រាជធានីភ្នំពេញ ៖ រថយន្តហាយប្រ៊ីតបើកលឿនពេកចាប់ហ្វ្រាំងមិនទាន់ជ្រុលទៅបុករថយន្តកាមរីបាឡែនពេញទំហឹង បណ្តាលឲ្យរថយន្តទាំងពីរគ្រឿងខូចខាតដូចគ្នា តែមិនមានអ្នករងរបួសទេ កាលពីវេលាម៉ោង៩យប់ថ្ងៃទី១៥ តុលា ស្ថិតនៅកែងផ្លូវលេខ២៩៤និងលេខ៥១ ក្នុងសង្កាត់បឹងកេងកង១ ខណ្ឌចំការមន ។
សាក្សីនៅកន្លែងកើតហេតុ បានឱ្យដឹងថា មុនពេលកើតហេតុ គេឃើញយុវជនម្នាក់បើករថយន្តបង្កម៉ាកហាយប្រ៊ីត ពណ៌ទឹកប្រាក់ ពាក់ស្លាកលេខភ្នំពេញ2AB-0209 បើកបរតាមផ្លូវលេខ៥១ ក្នុងទិសដៅពីជើងទៅត្បូង ចំណែករថយន្តកាមរីបាឡែន ពណ៌ទឹកប្រាក់ ពាក់ស្លាកលេខភ្នំពេញ2AC-7784 ជិះគ្នា២នាក់ ជានារីវ័យក្មេង បើកបរ តាមផ្លូវលេខ២៩៤ ពីកើតទៅលិច ខណៈកំពុងបើកឆ្លងផ្លូវ ស្រាប់តែរថយន្តបង្កបើកលឿនពេកចាប់ហ្វ្រាំងមិនទាន់ជ្រុលទៅបុកចំពាក់កណ្តាលរថយន្តបាឡែនធ្វើឲ្យក្រពឹតទ្វារមុខ និងក្រោយចំហៀងខាងស្តាំ ហើយជ្រុលចង្កូតឡើងទៅលើខឿនចិញ្ចើមផ្លូវ ចំណែករថយន្តបង្កស្រុញមួយកំណាត់មុខ ។
ក្រោយពេលកើតហេតុ ភាគីទាំងសងខាងធ្វើការចរចាមិនត្រូវគ្នា ទើបសមត្ថកិច្ចវាស់វែងយកទៅដោះស្រាយនៅការិយាល័យនគរបាលចរាចរណ៍ផ្លូវគោក ៕
ចែករំលែកព័តមាននេះ