ខេត្តត្បូងឃ្មុំ ៖ សមត្ថកិច្ចបានឃាត់ខ្លួនជនសង្ស័យពាក់ព័ន្ធគ្រឿងញៀ.ន៥នាក់នៅក្នុងហាខារ៉ាអូខេយីហោ«នឹកជានិច្ច៩៩៩» ស្ថិតនៅភូមិស្លាបក្តោង ឃុំជប់ ស្រុកត្បូងឃ្មុំ កាលពីវេលាម៉ោង៣រសៀល ថ្ងៃទី១៥ តុលា ២០១៥
ខេត្តត្បូងឃ្មុំ ៖ សមត្ថកិច្ចបានឃាត់ខ្លួនជនសង្ស័យពាក់ព័ន្ធគ្រឿងញៀន៥នាក់នៅក្នុងហាខារ៉ាអូខេយីហោ«នឹកជានិច្ច៩៩៩» ស្ថិតនៅភូមិស្លាបក្តោង ឃុំជប់ ស្រុកត្បូងឃ្មុំ កាលពីវេលាម៉ោង៣រសៀល ថ្ងៃទី១៥ តុលា ២០១៥ ដោយដកហូតបានថ្នាំញៀន៤កញ្ចប់ និងឧបករណ៍ប្រើប្រាស់ និងវេចខ្ចប់ជាច្រើនទៀត ។
ជនសង្ស័យទាំង៥នាក់ដែលត្រូវចាប់ខ្លួនមានឈ្មោះ ១-ឈ្មោះ ឈុំ ចិន ភេទស្រី អាយុ៣១ឆ្នាំ ជាស្ត្រីឃោសនាស្រាបៀរ មានស្រុកកំណើតភូមិសៀមបោយ ឃុំព្រៃចារ ស្រុកជើងព្រៃ ខេត្តកំពង់ចាម, ២-ឈ្មោះ ធឿន ផន ភេទស្រី អាយុ៣០ឆ្នាំ ជាស្ត្រីឃោសនាស្រាបៀរ នៅភូមិស្វាយអន្ទរ ឃុំស្វាយអន្ទរ ស្រុកស្វាយអន្ទរ ខេត្តព្រៃវែង, ៣-ឈ្មោះ ផល ម៉ាច ភេទស្រី អាយុ១៩ឆ្នាំ ជាស្ត្រីឃោសនាស្រាបៀរ នៅភូមិសំពុង ឃុំប្រាសាទ ស្រុកសន្ទុក ខេត្តកំពង់ធំ, ៤-ឈ្មោះ ផាន ចេង ភេទស្រី អាយុ២០ឆ្នាំ ជាស្ត្រីឃោសនាស្រាបៀរ ភូមិជើងខាល ឃុំមង់រៀវ ស្រុកត្បូងឃ្មុំ និង៥-ឈ្មោះ ផុន ផានិត ភេទប្រុស អាយុ២១ឆ្នាំ ជាកម្មករកាប់ទឹកកក នៅភូមិក្រូចឆ្មារ ឃុំខ្សាច់ប្រឆេះ ស្រុកក្រូចឆ្មារ ។
លោកវរសេនីយ៍ត្រី ឡុង សារិន អធិការរងនគរបាលស្រុកត្បូងឃ្មុំ ប្រាប់ឱ្យដឹងថា នៅរសៀលថ្ងៃទី១៥ តុលា លោកប៉ុក តារា ព្រះរាជអាជ្ញារងអមសាលាដំបូងខេត្តបានដឹកនាំកម្លាំងការិយាល័យប្រឆាំងគ្រឿងញៀនខេត្ត និងនគរបាលស្រុកត្បូងឃ្មុំ ចុះឆែកឆេរបន្ទប់ជួលដាក់ខារ៉ាអូខេយីហោ«នឹកជានិច្ច៩៩៩»មានទីតាំងនៅភូមិស្លាបក្តោង ឃុំជប់ ដែលឈ្មោះ ងី ស្រីនី ភេទស្រី អាយុ៤៦ឆ្នាំ រស់នៅភូមិមេម៉ាយ សង្កាត់បឹងកុក ក្រុងកំពង់ចាម ខេត្តកំពង់ចាម ជាអ្នកជួលបើកខារ៉ាអូខេ រហូតឈានទៅចាប់ខ្លួនជនសង្ស័យទាំង៥នាក់ខាងលើ ។
ក្រោយពេលចាប់ខ្លួន ជនសង្ស័យទាំង៥នាក់ និងវត្ថុតាង ត្រូវបានបញ្ជូនមកកាន់អធិការដ្ឋាននគរបាលស្រុកត្បូងឃ្មុំដើម្បីសួរនាំ និងបន្តស្រាវជ្រាវរកមេខ្លោងជួញដូរគ្រឿងញៀនបន្តទៀត ដើម្បីចាប់យកមកផ្តន្តាទោសតាមនីតិវិធីច្បាប់ ៕
ចែករំលែកព័តមាននេះ