រាជធានីភ្នំពេញ ៖ តម្លៃឈ្នួលរថយន្តក្រុង និងតាក់ស៊ី នៅតែមានការដំឡើងថ្លៃក្នុងពិធីបុណ្យជាតិធំៗម្ដងៗ ជាពិសេសក្នុងឱកាសបុណ្យភ្ជុំបិណ្ឌនេះ ។
លោក ហូ វណ្ឌី ទីប្រឹក្សាសភាពាណិជ្ជកម្មកម្ពុជា និងជាអតីតសហប្រធានក្រុមការងារ វិស័យទេសចរណ៍កម្ពុជា មានប្រសាសន៍ថា ៖ « រឿងថ្លៃឈ្នួលឡើងថ្លៃក្នុងពិធីបុណ្យជាតិ និងបុណ្យភ្ជុំបិណ្ឌនេះ មិនមែនទើបតែនិយាយគ្នាទេ វាជារឿងយូរមកហើយ ជារៀងរាល់ឆ្នាំថ្នាក់ដឹកនាំកំពូលតែងតែអំពាវនាវ បុ៉ន្តែគ្មានប្រសិទ្ធភាព» ។
លោកបន្តថា រាល់ទំនិញផ្សេងៗដែលលក់នៅលើទីផ្សារ ជាពិសេសរបស់របរប្រើប្រាស់ សម្លៀកបំពាក់ តែងតែបញ្ចុះតម្លៃនៅពេលបុណ្យទាន ក៏ប៉ុន្តែចំពោះការដឹកជញ្ជូន ការស្នាក់នៅ និងម្ហូបអាហារបែរជាឡើងថ្លៃទៅវិញ ដែលនេះជាការដើរបញ្ច្រាសគ្នា ។
បុគ្គលិកក្រុមហ៊ុនទេសចរណ៍មួយកន្លែងឲ្យដឹងថា ៖ «នៅពេលបុណ្យភ្ជុំបិណ្ឌខាងមុខនេះ រថយន្តឈ្នួលនឹងដំឡើង១០ដុល្លារក្នុងមួយថ្ងៃ ឯសំបុត្ររថយន្តក្រុងមួយចំនួនបានឡើងថ្លៃ២ដុល្លារ បុ៉ន្តែរថយន្តក្រុងខ្លះមិនដំឡើងថ្លៃទេ » ។
លោក ខុម សុម៉េង ប្រធានក្រុមហ៊ុនទេសចរណ៍ដំរីពេជ្រ មានប្រសាសន៍ថា ៖ «ការឡើងថ្លៃរថយន្តក្រុង និងរថយន្តឈ្នួលបានធ្វើឱ្យមានការប៉ះពាល់ដល់អតិថិជនដែលមានគម្រោង ទៅលេងស្រុក ដោយសារគ្មានជម្រើសផ្សេងក្រៅពីនេះ ហើយនៅតែទទួលយកសេវានេះដដែល ។ លោកក៏បានជជែកជាមួយក្រុមហ៊ុនរថយន្តដើម្បីរក្សាតម្លៃដដែល ប៉ុន្តែក្រុមហ៊ុនលើកឡើងថា ក្នុងពេលបុណ្យទាន បុគ្គលិកក្រុមហ៊ុនសម្រាក និងពិបាករកអ្នកជំនួស ដែលជាមូលហេតុតម្រូវឱ្យមានការឡើងថ្លៃសំបុត្ររថយន្ត ដែលត្រូវយកលុយទាំងនេះមកបំពេញ និងលើកទឹកចិត្តចំពោះបុគ្គលិកដែលមិនបានឈប់ក្នុងពេលបុណ្យធំៗ ។
នៅថ្ងៃទី២២ កញ្ញា កន្លងមក សម្តេចតេជោ ហ៊ុន សែន បានអំពាវនាវទៅកាន់ក្រុមហ៊ុនរថយន្តក្រុង និងរថយន្តឈ្នួលថា កុំឲ្យដំឡើងថ្លៃពេលបុណ្យភ្ជុំ ប៉ុន្តែក្រុមហ៊ុនរថយន្តក្រុង និងរថយន្តឈ្នួលមួយចំនួននៅតែឡើងថ្លៃដដែល ។
លោក ចាន់ សុផល អ្នកវិភាគសេដ្ឋកិច្ចឯករាជ្យពន្យល់ថា ៖ «នៅប្រទេសកម្ពុជាមានលក្ខណៈពិសេសមួយដែលមានការធ្វើចំណាកស្រុក ច្រើនពីជនបទមកទីក្រុង ដើម្បីរកការងារធ្វើនៅតាមរោងចក្រ តាមការដ្ឋានសំណង់ និងសេវាកម្មផ្សេងៗដូចជា ភោជនីយដ្ឋាន កន្លែងជួសជុលរថយន្ត កន្លែងលាងរថយន្ត និងតាមផ្ទះជាដើម ហើយនៅពេលមានបុណ្យទានធំៗពួកគេត្រូវត្រឡប់ទៅស្រុកកំណើតវិញ និងត្រូវចំណាយលើមធ្យោបាយធ្វើដំណើរចាប់ពី១ទៅ១០០ដង ។ ក្នុងន័យនេះ កត្តាផ្គត់ផ្គង់ និងតម្រូវការមានការខុសគ្នាខ្លាំងបែបនេះ ដូច្នេះតម្លៃនេះហើយដែលត្រូវតែប្រែប្រួលក្នុងការបំពេញតម្រូវការ » ។
