ខេត្តរតនគិរី ៖ ជនសង្ស័យជាមេខ្យល់២នាក់ត្រូវបានកម្លាំងនគរបាលខេត្តរតនគិរី សហការជាមួយកម្លាំងនគរបាលឃុំតាអង និងលោកចៅអធិការវត្តអូរឫស្សី ខេត្តក្រចេះ ចាប់ខ្លួន បន្ទាប់ពីកម្លាំងនគរបាលខេត្តក្រចេះឃាត់ខ្លួនបុរសម្នាក់ជាអ្នកបើករថយន្តតាក់ស៊ីម្នាក់កាលពីវេលាម៉ោង៨ព្រឹក ថ្ងៃទី១៦ តុលា ២០១៥ នៅផ្លូវជាតិលេខ៧៨ ក្បែវត្តអូរចេង ឃុំតាអង ស្រុកកូនមុំ ខេត្តរតនគិរី ។
សមត្ថកិច្ចបានឱ្យដឹងថា ជនសង្ស័យ២នាក់ដែលត្រូវបានចាប់ខ្លួនមាន ១-ឈ្មោះ ភឹម ហៅតាឥសី ភេទប្រុស អាយុ៦៣ឆ្នាំ និង២-ឈ្មោះ ជិន គឹម ភេទប្រុស អាយុ៥៤ឆ្នាំ ។ ទាំង២នាក់រស់នៅភូមិល្បាំង១ ឃុំល្បាំង១ ស្រុកលំផាត់ ។
សមត្ថកិច្ចបានឱ្យដឹងទៀតថា ក្រោយពីទទួលពាក្យបណ្តឹងពីប្រជាពលរដ្ឋជាច្រើនគ្រួសារថាបានបាត់កូនៗនោះ កម្លាំងនគរបាលខេត្តរតនគិរីបានបើកប្រតិបត្តិការស្រាវជ្រាវរហូតឈានបានកំណត់មុខសញ្ញា និងធ្វើការឃាត់ខ្លួនជនសង្ស័យជាអ្នករត់ឡានតាក់ស៊ីម្នាក់ និងរថយន្តម៉ាកសាំយ៉ុង១គ្រឿង ព្រមទាំងរំដោះក្មេងបាន៣នាក់ និងក្មេងម្នាក់ដែលធ្វើជាធ្នាក់បានដោយជោគជ័យ ។
ក្រោយពេលឃាត់ខ្លួន អ្នករត់ឡានតាក់ស៊ីបានប្រាប់សមត្ថកិច្ចឱ្យដឹងថា ខ្លួនបើកឡានមកទទួលយកក្មេងទាំង៣នាក់នេះតាមបញ្ជារបស់មេខ្យល់ប៉ុណ្ណោះ ដែលកាលពីម្សិលមិញខ្លួនបានដឹកក្មេងៗ៥នាក់រួមជាមួយមេខ្យល់២នាក់ទៅកាន់ខេត្តក្រចេះទៀតផង ។
នគរបាលប៉ុស្ត៍ឃុំតាអងម្នាក់ដែលចុះប្រតិបត្តិដោយផ្ទាល់បានប្រាប់ឱ្យដឹងថា មេខ្យល់បាននាំក្មេងពីខេត្តរតនគិរី៥នាក់ទៅលាក់ទុកនៅវត្តអូរឫស្សី ស្ថិតក្នុងភូមិស្រែស្តៅ សង្កាត់អូរឫស្សី ក្រុងក្រចេះ ។ ដោយមានការលួងលោមពីសមត្កកិច្ចនគរបាលឃុំតាអង និងទទួលបានការសហការពីលោកចៅអធិការវត្តអូរឫស្សី ជនសង្ស័យជាមេខ្យល់ទាំង២នាក់ត្រូវបានចាប់ខ្លួន ហើយក្មេងទាំង៥នាក់ត្រូវបានដឹកបញ្ជូនមកឃុំតាអងដែលជាស្រុកកំណើតវិញ ព្រមទាំងប្រាប់សមត្ថកិច្ចថា ពួកគេទៅបួសដោយមានមេខ្យល់២នាក់ជួយឧបត្ថម្ភស្បង់ចីវរគ្រប់ៗគ្នា ទើបក្មេងៗទាំងអស់សុខចិត្តទៅតាមគាត់ ។
លោកអនុសេនីឯក រ៉េន មុត អធិការរងទទួលបន្ទុកព្រហ្មទណ្ឌស្រុកកូនមុំបានបញ្ជាក់ថា ក្មេងៗទាំង៨នាក់នោះបានធ្វើកំណត់ហេតុប្រគល់ឱ្យអាណាព្យាបាលវិញហើយ ចំណែកអ្នកបើករថយន្ត និងរថយន្តក៏គ្មានការពាក់ព័ន្ធក្នុងករណីនេះដែរព្រោះជាអ្នករត់តាក់ស៊ី រីឯជនសង្ស័យឈ្មោះ ភឹម និងឈ្មោះ ជិន គឹម សមត្ថកិច្ចកំពុងធ្វើការសាកសួរ និងធ្វើកំណត់ហេតុចាត់វិធានការទៅតាមនិតិវិធីច្បាប់ ៕
ចែករំលែកព័តមាននេះ