នាយករដ្ឋមន្ត្រីអីុស្រាអែល លោកបេនចាមីន ណេតាន់យ៉ាហ៊ូ បានសន្យាកាលពីថ្ងៃទី១៣ តុលា ប្រើប្រាស់គ្រប់មធ្យោបាយ ដើម្បីប្រឈមមុខចំពោះការកើនឡើងនៃអំពើហិ.ង្សាជាមួយពួកប៉ាឡេស្ទីន ដែលអំពើហិ.ង្សា
នាយករដ្ឋមន្ត្រីអីុស្រាអែល លោកបេនចាមីន ណេតាន់យ៉ាហ៊ូ បានសន្យាកាលពីថ្ងៃទី១៣ តុលា ប្រើប្រាស់គ្រប់មធ្យោបាយ ដើម្បីប្រឈមមុខចំពោះការកើនឡើងនៃអំពើហិង្សាជាមួយពួកប៉ាឡេស្ទីន ដែលអំពើហិង្សាទាំងនេះបានឆ្លងកាត់របត់ថ្មីមួយជាមួយការស្លាប់របស់ជនជាតិអីុស្រាអែល៣នាក់ ក្នុងការវាយប្រហារភេវកម្ម២នៅទីក្រុងហ្សេរុយសាឡឹម ។
លោកនេតាន់យ៉ាហ៊ូ មានប្រសាសន៍ថា យើងនឹងប្រើប្រាស់គ្រប់មធ្យោបាយដែលយើងមាន ដើម្បីធ្វើឱ្យមានភាពស្ងប់ស្ងាត់ឡើងវិញ ចំពោះការកើនឡើងនៃអំពើហិង្សាដែលលោកថាធ្ងន់ធ្ងរ ហើយហាក់ដូចជាពុំបញ្ចប់ ។
នៅមុខសភានាយករដ្ឋមន្ត្រីអីុស្រាអែលថ្លែងថា រដ្ឋាភិបាលនឹងសម្រេចនាពេលនេះនូវមធ្យោបាយខ្លាំងនានាបន្ថែមទៀត ដែលនឹងចូលជាធរមានដោយឆាប់រហ័ស ។ លោកក៏បានព្រមានផងដែរដល់ប្រធានាធិបតីប៉ាឡេស្ទីន លោកម៉ាមូដ អាប់បាស់ ដែលអីុស្រាអែលនឹងចាត់ទុកជាអ្នកទទួលខុសត្រូវក្នុងករណីមានការស្រុតចុះថ្មីនៃសភាពការណ៍ ។
សហរដ្ឋអាមេរិកបានថ្កោលទោសយ៉ាងម៉ឺងម៉ាត់ចំពោះការវាយប្រហារភេរវកម្មទាំង២នេះនៅទីក្រុងហ្សេរុយសាឡឹម ដោយស្នើដល់អាជ្ញាធរអីុស្រាអែល និងប៉ាឡេស្ទីនឱ្យស្តារឡើងវិញនូវភាពស្ងប់ស្ងាត់ ។
ចំណែក អ.ស.ប វិញ បានរិះគន់ចំពោះការប្រើកម្លាំងជ្រុលហួសហេតុរបស់កងកម្លាំងសន្តិសុខអីុស្រាអែលប្រឆាំងពួកប៉ាឡេស្ទីននៅតំបន់ស៊ីសហ្ស៊កដានី ។
នាព្រឹកថ្ងៃទី១៣ តុលា ជនប៉ាឡេស្ទីន២នាក់បានបាញ់ប្រហារលើរថយន្តបឺស១គ្រឿងនៅហ្សេរុយសាឡឹមខាងកើត បណ្តាលឱ្យជនអីុស្រាអែល២នាក់ស្លាប់ និងរបួសច្រើននាក់ ។ ចំណែកការវាយប្រហារមួយទៀត បណ្តាលឱ្យជនអុីស្រាអែលម្នាក់ស្លាប់នៅហ្សេរុយសាឡឹមខាងលិច ៕
ចែករំលែកព័តមាននេះ