រាជធានីភ្នំពេញ ៖ ថ្នាក់ដឹកនាំក្រុមហ៊ុនវិនិយោគទុនអាណិកជនកម្ពុជា ដែលមានលោកពុង ឃាវសែ អគ្គនាយក បានជួបសំណេះសំណាល និងផ្ដល់អំណោយដល់ប្រជាពលរដ្ឋស្នាក់នៅក្នុងបុរីរុងរឿង
រាជធានីភ្នំពេញ ៖ ថ្នាក់ដឹកនាំក្រុមហ៊ុនវិនិយោគទុនអាណិកជនកម្ពុជា ដែលមានលោកពុង ឃាវសែ អគ្គនាយក បានជួបសំណេះសំណាល និងផ្ដល់អំណោយដល់ប្រជាពលរដ្ឋស្នាក់នៅក្នុងបុរីរុងរឿង ក្នុងឱកាសបុណ្យភ្ជុំបិណ្ឌនាឆ្នាំនេះ ។ ពិធីសំណេះសំណាល និងចែកអំណោយដល់ប្រជាពលរដ្ឋបានធ្វើឡើងនៅរសៀលថ្ងៃទី១០ តុលា ២០១៥ នៅក្នុងបុរីរុងរឿង ខណ្ឌជ្រោយចង្វា ដោយមានប្រជាពលរដ្ឋជាង១០០គ្រួសារចូលរួម ។
លោកពុង ឃាវសែ បានមានប្រសាសន៍ថា លោកនឹងខិតខំធ្វើយ៉ាងណា ដើម្បីអភិវឌ្ឍន៍តំបន់នេះ ឱ្យបងប្អូនមានភាពងាយស្រួលរស់នៅ ដោយបង្កើតជាផ្សារឱ្យបងប្អូនប្រកបរបរលក់ដូ ធ្វើអាជីវកម្មសម្រាប់ចិញ្ចឹមជីវិត។ មិនតែប៉ុណ្ណោះសម្រាប់ចាស់ជរា លោកនឹងជួយឧបត្ថម្ភដល់ពួកគាត់ទៅតាមលទ្ធភាព ព្រមទាំងឧបត្ថម្ភដល់កុមារដែលមកពីគ្រួសារមានជីវភាពខ្វះខាតឱ្យចូលរៀននៅក្នុងសាលាឱ្យបានគ្រប់គ្នា ហើយសម្រាប់សិស្សដែលបញ្ចប់ការសិក្សាថ្នាក់វិទ្យាល័យ និងពុំមានលទ្ធភាពបន្តការសិក្សាថ្នាក់មហាវិទ្យាល័យ លោកនឹងជួយដោះស្រាយឱ្យពួកគាត់បន្តការសិក្សារបញ្ចប់ថ្នាក់មហាវិទ្យាល័យ ដើម្បីយកចំណេះធ្វើការជួយខ្លួនឯង ជួយគ្រួសារ និងសង្គមជាតិទាំងមូលផងដែរ ។
គួរបញ្ជាក់ថា ក្នុងពិធីសំណេះសំណាលតំណាងក្រុមហ៊ុនវិនិយោគទុនអាណិកជនកម្ពុជា បានផ្ដល់អំណោយបន្តិចបន្តួចដល់បងប្អូនប្រជាពលរដ្ឋដែលរស់ក្នុងបុរីរុងរឿង រួមមានថវិកាមួយចំនួន មុង ភួយ និងគ្រឿងឧបភោគបរិភោគមួយចំនួនសម្រាប់ប្រើប្រាស់ក្នុងឱកាសបុណ្យភ្ជុំបិណ្ឌ ហើយតំណាងក្រុមសំណូមពរឱ្យបងប្អូនប្រជាពលរដ្ឋដែលរស់នៅក្នុងបុរីរុងរឿងទាំងអស់ ចេះស្រលាញ់ យោគយល់ សាមគ្គីគ្នា ព្រមទាំងជួយគ្នាទៅវិញទៅមកក្នុងនាមអ្នករស់នៅក្នុងបុរីតែមួយជាមហាគ្រួសារតែមួយ ៕
ចែករំលែកព័តមាននេះ