ខេត្តកំពត ៖ លោកវរសេនីយ៍ទោ ហែម ចន្ទ័ដារ៉ា មេបញ្ជាការរង និងជាប្រធានមន្ទីរយុត្តិធម៌អធិការកិច្ចកងរាជអាវុធហត្ថខេត្តបានឲ្យកោះសន្តិភាពដឹងថា នៅថ្ងៃទី១៣ តុលា ២០១៥ វេលាម៉ោង៣ និង៣០នាទីរសៀល កំលាំងមន្ទីរយុត្តិធម៌អធិការកិច្ចកងរាជអាវុធហត្ថខេត្តបានចុះបង្ក្រាបករណីជួញដូរ និងប្រើប្រាស់គ្រឿងញៀនមួយកន្លែងនៅចំណុចភូមិសត្វពង ឃុំសត្វពង ស្រុកឈូក ឃាត់ខ្លួនជនសង្ស័យបាន២នាក់ព្រមទាំងរឹបអូសវត្ថុតាង និងថ្នាំញៀនបានមួយចំនួនធំ។
លោកបន្តថា ជនសង្ស័យទាំងពីរនាក់ដែលកំលាំងកងរាជអាវុធឃាត់ខ្លួនមានឈ្មោះ ម៉ន សុស ភេទប្រុស អាយុ២២ឆ្នាំ មុខរបរមិនពិតប្រាកដ មានទីលំនៅភូមិត្រពាំងវែង ឃុំត្រពាំងរាំង ស្រុកជុំគីរី និង ឈ្មោះ សឹង គឹមសែន ភេទប្រុស អាយុ២៥ឆ្នាំ មុខរបរបើកបរ មានទីលំនៅភូមិល្អាង ឃុំល្អាង ស្រុកដងទង់។
វត្ថុតាងរឹបអូសបានមានថ្នាំញៀនប្រភេទម៉ាទឹកកកចំនួន៣កញ្ចប់ធំ និង១៩កញ្ចប់តូច ឧបករណ៍ សំរាប់ជក់១សំរាប់ កុំព្យួរទ័រ១គ្រឿង រថយន្តម៉ាកកាមរីឆ្លាមពណ៌ស្លែគ្មានស្លាកលេខ១គ្រឿង ម៉ូតូម៉ាកឃ្លិកពណ៌សលាយស្លាទុំគ្មានស្លាកលេខ១គ្រឿង និងទូរសព្ទ័ដៃម៉ាកអិនចុចពិល១គ្រឿង។
បច្ចុប្បន្នជនសង្ស័យ និងវត្ថុតាងត្រូវបានមន្ទីរយុត្តិធម៌កងរាជអាវុធហត្ថខេត្តកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី៕
ចែករំលែកព័តមាននេះ