ខេត្តត្បូងឃ្មុំ ៖ ផ្ទះស្តុកឈើប្រណីតមួយកន្លែង នៅភូមិត្បូងវត្ត ឃុំមេមត់ ស្រុកមេមត់ ត្រូវបានលោកសុខ ដារ៉ា ព្រះរាជអាជ្ញារងអមសាលាដំបូងខេត្តដឹកនាំកម្លាំងសមត្ថកិច្ចចំរុះ ចុះប្រតិបត្តិការបង្ក្រាបកាលពីវេលាម៉ោង១០ និង៣០នាទីព្រឹក ថ្ងៃទី១៥ តុលា ២០១៥ នេះដោយរឹបអូសបានឈើប្រណីតប្រភេទធ្នង់ជាច្រើនដុំ ចំណែកម្ចាស់ផ្ទះវិញបានរត់គេចខ្លួនបាត់ស្រមោល។
នាយរងការិយាល័យប្រឆាំងបទល្មើសសេដ្ឋកិច្ចខេត្ត លោកអនុសេនីយ៍ឯក ទូច សម្បត្តិ ប្រាប់ឲ្យដឹងថា ការចុះបង្ក្រាបនេះធ្វើឡើងបន្ទាប់ពីមានប្រជាពលរដ្ឋល្អរាយការណ៍មកលោកឧត្តមសេនីយ៍ត្រី ម៉ៅ ពៅ ស្នងការនគរបាលខេត្តថា នៅផ្ទះរបស់ឈ្មោះលី សុព្រីន ភេទប្រុស អាយុជាង២០ឆ្នាំ ទីតាំងនៅត្រង់ចំណុចខាងលើមានលួចស្តុកឈើប្រណីតដោយខុសច្បាប់ជាច្រើនកំណាត់ លុះពេលណាដែលប្រមូលបានច្រើន នឹងដឹកចេញទៅលក់ដោយស្ងាត់ៗនៅព្រំដែនវៀតណាម ។
នាយរងការិយាល័យប្រឆាំងបទល្មើសសេដ្ឋកិច្ចខេត្ត លោកអនុសេនីយ៍ឯក ទូច សម្បត្តិ បញ្ជាក់ថា រហូតមកដល់វេលាម៉ោង១ និង៣០នាទីរសៀល ថ្ងៃដដែលសមត្ថកិច្ចចំរុះបានឲ្យកម្មករលើកឈើទាំងនោះដាក់គោយន្ត១គ្រឿងដើម្បីយកមករក្សាទុកជាបណ្តោះអាសន្ននៅសង្កាត់រដ្ឋបាលព្រៃឈើមេមត់ ដើម្បីចាត់ការបន្តតាមនីតិវិធីច្បាប់ ៕
ចែករំលែកព័តមាននេះ