រាជធានីភ្នំពេញ ៖ បុរសម្នាក់ត្រូវប្រជាពលរដ្ឋច្រឡំស្មានថាជាចោរនាំគ្នាស្វាគមន៍ម្នាក់មួយដៃមួយជើងបែកមាត់ ទើបប្រគល់ឱ្យសមត្ថកិច្ចកាលពីវេលាម៉ោង៧និង១៥នាទីយប់ថ្ងៃទី១៤ តុលា ២០១៥ ស្ថិតក្នុងភូមិស្ពានខ្ពស់ ក្រុម៦ សង្កាត់គីឡូម៉ែត្រលេខ៦ ខណ្ឌឫស្សីកែវ ។
ជនសង្ស័យឈ្មោះ នេត អាយុ៣១ឆ្នាំ មុខរបរនៅផ្ទះ មានទីលំនៅភូមិកើតហេតុខាងលើ បានរៀបរាប់ថា មុនពេលកើតហេតុ ខ្លួនមានមិត្តភក្ដិម្នាក់ដែលស្នាក់នៅបន្ទប់ ជួល ទើបមកពីស្រុកកំណើតបានហៅរូបគេមកលេង ប៉ុន្តែបន្ទប់ជួលដែលនៅជិតនោះម្ចាស់បន្ទប់មិនទាន់ត្រឡប់មកវិញទេ ខណៈពេលជនសង្ស័យដើរឡើងទៅដល់បន្ទប់ស្រាប់តែអ្នកភូមិដែលនៅម្ដុំនោះឃើញប្លែកមុខស្មានតែជាចោរគាស់បន្ទប់ជួល ក៏សួរនាំស្រាប់តែជនសង្ស័យឆ្លើយទាំងរដិបរដុប ធ្វើឲ្យប្រជាពលរដ្ឋមានការសង្ស័យបាននាំគ្នាចាប់វាយមួយដៃមួយជើងម្នាក់បណ្តាលឲ្យបែកមាត់ហូរឈាមទើបប្រគល់ឱ្យកម្លាំងសមត្ថកិច្ចដែលបានល្បាតនៅម្ដុំនោះយកទៅសាកសួរនៅប៉ុស្ដិ៍គីឡូម៉ែត្រលេខ៦ ។
ចំណែកមិត្តភក្តិដែលស្នាក់នៅក្នុងបន្ទប់ជួលកើតហេតុខាងលើ ពេលដែលឃើញប្រជាពលរដ្ឋវាយមិត្តភក្កិតរបស់ខ្លួនមិនហ៊ានចេញមក ខាងក្រៅជួយទេខ្លាចប្រជាពលរដ្ឋច្រឡំទៀត ។
លុះមកដល់ប៉ុស្ដិ៍នគរបាលរដ្ឋបាលគីឡូម៉ែត្រលេខ៦ សមត្ថកិច្ចជំនាញធ្វើការសាកសួរទៅទើបដឹងថាគេម្នាក់នោះជាប្រជាពលរដ្ឋដែលនៅភូមិជិតនោះដែរ ហើយរូបគាត់មានឪពុកម្តាយ និងមានផ្ទះសម្បែងត្រឹមត្រូវ ក្រោយពីបានណែនាំអប់រំហើយ សមត្ថកិច្ចក៍ឱ្យជនសង្ស័យម្នាក់ធ្វើការចុះកិច្ចសន្យា និងឱ្យឪពុកម្ដាយមកធានាយកត្រឡប់ទៅផ្ទះវិញ ៕
ចែករំលែកព័តមាននេះ