រាជធានីភ្នំពេញ ៖ ជនសង្ស័យម្នាក់ត្រូវកម្លាំងនគរបាលប៉ុស្តិ៍ទំនប់ទឹកធ្វើការឃាត់ខ្លួនបាន ពេលកំពុងជិះម៉ូតូបម្រុងយកទៅលក់បន្ទាប់ពីលួចបានកាលពី៤ថ្ងៃមុន ដែលហេតុការណ៍ឃាត់ខ្លួននេះធ្វើឡើងកាលពីវេលាម៉ោង៩ និង១៥នាទីព្រឹក ថ្ងៃទី១៤ តុលា ២០១៥ នៅបណ្តោយផ្លូវលេខ២០៩ ស្ថិតក្នុងភូមិ៤ សង្កាត់ទំនប់ទឹក ខណ្ឌចំការមន ។
ជនសង្ស័យដែលត្រូវឃាត់ខ្លួនឈ្មោះ ងូក សា អាយុ៣៨ឆ្នាំ ស្នាក់នៅផ្ទះជួលក្នុងភូមិឫស្សី សង្កាត់ស្ទឹងមានជ័យ ខណ្ឌមានជ័យ និងមានទីលំនៅក្នុងភូមិរវាង ឃុំសុភី ស្រុកបាទី ខេត្តតាកែវ ។
ប្រភពព័ត៌មានពីមន្ត្រីនគរបាលម្នាក់បានប្រាប់ឱ្យដឹងថា មុនពេលកើតហេតុ កម្លាំងនគរបាលប៉ុស្តិ៍ទំនប់ទឹកកំពុងល្បាតនៅក្នុងមូលដ្ឋានរបស់ខ្លួន ក៏បានប្រទះឃើញជនសង្ស័យដែលជាមុខសញ្ញាចាស់កំពុងជិះម៉ូតូម៉ាក Fino ព៌ណក្រហម ពាក់ស្លាកលេខ ភ្នំពេញ 1AT-8184 មួយគ្រឿងម្នាក់ឯង ដោយមានការសង្ស័យក៏ឃាត់សួរនាំ ។ ពេលដែលកម្លាំងនគរបាលធ្វើការសួរនាំ ក៏មើលទៅឃើញត្រង់សោមានភាពមិនប្រក្រតីនោះ ទើបដឹងថា ជាម៉ូតូដែលរូបគេបានធ្វើសកម្មភាពលួចបាននៅម្តុំផ្លូវសឡា ក្នុងសង្កាត់ស្ទឹងមានជ័យ ខណ្ឌមានជ័យកាលពីថ្ងៃទី១០ តុលា កន្លងទៅ ។
សមត្ថកិច្ចនគរបាលបានឱ្យដឹងទៀតថា ក្រោយពេលឃាត់ខ្លួន សមត្ថកិច្ចបានបញ្ជូនជនសង្ស័យទៅកាន់អធិការដ្ឋាននគរបាលខណ្ឌចំការមន ដើម្បីចាត់ការបន្តទៅតាមផ្លូវច្បាប់ ព្រមទាំងដកហូតបានម៉ូតូម៉ាក Fino មួយគ្រឿង រួមទាំងឧបករណ៍សម្រាប់ឆ្កឹះសោម៉ូតូមួយចំនួនទៀត ។ ម៉ូតូដែលដកហូតបានកំពុងធ្វើស្រាវជ្រាវដើម្បីរកម្ចាស់ឱ្យមកទទួលយកទៅវិញ ។
សូមបញ្ជាក់ថា ជនសង្ស័យគឺជាមុខសញ្ញាចាស់ដែលតែងតែងធ្វើសកម្មភាពលួចម៉ូតូ ហើយទើបតែរួចខ្លួនពីពន្ធនាគារថ្មីៗនេះផងដែរ ៕
ចែករំលែកព័តមាននេះ