រាជធានីភ្នំពេញ ៖ ទីបំផុតរយៈពេល២ថ្ងៃ អាជ្ញាធរខណ្ឌពោធិ៍សែនជ័យបានរៀបចំទីតាំងផ្សារតាមវិធានការ៣កុំ និង៣ការពារ សម្រាប់ឲ្យក្រុមអាជីវករលក់ដូរ នៅក្នុងតំបន់ក្រហម ដែលមានការឆ្លងរាលដាលនៃជម្ងឺ COVID-19 ច្រើននោះរួចរាល់ហើយ ។
អាជ្ញាធរខណ្ឌខាងលើបានរៀបចំផ្សារខាងលើចាប់ផ្ដើមការងាររបស់ខ្លួន កាលពីថ្ងៃទី២៦ រហូតដល់ទី២៧ ខែមេសា ទើបហើយរួចរាល់ជាស្ថាពរទៅតាមអ្វីដែលខ្លួនបានគ្រោងទុក ។ ដោយឡែកនៅវេលាព្រឹកថ្ងៃទី២៨ ខែមេសា ឆ្នាំ២០២១ បានអនុញ្ញាតឲ្យក្រុមអាជីវករច្រើនចូលទៅលក់ដូរនៅថ្ងៃដំបូង ។
ខណៈនោះក៏មានប្រជាពលរដ្ឋនាំគ្នាទៅរកទិញបន្លែ ត្រី សាច់ និងគ្រឿងឧបភោគបរិភោគជាបន្តបន្ទាប់ផងដែរ ប៉ុន្តែអ្វីដែលជាការកត់សម្គាល់ គឺទីតាំងផ្សារបណ្ដោះអាសន្ននោះមានលក្ខណៈដូចគ្នាទៅនិងផ្សារក្រមួនដែរ ព្រោះអនុញ្ញាតឲ្យលក់ដូរត្រឹមតែ១កំណាត់ថ្ងៃប៉ុណ្ណោះ គឺចាប់ពីវេលាព្រឹកព្រលឹមរហូតដល់វេលាម៉ោង១១ព្រឹកថ្ងៃក្ដៅខ្លាំង គឺឈប់លក់ហើយ ។
បើតាមប្រភពព័ត៌មានបានឲ្យដឹងថា អាជ្ញាធរខណ្ឌពោធិ៍សែនជ័យបានរៀបចំទីតាំងផ្សារនេះ នៅលើកំណាត់ផ្លូវចោមចៅ ហៅផ្លូវវ៉េងស្រេង នៅចំណុចមុខក្រុមហ៊ុនតម្លើងម៉ូតូហុងដា និងម្ដុំសួនឧស្សាហកម្មកាណាឌីយ៉ា ស្ថិតនៅក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ដែលជាតំបន់ក្រហមសម្រាប់ឲ្យក្រុមអាជីវករលក់ដូរគ្រឿងឧបភោគបរិភោគផ្សេងៗក្នុងពេលកំពុងមានការបិទខ្ទប់ប្រយុទ្ធប្រឆាំងនិងជម្ងឺCOVID-19 ។
ចំណែកឯកន្លែងលក់ដូរខាងលើ ពុំមែនសង់ជាតូបអីនោះទេ គឺអាជ្ញាធរបានគូសគំនូសពណ៌ស ១កន្លែងៗ ទំហំប្រមាណ២ម៉ែត្របួនជ្រុង និងមានគម្លាតពីគ្នាពីមួយទៅមួយប្រវែងប្រមាណ១,៥ម៉ែត្រ អនុលោមទៅតាមវិធានការ៣កុំនិង៣ការពារ ។
ប្រភពដដែលបានបន្តទៀតថា តាមវិធានការ និងលក្ខខណ្ឌដែលដាក់ចេញដោយអាជ្ញាធរខណ្ឌពោធិ៍សែនជ័យ គឺអាជីវករដែលអាចលក់ដូរនៅក្នុងផ្សារនេះបាន គឺមានតែអាជីវករអ្នកដែលរស់នៅក្នុងតំបន់ក្រហមនេះប៉ុណ្ណោះ ។ ចំណែកអ្នកដែលរស់នៅតំបន់ផ្សេងក្រៅពីតំបន់ក្រហមនេះមិនត្រូវបានអនុញ្ញាតចូលទៅលក់ឡើយ ហើយបើនៅតែរឹងរួសនោះ លោក ហែម ដារិទ្ធិ ដែលជាអភិបាលខណ្ឌពោធិ៍សែនជ័យ និងបញ្ជាឲ្យកម្លាំងសណ្ដាប់ធ្នាប់ខណ្ឌបណ្ដេញចេញពីទីនោះភ្លាមៗមិនឲ្យនៅលក់ទេ ។
ប្រភពខាងលើបានបញ្ជាក់ឲ្យដឹងបន្ថែមទៀតថា មិនតែប៉ុណ្ណោះរាល់អាជីវករទាំងអស់អាចមានសិទ្ធិចូលទៅលក់តែ១នាក់ ប៉ុណ្ណោះមិនអាចទៅលក់២នាក់បានឡើយ ហើយត្រូវតែពាក់ម៉ាស់ ពាក់ស្រោមដៃ ការពារឲ្យបានត្រឹមត្រូវ បើមិនអនុវត្តតាមទេមិនអនុញ្ញាតឲ្យលក់ឡើយ ។
ចំណែកអ្នកទិញវិញក៏ដូចគ្នាដែរ មានសិទ្ធិចូលទៅទិញបានត្រឹមតែ១នាក់ប៉ុណ្ណោះ ទោះជាពួកគាត់មានគ្នា២នាក់ក៏ដោយ ពេលទៅដល់ផ្សារត្រូវតែម្នាក់ចូលទៅទិញ និងម្នាក់ទៀតរង់ចាំនៅខាងក្រៅ ក្នុងការមិនព្រមអនុវត្តតាមនោះនិងមិនមិនអនុញ្ញាតឲ្យចូលទៅទិញនោះឡើយ ៕
ចែករំលែកព័តមាននេះ