ខេត្តស្វាយរៀង ៖ យ៉ាងហោចណាស់ក៏មានមនុស្ស៤នាក់រងរបួសស្រាល ក្នុងករណីគ្រោះថ្នាក់ចរាចរណ៍មួយបានកើតឡើងរវាងម៉ូតូបុកជាមួយម៉ូតូពេញទំហឹងបង្កឱ្យមានការភ្ញាក់ផ្អើលកាលពីវេលាម៉ោង៦និង២០នាទីព្រឹកថ្ងៃទី១៦ តុលា ស្ថិតនៅភូមិថ្មស ឃុំស្វាយជ្រំ ស្រុកស្វាយជ្រំ ។
មន្ត្រីសមត្ថកិច្ច បានឱ្យដឹងថា មុនពេលកើតហេតុ គេឃើញម៉ូតូទាំងពីរគ្រឿងបើកបរក្នុងទិសដៅស្របគ្នាពីកើតទៅលិច លុះមកដល់ចំណុចកើតហេតុខាងលើ ម៉ូតូម៉ាកហុងដា ធុនសេ១២៥ ស៊េរី២០១២ មួយគ្រឿង បើកបរដោយឈ្មោះ គឹម លន់ ភេទស្រី អាយុ៦៥ឆ្នាំ (របួសស្រាល) រស់នៅភូមិថ្មស ឃុំស្វាយជ្រំ ស្រុកស្វាយជ្រំ បត់ឆ្វេងដោយមិនមើលឆ្វេងស្តាំ ក៏ត្រូវម៉ូតូម៉ាកវ៉េអាល់ហ្វា ពណ៌ក្រហម គ្មានស្លាកលេខ មួយគ្រឿង បើកបរដោយឈ្មោះ ប៉ាង សារ៉ុន ភេទប្រុស អាយុ៤២ឆ្នាំ រស់នៅភូមិត្រោក ឃុំឈើទាល ស្រុកស្វាយជ្រំ ដោយមានអ្នករួមដំណើរ២នាក់ ម្នាក់ ឈ្មោះ សួន លី ភេទស្រី អាយុ៣៦ឆ្នាំ និងម្នាក់ទៀត ឈ្មោះ ពៅ នី ភេទប្រុស អាយុ៤៩ឆ្នាំ បុកពីក្រោយពេញទំហឹងបណ្តាលឱ្យរងរបួសស្រាលទាំង៤នាក់តែម្តង ។
ក្រោយកើតហេតុ សមត្ថកិច្ចនគរបាលចុះវាស់វែង និងបញ្ជូនអ្នករងរបួសទាំង៤នាក់ខាងលើ ទៅព្យាបាលនៅមន្ទីរពេទ្យបង្អែកខេត្តស្វាយរៀង ។ ចំណែកម៉ូតូទាំងពីរគ្រឿងយកទៅរក្សាទុកនៅអធិការដ្ឋាននគរបាលស្រុក ដើម្បីរង់ចាំការដោះស្រាយជាក្រោយ ៕
ចែករំលែកព័តមាននេះ