រាជធានីភ្នំពេញ ៖ ទោះជាសល់តែមួយថ្ងៃទៀតប្រទេសកម្ពុជាដល់ថ្ងៃប្រារព្ធពិធីបុណ្យភ្ជុំធំ ក៏កីឡាករសែន រ៉ាដេត និងកីឡាកររិទ្ធ អារុណ ដែលសុទ្ធតែជាជើងខ្លាំងនៅតែទទួលប្រកួតជាមួយកីឡាករថៃនៅថ្ងៃអាទិត្យខានស្អែកដែរ។ នេះជាការប្រកួតទ្វេភាគីរវាងកីឡាករកម្ពុជា និងបរទេសតែមួយគត់ដែលត្រូវធ្វើឡើងនៅលើសង្វៀនទូរទស្សន៍អាស៊ីអាគ្នេយ៍(SEA-TV) ក្នុងរដូវបុណ្យភ្ជុំ ដោយសារតែសង្វៀនប្រដាល់ដែលត្រូវប្រកួតអន្តរជាតិដូចគ្នាត្រូវបានលើកថ្ងៃ ។
កីឡាករកម្ពុជាសែន រ៉ាដេត ដែលអ្នកណាក៏ស្គាល់ថាជាជើងខ្លាំងល្បីឈ្មោះរបស់ក្លិបអប្សរាគុនខ្មែរ នឹងបើកឆាកប្រយុទ្ធជាមួយកីឡាករថៃឈ្មោះ Sakot Phach ក្នុងប្រភេទទម្ងន់៥១គីឡូក្រាម ។ នេះជាការប៉ះគ្នាលើកដំបូង ដោយសារភាគីថៃមិនដែលបង្ហាញខ្លួននៅក្នុងទឹកដីកម្ពុជានោះទេ នាពេលកន្លងមក ។ អញ្ចឹង ហើយទើបគេមិនអាចដឹងថាតើកីឡាករថៃ Sakot Phach មានសមត្ថភាពបែបណាសម្រាប់ការប៉ះគ្នាជាមួយជើងខ្លាំងសែន រ៉ាដេត នៅរសៀលថ្ងៃខានស្អែកនោះ ។ ការប៉ះគ្នារបស់អ្នកទាំង២នឹងត្រូវធ្វើឡើងចាប់ពីម៉ោង២រសៀលតទៅ ដោយមានការប្រគំតន្ត្រីកំដរបរិយាកាសការប្រកួតនោះផង ។
លោកថៃ អ៊ូ អ្នកដឹកនាំកីឡាករថៃឱ្យមកប្រកួតអះអាងថា កីឡាករ Sakot Phach គឺជាជើងខ្លាំងម្នាក់នៅក្នុងប្រទេសថៃសម្រាប់ប្រភេទទម្ងន់៥១គីឡូក្រាម ។ ទោះជាយ៉ាងណាលោកហាក់មិនហ៊ានអះអាងថា កីឡាករថៃរូបនេះនឹងឈ្នះកីឡាករកម្ពុជា ឬយ៉ាងណានោះទេ ដោយសារតែសែន រ៉ាដេត គឺជាជើងខ្លាំងដែលល្អគ្រប់ស្នៀតទាំងដៃ កែង និងជើងព្រមគ្នាបែបនេះ ។ លោកថា Sakot Phachមានសមត្ថភាពខ្ពស់ ប៉ុន្តែការប៉ះប្រកួតជាមួយសែន រ៉ាដេត ដែលមានបទពិសោធន៍ប្រកួតជាមួយថៃរាប់ភ្លេចបែបនេះ មិនទាន់ប្រាកដពីជំហានជោគជ័យបានទេ ដូច្នេះមានតែរង់ចាំមើលដោយផ្ទាល់ប៉ុណ្ណោះ។ លោកថា កីឡាករ Sakot Phach មានកំណត់ត្រាឡើងប្រកួតបានចំនួន៤៥ដង ឈ្នះ៤១ដង ចាញ់៤ដង និងមិនដែលស្មើ ហើយសម្រាប់គូប្រកួតដែលធ្លាប់ប៉ះគ្នាជាមួយគេ ក៏មានខ្លះជោគជ័យទាំងត្រដាបត្រដួស និងភាគច្រើនគឺបរាជ័យយ៉ាងអាម៉ាស់មុខផងដែរ ។ លោកថា ការប្រកួតនៅរសៀលថ្ងៃស្អែក គឺមិនខុសពីកីឡាករវ័យក្មេងប៉ះក្មេងនោះទេ ប៉ុន្តែលោកមិនច្បាស់ថាអ្នកណាឈ្នះអ្នកណាទេក្នុងពេលកីឡាករកម្ពុជាក៏ល្អ ហើយកីឡាកររបស់លោកក៏មិនអន់ ។ លោកថៃ អ៊ូ បានបង្ហាញការព្យាករថា កីឡាករSakot Phach នឹងបានត្រឹមទប់កីឡាករសែន រ៉ាដេត ច្រើនជាងឈ្នះ ដោយសារតែភាពជាក់ស្ដែងលោកហាក់ទទួលស្គាល់សមត្ថភាពឥតខ្ចោះរបស់កីឡាករកម្ពុជាច្រើនជាង ។ លោកមានប្រសាសន៍ថា៖ «សម្រាប់២នាក់ហ្នឹង បើឲ្យជ្រើសរើសគេយកសែន រ៉ាដេតហើយ ព្រោះកីឡាករហ្នឹងវារហ័ស ហើយខ្លាំង ប៉ុន្តែអាផងខ្ញុំក៏ល្អដែរនៅប្រទេសថៃ ទើបមានតែចាំមើលប៉ុណ្ណោះ ទើបដឹងថាអ្នកណាខ្លាំងអ្នកណាខ្សោយ!»។
លោកញាណ សុធី អ្នករៀបចំការប្រកួតបានថ្លែងប្រាប់ថា ជំនួបរបស់កីឡាករសែន រ៉ាដេត និងកីឡាករថៃ គឺជាការគិតគូរដ៏ហ្មត់ចត់មួយ ដែលលោកធ្វើឡើងក្នុងបំណងទាក់ទាញអ្នកមិនទាន់ឡើងទៅស្រុកក្នុងឱកាសបុណ្យភ្ជុំឲ្យមកទស្សនា ។ ក្នុងនោះលោកក៏មានបំណងឲ្យការប្រដាល់របស់លោកទទួលបានការចាប់អារម្មណ៍សម្រាប់ការទស្សនាដោយផ្ទាល់នៅតាមផ្ទះផងដែរ ទើបសម្រេចឲ្យមានការប្រកួតរវាងកីឡាករវ័យក្មេងទាំងពីរ ។ លោកថា រ៉ា ដេត គឺជាកីឡាករល្អម្នាក់ហើយគ្រប់ការប្រកួតរបស់កីឡាកររូបនេះមិនដែលធ្វើឱ្យអ្នកទស្សនាខកចិត្តនោះទេ ទើបការប៉ះប្រកួតជាមួយកីឡាករថៃ គឺទោះជាថៃជាភាគីដែលមានការអះអាងថា ល្អបែបណាក៏កីឡាករកម្ពុជាពិតជាមានលទ្ធផលល្អជាង ។ លោកថា ធ្លាប់មើលការប្រកួតរបស់កីឡាករថៃ គឺល្អកែងនិងទាត់ ហើយលោករំពឹងថា ការឡើងប្រកួតរបស់គេនៅរសៀលស្អែកនោះនឹងធ្វើឲ្យក្ដៅស្លឹកត្រចៀកសែន រ៉ាដេត តែម្ដង ដើម្បីឲ្យកីឡាកររូបនេះប្រឹងអស់ពីសមត្ថភាព ។ លោកថា កីឡាករភាគច្រើននៅក្នុងក្លិបអប្សរាគុនខ្មែរមិនមានទម្លាប់វាយបណ្ដែត ឬលាក់កណ្ដាប់ដៃនោះទេ ទើបការប្រកួតនៅថ្ងៃស្អែក