រាជធានីភ្នំពេញ ៖ ទោះបីជាកម្ពុជាពេលនេះកំពុងតែរងឥទ្ធិពលពីជំងឺកូវីដ១៩ ហើយបានធ្វើឱ្យសេដ្ឋកិច្ចនិងអាជីវកម្មតាមវិស័យជាច្រើនរងផលប៉ះពាល់ក្ដី តែធនាគារអភិវឌ្ឍន៍អាស៊ី ហៅកាត់ថាADB បានព្យាករពីកំណើនវិជ្ជមាននៃសេដ្ឋកិច្ចកម្ពុជាដោយនឹងកើនឡើង៤ភាគរយនៅឆ្នាំ២០២១នេះ និង៥,៥ភាគរយនៅឆ្នាំក្រោយ ។នេះបើតាមការព្យាកររបស់ធនាគារមួនេះនៅព្រឹកថ្ងៃទី២៨ មេសា ២០២១ ។
យោងតាមរបាយការណ៍ទស្សនវិស័យអភិវឌ្ឍន៍អាស៊ី ឱ្យដឹងថា ឆ្នាំ២០២១ ផលិតកម្មឧស្សាហកម្មត្រូវបានគេរំពឹងថានឹងកើនឡើង៧,១ភាគរយ និង៧ភាគរយក្នុងឆ្នាំ២០២២ ដោយសារតែការងើបឡើងវិញនៃវិស័យកាត់ដេរសម្លៀកបំពាក់ ស្បែកជើង និងទំនិញសម្រាប់ធ្វើដំណើរ ក៏ដូចជាកំណើននៃឧស្សាហកម្មធនស្រាលផ្សេងទៀត ដូចជាផលិតផលអេឡិចត្រូនិកនិងកង់ ។ វិស័យកសិកម្ម ត្រូវបានរំពឹងថានឹងកើនឡើង១,៣ភាគរយ ក្នុងឆ្នាំ២០២១ និង១,២ភាគរយក្នុងឆ្នាំ២០២២ ដោយមានការកើនឡើងនៃផលិតកម្មកសិផល បន្ទាប់ពីរងការខូចខាតដោយទឹកជំនន់កាលពីឆ្នាំមុន ការបន្តមានកំណើននៃវារីវប្បកម្ម និងការហក់ឡើងនៃការនាំចេញផលិតផលកសិកម្ម ទៅកាន់សាធារណប្រជាមានិតចិន ។
វិស័យសេវាកម្មនឹងស្ទុះងើបឡើងវិញក្នុងល្បឿនយឺតៗ ពោលគឺប្រមាណ៣,៣ភាគរយក្នុងឆ្នាំ២០២១ទៅ៦,២ភាគរយក្នុងឆ្នាំ២០២២ ។ កិច្ចប្រឹងប្រែងក្នុងការគ្រប់គ្រងការផ្ទុះឡើងនៃជំងឺកូវីដ១៩ នៅក្នុងស្រុកដែលបានចាប់ផ្ដើមក្នុងខែកុម្ភៈ ២០២១ កំពុងធ្វើឱ្យសកម្មភាពវិស័យសេវាកម្មធ្លាក់ចុះ ។ ការរឹតបន្តឹងការធ្វើដំណើរ ត្រូវបានរំពឹងថានឹងបន្តស្ទើរតែពេញមួយឆ្នាំក្នុងឆ្នាំ២០២១ ដែលមានន័យថាវិស័យមិនត្រូវបានរំពឹងថាអាចជួយជំរុញកំណើនផ្នែកសេវាកម្មនៅឆ្នាំនេះទេ ។ វិស័យអចលនទរ្ព្យត្រូវបានព្យាករថានឹងងើបឡើងវិញ ពីការធ្លាក់ចុះកាលពីឆ្នាំមុន ដោយមាននិន្នាការស្រដៀងគ្នាទៅនឹងឧស្សាហកម្មសំណង់ ។
លោកស្រីSunniya Durrani-Jamal នាយិកាប្រចាំប្រទេសកម្ពុជានៃធនាគារអភិវឌ្ឍន៍អាស៊ី បានឱ្យដឹងថា សេដ្ឋកិច្ចកម្ពុជាបានធ្លាក់ចុះ ៣,១ភាគរយកាលពីឆ្នាំ២០២០ ដោយសារតែការរាតត្បាតជាសកលនៃជំងឺកូវីដ១៩ ។ រាជរដ្ឋាភិបាលបានឆ្លើយតបយ៉ាងឆាប់រហ័ស ចំពោះករណីថ្មីៗដែលបានកើតឡើង ហើយយើងរំពឹងថាសេដ្ឋកិច្ចនឹងវិលត្រលប់មករកកំណើនវិញក្នុងឆ្នាំ២០២១នេះ ។ កំណើននេះនឹងជួយបង្កើនប្រាក់ចំណូលគ្រួសារ ប៉ុន្តែមិនមែនគ្រប់វិស័យនិងតំបន់ទាំងអស់ នឹងទទួលបានប្រយោជន៍នេះស្មើគ្នានោះទេ ដូច្នេះវាចាំបាច់ណាស់ ក្នុងការតាមដានមើលជីវភាពគ្រួសារទាំងឡាយក៏ដូចជាតម្រូវការគាំទ្របន្ថែម ឱ្យបានដិតដល់ ។
លោកស្រីបន្តថា ល្បឿនមិនស្មើគ្នានៃការងើបឡើងវិញនៃវិស័យនានា នឹងបន្តជាសម្ពាធលើគ្រួសារ និងក្រុមហ៊ុន មួយចំនួន នៅឆ្នាំនេះ ដែលនឹងធ្វើឱ្យការងើបឡើងវិញនៃសេដ្ឋកិច្ចជារួម មានការយឺតយ៉ាវ។ ហានិភ័យ ចម្បងៗ សម្រាប់ចក្ខុវិស័យសេដ្ឋកិច្ចនេះ រួមមាន ការរីករាលដាលនៃការផ្ទុះឡើងនៃកូវីដ១៩ នៅតាម សហគមន៍ កំណើនសេដ្ឋកិច្ចយឺតជាងការរំពឹងទុក នៃដៃគូធុរកិច្ចសំខាន់ៗរបស់កម្ពុជា ដូចជាអាមេរិក និងអឺរ៉ុប ការបន្តនៃភាពទន់ខ្សោយនៃតម្រូវការក្នុងស្រុក និងបញ្ហាប្រឈមរបស់សេវាកម្មហិរញ្ញវត្ថុ និង ធនាគារ ៕
ចែករំលែកព័តមាននេះ