រាជធានីភ្នំពេញ ៖ លោក គួច ចំរើន ប្រធានគណៈបញ្ជាការឯកភាពខណ្ឌដូនពេញ លោក សុខ ពេញវុធ អភិបាលរង និងកម្លាំងប្រជាការពារសណ្តាប់ធ្នាប់ខណ្ឌ បានបន្តបង្ក្រាបស្ត្រីរកស៊ីផ្លូវភេទ និងប្រមូលជនអនាថា អ្នកញៀនថ្នាំ ដែលមកស្នាក់នៅតាមសួនច្បារ រមណីយដ្ឋាន និងវត្តអារាម ក្នុងភូមិសាស្ត្រខណ្ឌ ជាលទ្ធផលមនុស្សប្រុសស្រីចំនួន២០នាក់ ត្រូវបានឃាត់ខ្លួន កាលពីវេលាម៉ោង៩ព្រឹកថ្ងៃទី១៦ តុលា ។
លោក គឹម វុត្ថា ប្រធានប្រជាការពារខណ្ឌ បានឲ្យដឹងថា កន្លងមក គណៈបញ្ជាការឯកភាពខណ្ឌដែលមានការចូលរួមពីកម្លាំងនគរបាល កងរាជអាវុធហត្ថ និងកម្លាំងប្រជាការពារបើកយុទ្ធនាការបង្ក្រាបស្ត្រីរកស៊ីផ្លូវភេទ និងប្រមូលជនអនាថា អ្នកញៀនថ្នាំ ដែលស្នាក់នៅតាមសួនច្បារ រមណីយដ្ឋាន និងវត្តរាម ដោយឃាត់ខ្លួនមនុស្សប្រុសស្រីចំនួន១៧១នាក់ (ស្ត្រី១០៣នាក់) ពួកគេត្រូវបានបញ្ជូនទៅមន្ទីរសង្គមកិច្ចរាជធានីភ្នំពេញ ។
ដោយឡែក នៅវេលាម៉ោង៩ព្រឹកថ្ងៃទី១៦ តុលា ២០១៥ នេះ លោក គួច ចំរើន និងលោក សុខ ពេញវុធ បានដឹកនាំកម្លាំងធ្វើការឃាត់មនុស្សសរុបចំនួន២០នាក់ (ស្ត្រី១២នាក់ ដែលរកស៊ីផ្លូវភេទ) ប្រុស៨នាក់ជាជនអនាថា ។
ទាក់ទិនទៅនឹងការបើកយុទ្ធនាការចុះបង្ក្រាបខាងលើ ត្រូវបានប្រជាពលរដ្ឋអបអរសាទរយ៉ាងខ្លាំង ព្រោះកន្លងមក អំពើចោរលួច ឆក់ ប្លន់ បានកើតឡើងជាញឹកញាប់ មិនថាពលរដ្ឋខ្មែរ ឬជនបរទេសនោះទេ ដែលរងគ្រោះនៅក្នុងតំបន់នេះ ៕
ចែករំលែកព័តមាននេះ