ខេត្តកោះកុង ៖ បើតាមអ្នកឆ្លើយឆ្លងព័ត៌មានកោះសន្តិភាពបានឲ្យដឹងថា ជម្លោះពាក្យសម្តីដែលសង្ស័យផ្តើមចេញពីរឿងស្រី បណ្តាលឲ្យកីឡាករប្រដាល់សេរី សែន រ៉ាដេត ប្អូនប្រុសកីឡាករប្រដាល់ល្បីឈ្មោះ សែន រ៉ាឌី វ៉ៃមួយដៃទៅលើយុវជនម្នាក់ចំថ្គាម ដែលសេចក្តីរាយការណ៍ចុងក្រោយថា បាក់ថ្គាម ។
ហេតុការណ៍នេះបានកើតឡើងនៅយប់ថ្ងៃទី១៣ តុលា ២០១៥ នៅក្នុងក្លឹបកម្សាន្តយីហោ ” រស្មីមករា” ស្ថិតនៅក្នុងភូមិ៣ សង្កាត់ស្មាច់មានជ័យ ក្រុងខេមរភូមិន្ទ ។ ជនរងគ្រោះដែលត្រូវបានក្រុមគ្រួសារបញ្ជូនមកព្យាបាលនៅក្នុងរាជធានីភ្នំពេញឈ្មោះ សារ៉ាយ សាគី អាយុ២៥ឆ្នាំ មុខរបរកម្មករ ស្នាក់នៅក្នុងភូមិ១ សង្កាត់ដងទង់ ក្រុងខេមរភូមិន្ទ ។
សេចក្តីរាយការណ៍បានឲ្យដឹងថា ក្នុងសំណុំរឿងហិង្សាមួយនេះ ខាងភាគីជនរងគ្រោះ ដំបូងឡើយបានទាមទារសំណងចំនួន៣០០ដុល្លារ ហើយជនរងគ្រោះយល់ព្រមតែ១០០ដុល្លារ ប៉ុន្តែក្រោយពេលគ្រូពេទ្យបា្រប់ថា បាក់ថ្គាម ខាងភាគីជនរងគ្រោះបានទាមទារសំណងចំនួន៣០០០ដុល្លារដើម្បីបញ្ចប់រឿង ប៉ុន្តែភាគីខាងកីឡាករ សែន រ៉ាដេត ពុំមានលទ្ឋភាព ។
មកដល់រសៀលថ្ងៃទី១៦ តុលា ២០១៥នេះ ភាគីទំាងពីរត្រូវចូលមកដោះស្រាយគ្នានៅស្នងការដ្ឋាននគរបាលខេត្តបន្តទៀត ប៉ុន្តែពុំទទួលបានលទ្ឋផលដោយសារអវត្តមានខាងកីឡាករ សែន រ៉ាដេត ៕
ចែករំលែកព័តមាននេះ