផ្លូវលំខាងជើងឡើងមកផ្លូវជាតិលេខ៥ ក៏ជ្រុលចង្កូតទៅបុករថយន្តចំទទឹង បណ្ដាលឲ្យអ្នកបើកម៉ូតូបែកក្បាលហូរឈាមប្រកាច់ស្លាប់ភ្លាមៗនៅនឹងកន្លែងកើតហេតុ ។
ចែករំលែកព័តមាននេះ