ឥណ្ឌូនេស៊ី ៖ មេបញ្ជាការយោធាឥណ្ឌូនេស៊ីបាននិយាយកាលពីថ្ងៃទី២៥ ខែមេសា ថា នាវិកទាំង៥៣នាក់នៅលើនាវាមុជទឹក ដែលលិចកាលពីពេលថ្មីៗនេះ ត្រូវបានអះអាងថា ស្លា.ប់បាត់បង់ជីវិតទាំងអស់។ នេះបើតាមការចេញផ្សាយពីសារព័ត៌មាន CNA ។ គួររំលឹកថា បំណែកនាវាមុជទឹកដែលបាត់ រកឃើញនៅកន្លែងមួយ
លោក Marshal Hadi Tjahjanto មេបញ្ជាការកងកំលាំងប្រដាប់អាវុធជាតិឥណ្ឌូនេស៊ីបាននិយាយថា ក្រុមរុករកបានទទួលរូបភាពដែលអាចបញ្ជាក់ថា កម្ទេចកម្ទីដែលរកឃើញគឺជាបំណែកនៃនាវាមុជទឹក KRI Nanggala 402 ។
«ផ្អែកលើភស្តុតាងពិតប្រាកដដែលប្រមូលបាន យើងសូមធ្វើការបញ្ជាក់ថា នាវាមុជទឹក KRI Nanggala 402 បានលិចហើយ។ ដូច្នេះដោយភាពសោកសៅជាទីបំផុតក្នុងនាមខ្ញុំជាមេបញ្ជាការ ខ្ញុំសូមប្រកាសថានាវិក ៥៣នាក់ដែលនៅលើនាវាគឺបានស្លា.ប់បាត់បង់ជីវីតទាំងអស់» ទាំងនេះគឺជាសម្តីរបស់លោក Tjahjanto។
ក្រុមអ្នកជំនាញបានលើកឡើងអំពីដំណើរការនៃការរុករកយ៉ាងដូច្នេះថា ក្រុមសង្គ្រោះ MV Swift Rescue របស់ប្រទេសសិង្ហបុរី ត្រូវបានដាក់ពង្រាយនៅម៉ោង ៧:០០ព្រឹក។ ហើយនៅម៉ោងប្រហែល ៩ព្រឹកពួកគេទទួលបានរូបភាពនៃនាវាមុជទឹកដែលបានលិចក្នុងជម្រៅ ៨៥០ម៉ែត្រ។ ដែលធ្វើឱ្យនាវិកទាំងអស់មិនអាចទប់ទល់នឹងសម្ពាធទឹកបានឡើយ។ បើទោះជាពួកគេមានសម្ភារៈសង្គ្រោះបម្រុងយ៉ាងណាក៏ដោយ។
សូមរំលឹកថានាវាមុជទឹក KRI Nanggala 402 បានបាត់កាលពីថ្ងៃទី២១ ខែមេសា អំឡុងពេលធ្វើសមយុទ្ធនៅភាគខាងជើងកោះបាលី។ ក្រោយទទួលដំណឹងនៃការបាត់នាវាមុជទឹកនេះ ប្រទេសជាច្រើនដូចជា សិង្ហបុរី, ម៉ាឡេស៊ី, សហរដ្ឋអាមេរិក, អូស្ត្រាលី, បារាំង និងអាល្លឺម៉ង់ ក៏ចូលរួមក្នុងដំណើរការរុករកយ៉ាងជិតស្និទជាមួយរដ្ឋាភិបាលឥណ្ឌូនេស៊ីផងដែរ៕
ចែករំលែកព័តមាននេះ