ខេត្តព្រះសីហនុ ៖ សាលាខេត្តព្រះសីហនុ រួមជាមួយមន្ទីរអង្គភាព រដ្ឋបាលក្រុង/ស្រុក ឃុំ/សង្កាត់ មន្ត្រីរាជការ កងកម្លាំងប្រដាប់អាវុធ សិស្សានុសិស្ស និស្សិត ព្រះសង្ឃ ព្រមទាំងប្រជាពលរដ្ឋទូទាំងខេត្ត បានរៀបចំពិធីគោរពព្រះវិញ្ញាណក្ខន្ឋ ព្រះករុណា ព្រះបាទសម្តេចព្រះនរោត្តម សីហនុ ព្រះបរមរតនកោដ្ឋគម្រប់ខួប៣ឆ្នាំថ្ងៃទី១៥ តុលា ២០១២ – ១៥ តុលា ២០១៥ ដែលពិធីនេះត្រូវបានប្រារព្ឋធ្វើឡើងនៅវេទិកាបុណ្យជាតិ៧មករា ស្ថិតក្នុងសង្កាត់លេខ៣ ក្រុងព្រះសីហនុ ។
លោក យន្ត មីន អភិបាល អភិបាលខេត្ត បានមានប្រសាសន៏ថា ក្នុងនាមមន្ត្រីរាជការ កងកម្លាំងប្រដាប់អាវុធ ព្រះសង្ឃ សិស្ស និស្សិត ប្រជាពលរដ្ឋ ជាកូនចៅ ចៅទួត ទាំងអស់ទូទាំងខេត្តព្រះសីហនុ សូមចូលរួមក្នុងភាពក្រៀមក្រំលំឱនកាយវាចាចិត្តគោរពព្រះវិញ្ញាណក្ខន្ឋ សម្តេចឪ សម្តេចតា សម្តេចតាទួត ជាទីគោរពសក្ការៈ ដ៏ខ្ពង់ខ្ពស់បំផុត និងចងចាំជានិច្ចនូវព្រះរាជបូជនីយកិច្ចក្នុងការដឹកនាំទាមទារយកបានឯករាជ្យជាតិ កិច្ចការពារបូរណភាពទឹកដី និងការអភិវឌ្ឍប្រទេសប្រកបដោយសេចក្តីសុខ ថ្លៃថ្នូរ ធ្វើឱ្យប្រទេសជាតិ មានការអភិវឌ្ឍរីកចម្រើនជារៀងរហូតមកដល់បច្ចុប្បន្ន ។
លោក យន្ត មីន បានបន្តថា ការបាត់បង់ព្រះរាជវត្តមានដ៏ឧត្តុង្គឧត្តមនៃព្រះអង្គ សម្តេចព្រះមហាវីរក្សត្រ ព្រះរាជបិតាឯករាជ្យជាតិខ្មែរ គឺជាការបាត់បង់តួអង្គ នៃព្រះមហាក្សត្រខ្មែរដ៏ឆ្នើមដែលជានិច្ចកាល ព្រះអង្គបានបំពេញព្រះរាជ្យបូជនីយកិច្ច ដើម្បីឯករាជ្យបូរណភាពទឹកដី និងឯកភាពជាតិខ្មែរ ប្រកបដោយព្រះបញ្ញាញាណ ភ្លឺថ្លា វៀងវៃ គ្រប់កាលៈទេសៈ ថ្វីបើព្រះរូប ព្រះកាយ របស់ព្រះអង្គ និងព្រះដួងវិញ្ញាណក្ខន្ឋរបស់ព្រះអង្គ បានយាងទៅកាន់បរលោកទៅហើយក្តី ប៉ុន្តែព្រះវីរគំរូដ៏ឆ្នើមលើគ្រប់វិស័យ របស់សម្តេចឪជាអង្គម្ចាស់ ទ្រង់ស្ថិតនៅជានិច្ចកាល ក្នុងមនសិការ និងឆន្ទៈរបស់ទូលព្រះបង្គំយើងទាំងអស់គ្នា ដែលជាកូន ជាចៅ ចៅទួត របស់ព្រះអង្គ ពិតជានៅគង់វង្ស ស្ថិតស្ថិរជាអមតៈ រៀងរហូតមិនមានថ្ងៃបំភ្លេចបានឡើយ ៕
ចែករំលែកព័តមាននេះ