ខេត្តកណ្តាល ៖ ទៀតហើយ មន្ត្រីយោធានៅនាយកដ្ឋាន វិស្វកម្ម នាំស្រីស្នេហ៌ និងមិត្តភក្តិដើរផឹកស៊ីយ៉ាងសប្បាយ រួចបើករថយន្តមកបំពានគោលដៅបិទខ្ទប់មិនឲ្យប្រជាពលរដ្ឋចេញ-ចូល បើគ្មានការចាំបាច់ដើម្បីទប់ស្កាត់ការឆ្លងរាលដាលជំងឺកូវី ១៩…
ខេត្តកណ្តាល ៖ ទៀតហើយ មន្ត្រីយោធានៅនាយកដ្ឋាន វិស្វកម្ម នាំស្រីស្នេហ៌ និងមិត្តភក្តិដើរផឹកស៊ីយ៉ាងសប្បាយ រួចបើករថយន្តមកបំពានគោលដៅបិទខ្ទប់មិនឲ្យប្រជាពលរដ្ឋចេញ-ចូល បើគ្មានការចាំបាច់ដើម្បីទប់ស្កាត់ការឆ្លងរាលដាលជំងឺកូវី ១៩ នោះ ត្រូវបានសមត្ថកិច្ចហៅសួរនាំ រួចវៃខ្នោះតែម្តង ។ ហេតុការណ៍ឃាត់ខ្លួននេះធ្វើឡើងនៅថ្ងៃទី២៤ ខែមេសា ឆ្នាំ២០២១ វេលាម៉ោង៩និង៤០នាទីយប់ នៅចំណុចផ្លូវ១១៥ ជិតស្តុប៦០ម៉ែត្រ ស្ថិតក្នុងភូមិបត្តាជី សង្កាត់ព្រែកហូរ ក្រុងតាខ្មៅ ខេត្តកណ្តាល ។
ជនសង្ស័យទាំង០៣នាក់ខាងលើ គឺទី១-ឈ្មោះ គឹម ពិសិដ្ឋ ភេទប្រុស អាយុ៣៣ឆ្នាំ ជនជាតិខ្មែរ ទីលំនៅភូមិទួលគោក សង្កាត់ទួលសង្កែ ខណ្ឌឬស្សី រាជធានីភ្នំពេញ មុខរបរជាយោធានៅនាយកដ្ឋាន វិស្វកម្ម ដែលមានកំរិតជាតិអាកុល ០.០៧៦មីលីត្រខ្យល់ ។ ទី២-ឈ្មោះ សាត សុម៉ាលី ភេទស្រី អាយុ៤២ឆ្នាំ មានទីលំនៅបូរីពិភពថ្មី២ ក្នុងភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរលក់ដូរ និងទី៣-ឈ្មោះ ណី ប៊ុនធឿន ភេទប្រុស អាយុ៤២ឆ្នាំ មានទីលំនៅបូរីប៉េងហួត៦០ម៉ែត្រ សង្កាត់បឹងទំពន់ ខណ្ឌមានជ័យ រាជធានីភ្នំពេញ មុខរបរគ្រូចិនសែ។
លោកវរសេនីយ៌ឯក ឡាក់ ម៉េងធី នាយការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តកណ្តាលបានប្រាប់អោយដឹងថា នៅវេលាកើតហេតុខាងលើ ពេលដែលកម្លាំងចម្រុះកំពុងតែឈរយាមនៅគោលដៅផ្លូវ១១៥ ជិតស្តុប៦០ម៉ែត្រ មិនឲ្យប្រជាពលរដ្ឋចេញ-ចូល បើគ្មានការចាំបាច់ដើម្បីទប់ស្កាត់ការឆ្លងរាលដាលជំងឺកូវីដ១៩ ពេលនោះស្រាប់តែឃើញជនសង្ស័យ៣នាក់ខាងលើ ក្នុងស្ថានភាពស្រវឹង បានជិះរថយន្តមកដល់ ដោយឈ្មោះ គឹម ពិសិដ្ឋ ជាអ្នកបើក ហើយសមត្ថកិច្ចក៏បានឃាត់សួរនាំ រួចបញ្ជូនខ្លួនមកកាន់អធិការដ្ឋាននគរបាលក្រុងតាខ្មៅ ដើម្បីធ្វើការសាកសួរ និងចាត់ការតាមនីតិវិធីច្បាប់តែម្តង។
ចែករំលែកព័តមាននេះ