ខេត្តត្បូងឃ្មុំ ៖ យ៉ាងហោចណាស់ មនុស្សប្រុស-ស្រី ក្មេង-ចាស់ចំនួន១២នាក់ ត្រូវរងរបួសធ្ងន់-ស្រាល ក្នុងហេតុការណ៍គ្រោះថ្នាក់ចរាចរណ៍មួយរវាងរថយន្តបុកជាមួយរថយន្ត ខណៈធ្វើដំណើរក្នុងទិសដៅបញ្ច្រាសគ្នា ដែលហេតុការណ៍នេះកើតឡើងកាលពីវេលាម៉ោង០៩ព្រឹកថ្ងៃទី១៧ តុលា ២០១៥ នេះ ស្ថិតនៅផ្លូវជាតិលេខ១១ ត្រង់ចំណុចទួលទ្រាជើង ឃុំជប់ ស្រុកត្បូងឃ្មុំ ខេត្តត្បូងឃ្មុំ ។
ប្រភពបានឱ្យដឹងថា ក្នុងចំណោមជនរងគ្រោះទាំង១២នាក់ ត្រូវបានស្គាល់ម្នាក់ឈ្មោះសៀង ពែង អាយុ៣៦ឆ្នាំ ជាអ្នកបើករថយន្តម៉ាកតូពិក មានទីលំនៅភូមិប្រធាតុ ឃុំអំពិលពោក ស្រុកអូររាំងឪ (របួសធ្ងន់) ។ ចំណែកឯមនុស្ស១១នាក់ទៀត មិនបានស្គាល់អត្តសញ្ញាណទេ ព្រោះត្រូវគេបញ្ជូនទៅសង្គ្រោះនៅមន្ទីរពេទ្យភ្លាមៗ ។
បើតាមលោកវរសេនីយ៍ត្រី សូ សារ៉ាត់ នាយការិយាល័យចរាចរណ៍ផ្លូវគោកខេត្តឱ្យដឹងថា រថយន្តបង្កម៉ាករ៉ាយណូ ពាក់ស្លាកលេខភ្នំពេញ 3B-3370 បើកដោយបុរសម្នាក់មិនស្គាល់អត្តសញ្ញាណ (ចុះរត់បាត់) បានបើកបុកជាមួយរថយន្តមួយគ្រឿងទៀត ម៉ាកតូពិក ពាក់ស្លាកលេខព្រៃវែង 2A-0545 ។
ចែករំលែកព័តមាននេះ