រាជធានីភ្នំពេញ ៖ នគរបាលប៉ុស្តិ៍រដ្ឋបាលស្រះចក បានឱ្យដឹងថា មុខសញ្ញាវាយយកម៉ូតូ និងកាបូបលុយរបស់ប្រជាពលរដ្ឋតាមដងផ្លូវសាធារណៈ កាលពីយប់ថ្ងៃទី២ ខែកញ្ញា ឆ្នាំ២០១៥ ស្ថិតក្នុងសង្កាត់ស្រះចក ខណ្ឌដូនពេញ នាពេលកន្លងមកនេះ ត្រូវបានកម្លាំងនគរបាលប៉ុស្តិ៍សហការជាមួយនគរបាលផ្នែកព្រហ្មទណ្ឌខណ្ឌដូនពេញ ស្រាវជ្រាវឃាត់ខ្លួនជាបន្តបន្ទាប់ នៅវេលាម៉ោង៧និង៣០នាទីព្រឹកថ្ងៃទី១៦ តុលា ។
មន្ដ្រីនគរបាលដដែល បានបញ្ជាក់ថា ជនសង្ស័យទាំងពីរនាក់បានធ្វើសកម្មភាពវាយយកម៉ូតូ និងកាបូបលុយ កាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី២ ខែកញ្ញា ឆ្នាំ២០១៥ ស្ថិតនៅត្រង់ចំណុចផ្លូវR6កែងផ្លូវលេខ៧០ ភូមិ១ សង្កាត់ស្រះចក ខណ្ឌដូនពេញ រួចហើយបាននាំគ្នារត់គេចខ្លួនអស់រយៈពេលជិត២សប្តាហ៍ទីបំផុតជនសង្ស័យ២នាក់ ត្រូវបានឃាត់ខ្លួន ព្រមទាំងដកហូតវត្ថុតាងមានស្នាប់ដៃមួយចំនួន ប៉ុន្ដែទ្រព្យសម្បត្ដិ និងសម្ភាររបស់ជនរងគ្រោះ ដែលពួកគេយកទៅនោះមិនឃើញឡើយ ។
ជនសង្ស័យ ដែលសមត្ថកិច្ចឃាត់ខ្លួនទាំង២នាក់ខាងលើនេះ ម្នាក់ឈ្មោះ អៀង ជា ហៅទិត្យ អាយុ៣៧ឆ្នាំ ភេទប្រុស មុខរបរមិនពិតប្រាកដ ស្នាក់នៅផ្ទះជួល តាមផ្លូវរថភ្លើង ភូមិទួលគោក សង្កាត់ទួលសង្កែ ខណ្ឌឫស្សីកែវ និងម្នាក់ទៀត ឈ្មោះ ពិន ភ័ណ ហៅតុល អាយុ៣០ឆ្នាំ ភេទស្រី មុខរបរស្ដ្រីរកស៊ីផ្លូវភេទ ស្នាក់នៅផ្ទះជួល សង្កាត់បឹងកក់ទី១ ខណ្ឌទួលគោក ។
មន្ត្រីនគរបាលមូលដ្ឋានបានរំឭកថា កាលពីវេលាម៉ោង១រំលងអធាត្រឈានចូលថ្ងៃទី២ ខែកញ្ញា ឆ្នាំ២០១៥ ជនរងគ្រោះ ឈ្មោះ តន់ ម៉េងហួរ អាយុ២៦ឆ្នាំ មុខរបរបើករថយន្ដ ស្នាក់នៅផ្ទះលេខ២០E0 ផ្លូវលេខ១៧២ សង្កាត់ជ័យជំនះ ខណ្ឌដូនពេញ ត្រូវបានជនសង្ស័យទាំងពីរនាក់ខាងលើ និងបក្ខពួកបានធ្វើសកម្មភាពវាយប្លន់យកម៉ូតូម៉ាកស្គូពី ពណ៌សលាយខៀវ ពាក់ស្លាកលេខភ្នំពេញ 1WC-8945 ព្រមទាំងយកកាបូបលុយ ដែលមានទឹកប្រាក់២២០ដុល្លារ ព្រមទាំងប័ណ្ណបើកបរផងដែរ ហើយនាំគ្នាគេចខ្លួនបាត់ ។
ជនសង្ស័យទាំងពីរនាក់ ត្រូវបានឃុំខ្លួនជាបណ្ដោះអាសន្ននៅអធិការដ្ឋាននគរបាលខណ្ឌ ដើម្បីកសាងសំណុំរឿងបញ្ជូនទៅសាលាដំបូងរាជធានី ធ្វើការផ្ដន្ទាទោសតាមផ្លូវច្បាប់ ៕
ចែករំលែកព័តមាននេះ