បើកីឡាករថៃមិនបញ្ចេញឲ្យអស់ពីសមត្ថភាព ពិតជាត្រូវដេកលើរេញដោយសារតែបទពិសោធន៍កន្លងមក គឺសែន រ៉ាដេត មិនដែលឲ្យគូប្រកួតឆ្លងផុតទឹកទី៥នោះឡើយ ។ លោកថា កីឡាករសែន រ៉ាដេត ទើបតែប្រកួតបាន ២៩ដង ឈ្នះ២២ដង និងចាញ់៧ដងប៉ុណ្ណោះ ប៉ុន្តែបើនិយាយពីបទពិសោធន៍ឡើងប៉ះជាមួយថៃ ហើយផ្ដួលថៃគឺច្រើនដែលអាចឲ្យលោក និងអ្នកទស្សនាកក់ក្ដៅចិត្តបាន ។ យ៉ាងណាក៏ដោយ លោកថាលទ្ធផលជាក់ស្ដែង គឺមិនអាចដូចការប៉ាន់ស្មានបានទេ ដោយសារតែការប្រកួតគឺមិនខុសពីបាល់មូលដែលអាចរមៀលចុះឡើងផ្ទុយពីការទាយទុក ។ លោកថា ការដាក់កីឡាករSakot Phach ឲ្យប៉ះជាមួយសែន រ៉ាដេត គឺដោយសារតែលោកថៃ អ៊ូ មានបំណងឲ្យមកសងសឹកជំនួសកីឡាករថៃPhay Sithangដែលសែន រ៉ាដេត វាយឲ្យសន្លប់ក្នុងទឹកទី១ កាលពីថ្ងៃទី២៩ ខែកញ្ញា ។ អញ្ចឹងហើយទើបការប្រកួតរបស់គូនេះ គឺពិតជាល្អមើលដើម្បីឲ្យអ្នកទស្សនាទទួលបានអារម្មណ៍រីករាយហើយសប្បាយនឹងទៅធ្វើបុណ្យតាមវត្តក្នុងថ្ងៃភ្ជុំតែម្ដង។
គូអន្តរជាតិមួយគូទៀតកីឡាករចាស់វស្សា រិទ្ធ អារុណ នឹងត្រូវឡើងប្រកួតជាមួយកីឡាករថៃឈ្មោះ Super Chhaiក្នុងប្រភេទទម្ងន់៦៤គីឡូក្រាម ។ Super Chhai ធ្លាប់មកប្រកួតជាមួយអ្នកប្រដាល់ខ្មែរពីរលើកមកហើយ ដោយលើកទី១ចាញ់ មឿន សុខហ៊ុច មកពីក្លិបពុទ្ធសេរីវង្សកីឡាដោយពិន្ទុ និងលើកទី២ស្មើជាមួយ រឿង សោភ័ណ្ឌ មកពីក្លិបមកុដរាជសីហ៍ ។
រិទ្ធ អារុណ ធ្លាប់ប្រកួតបាន១០៣ដង ឈ្នះ៨៥ដង ចាញ់១៦ដង និងស្មើ២ដង ។ ចំណែកSuper Chhaiវិញ ធ្លាប់ប្រកួតបាន៨៨ដង ឈ្នះ៧៨ដង ចាញ់១០ដង និងមិនដែលស្មើ ។
នៅថ្ងៃអាទិត្យនោះ ការប្រដាល់ពេលព្រឹកនៅវេលាម៉ោង៨ និងពេលយប់វេលាម៉ោង៨ដូចគ្នា នៅលើសង្វៀនទូរទស្សន៍អាស៊ីអាគ្នេយ៍ ក៏មានគូក្នុងស្រុកល្អៗផងដែរ ខណៈដែលនៅប៉ុស្ដិ៍លេខ៥ ឯណោះវិញ ក៏មានការប្រកួតជម្រុះដ៏តានតឹងចាប់ពីម៉ោង៥ល្ងាចនៅសង្វៀនជ្រោយចង្វាជាធម្មតា ដោយមិនមានការឈប់សម្រាកអបអរថ្ងៃបុណ្យភ្ជុំទេ ៕
ចែករំលែកព័តមាននេះ