ខេត្តសៀមរាប ៖ នៅព្រះរាជដំណាក់ខេត្ត នាព្រឹកថ្ងៃទី១៥ តុលា ២០១៥ នេះ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងខេត្តសៀមរាប បានចូលរួមគោរពព្រះវិញ្ញាណក្ខន្ធ អតីតព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ គម្រប់ខួប៣ឆ្នាំ បន្ទាប់ពីព្រះអង្គយាងចូលទិវង្គត កាលពីថ្ងៃទី១៥ ខែតុលា ឆ្នាំ២០១២ កន្លងមកនេះ ។
តាមរយៈព្រះរាជពិធីបុណ្យនេះដែរ អាជ្ញាធរខេត្តក៍បានធ្វើការផ្សព្វផ្សាយយ៉ាងទូលំទូលាយដល់ប្រជាពលរដ្ឋ ព្រះសង្ឃ នៅតាមទីវត្ដអារាម ស្ថាប័ន មន្ទីរ អង្គភាពនានា រួមទាំងបណ្តាសាលារៀន គ្រឹស្ថានសិក្សា វិស័យឯកជន និងគ្រប់លំនៅឋានរបស់ប្រជាពលរដ្ឋទូទាំងខេត្តសៀមរាប ដើម្បីចូលរួមបោសសម្អាតទីធ្លាកន្លែងសក្ការបូជា ព្រមទាំងការដាក់តាំងរូបព្រះឆាយាល័ក្ខណ៍របស់ព្រះអង្គ តុបតែងលម្អដោយផ្កាភ្ញី ភ្លើងពណ៌ ចងបដា ពាក្យស្លោក ទង់ជាតិ ទង់សាសនា និងទង់ជ្វាលាពីនៅមុខខ្លោងទ្វារចូលក្នុងវត្ដអារាមជាដើម ។
យោងតាមព្រះរាជជីវប្រវត្តិសង្ខេបរបស់ព្រះករុណា ព្រះបាទសម្ដេច ព្រះនរោត្ដម សីហនុ ព្រះមហាវីរក្សត្រ នៃព្រះរាជាណាចក្រកម្ពុជា ព្រះអង្គប្រសូត នៅថ្ងៃអង្គារ ១១ កើត ខែកត្តិក ឆ្នាំច ចត្វាស័ក ព.ស.២៤៥៦ ត្រូវនឹងថ្ងៃទី៣១ ខែតុលា ឆ្នាំ១៩២២ នៅរាជធានីភ្នំពេញ ព្រះរាជាណាចក្រកម្ពុជា ។ ព្រះករុណា ព្រះបាទសម្ដេចព្រះ នរោត្ដម សីហនុ ព្រះមហាវីរក្សត្រកម្ពុជា បានឡើងគ្រងរាជសម្បត្តិ ក្នុងព្រះជន្ម១៩ព្រះវស្សា គឺនៅឆ្នាំ១៩៤១ ។ ព្រះអង្គ បានទាមទារឯករាជ្យពេញលេញពីបារាំង សម្រាប់កម្ពុជា នៅថ្ងៃទី៩ ខែវិច្ឆិកា ឆ្នាំ១៩៥៣ ។
ព្រះមហាវីរក្សត្រសម្តេចព្រះនរោត្តម សីហនុ ជាក្សត្រដែលមានប្រជាប្រិយភាព និងកិត្តិនាមជាទីស្រឡាញ់ពេញចិត្តរបស់ប្រជាពលរដ្ឋកម្ពុជាគ្រប់រូបតាមរយៈស្នាព្រះហស្តរបស់ព្រះអង្គ ក្នុងការកសាងជាតិមាតុភូមិ និងការពារបូរណភាពទឹកដី ។ ហើយដោយសារតែសក្ខីភាពរបស់ព្រះអង្គយ៉ាងធំធេងនេះហើយ ទើបនៅព្រឹកថ្ងៃទី១៥ តុលា ២០១៥ នេះ ខេត្តសៀមរាបបានរៀបចំព្រះរាជពិធីគោរពព្រះវិញ្ញាណក្ខន្ធ ជាការរំឭកដឹងគុណយ៉ាងជ្រាលជ្រៅចំពោះព្រះអង្គ ជាព្រះបិតាឯករាជ បូរណភាពទឹកដី និងជាអ្នកមានគុណចំពោះប្រជារាស្ត្រគ្រប់ស្រទាប់វណ្ណៈ ។
បន្ទាប់ពីការបូជាទៀន ធូប ថ្វាយនៅចំពោះមុខព្រះឆាយាល័ក្ខណ៍របស់ព្រះបរមរតនកោដ្ឋ និងការគោរពព្រះវិញ្ញាណក្ខន្ធរបស់ព្រះបរមរតនកោដ្ឋ ដោយបានធ្វើការស្មឹងស្មាត ដើម្បីឧទ្ទិសព្រះវិញ្ញាណក្ខន្ធរបស់ព្រះអង្គ ទ្រង់បានយានទៅកាន់ព្រះបរមសុគតិភព ឲ្យបានគ្រប់ៗជាតិកុំបីឃ្លៀងឃ្លាតឡើយ ៕
ចែករំលែកព័តមាននេះ