លោកបន្តថា នៅក្នុងសេដ្ឋកិច្ចទីផ្សារសេរី អ្នកលក់ និងអ្នកទិញ តែងតែចង់បានចំណេញរៀងៗខ្លួន ហើយរាជរដ្ឋាភិបាលមិនត្រូវលូកដៃក្នុងការកំណត់ថ្លៃទេ ទុកឲ្យមានការចរចា និងស្ម័គ្រចិត្តរៀងៗខ្លួន ដូច្នេះនៅពេលមានតម្រូវការកើនឡើងច្រើន ថ្លៃនៃទំនិញ និងសេវានឹងកើនឡើងដែរ ។ ប្រសិនជាការផ្គត់ផ្គង់នៅដដែល មានន័យថា នៅពេលមានការឡើងថ្លៃ ហើយនៅតែមានអ្នកជិះ ឬមានអ្នកស្ម័គ្រចិត្តដើម្បីឲ្យបានទៅមុនគេ ក៏មានអ្នកទិញដែរឲ្យតែឆាប់ទៅដល់ផ្ទះ ព្រោះចង់ឬមិនចង់ គេដឹកមិនអស់ទេ មានអ្នកទៅមុខទៅក្រោយ ដោយសារតម្រូវការកើនឡើងជាគំហុកតែម្តង ។ ទោះជាយ៉ាងណា ក៏នៅពេលមានក្រុមហ៊ុនមួយចំនួនមិនដំឡើងថ្លៃរថយន្តក្រុង និងរថយន្តឈ្នួលដែរ ដោយសារតម្លៃប្រេងធ្លាក់ចុះ និងចួលរួមដោះស្រាយបញ្ហាសង្គម ទោះបីជាត្រូវចេញខាតចំពោះបុគ្គលិកដែលធ្វើការក្នុងពេលឈប់សម្រាកក៏ ដោយ ។
ការមិនដំឡើងថ្លៃរថយន្តនេះ ដោយសារគោលការណ៍របស់ក្រុមហ៊ុន និងតម្លៃប្រេងនៅទាប ដែលយើងអាចធ្វើបាន ។ នេះជាការលើកឡើងរបស់លោក ប៉ោ វុទ្ធី អ្នកចាត់ការទូទៅនៃក្រុមហ៊ុនដឹកអ្នកដំណើរ ថោង ស៊ីង ដែលមានរថយន្តចំនួន៤៥គ្រឿង ។
ចំណែកលោក ពល ភក្តី ប្រធានប្រតិបត្តិ នៃថេរ៉ូអិុចប្រេស ដែលមានរថយន្ត៨គ្រឿង និងគម្រោងបន្ថែមរថយន្ត៤គ្រឿងទៀតនៅបុណ្យខាងមុខលើកឡើងថា ៖ «ការមិនដំឡើងថ្លៃនេះ មិនប៉ះពាល់ដល់ប្រាក់ចំណេញទេ ប៉ុន្តែគ្រាន់តែចំណេញតិច ហើយក៏ជាផ្នែកមួយក្នុងការជួយសង្គម ដែលក្រុមហ៊ុនរបស់គាត់តែងតែចូលរួមជាមួយការងារសង្គម ។ ការដំឡើងថ្លៃពេលបុណ្យក៏អាចជួយឱ្យពលរដ្ឋដែលមានចំណូលទាបអាចទៅ ស្រុកក្នុងពេលរដូវបុណ្យធំៗបាន» ។
ក្នុងការដោះស្រាយបញ្ហារថយន្តក្រុង និងរថយន្តឈ្នួលឡើងថ្លៃពេលមានបុណ្យធំៗនោះ លោក ហូ វណ្ឌី លើកឡើងថា ក្រសួងជំនាញអាចយកពន្ធពីកន្លែងនេះបាន ។នៅស្រុកគេមានដែរ គឺសណ្ឋាគារខ្លះគេលក់ឡើងថ្លៃពេលចុងសប្តាហ៍ ក៏ប៉ុន្តែនៅពេលលក់ឡើងថ្លៃចុងសប្តាហ៍ គេយកពន្ធថ្លៃដែរ ដែលនេះជាគោលនយោបាយបន្ថែមលើរឿងនេះ ។ លោក ហូ វណ្ឌី បញ្ជាក់ថា បើសិនជារាជរដ្ឋាភិបាលមានឆន្ទៈក្នុងការដោះស្រាយ វានឹងធ្វើបាន វាមិនមែនជាបញ្ហាចោទទេ ។ មួយទៀត ត្រូវរួមគ្នាធ្វើ កុំឲ្យរដ្ឋដាក់វិធានការ ឯកជនថាធ្វើមិនកើត ។
លោក ចាន់ សុផល មានប្រសាសន៍ថា ៖ «ប្រសិនបើរាជរដ្ឋាភិបាលចង់ជួយដល់ប្រជាពលរដ្ឋដោយយល់ថា មានការខាតបង់ច្រើន និងប៉ះទង្គិចខ្លាំងដល់ជីវភាពរបស់ពលរដ្ឋ ដោយសារឈ្នួលរថយន្តឡើងថ្លៃ ហើយចង់ជួយពួកគាត់មែន គឺមានតែចេញថ្លៃខាតដល់ពួកគាត់ បើមិនអីុចឹងទេ ត្រូវរករថយន្តផ្សេងៗមកបង្កើតតម្រូវការ ។ ឧទាហរណ៍ បើសិនជាមានរថយន្តរដ្ឋ រថយន្តកងទ័ពដែលទុកចោល អាចយកមកដឹកពលករ កម្មករ និងប្រជាពលរដ្ឋដែលទៅស្រុក គឺអាចជួយសម្រាលប្រជាពលរដ្ឋ ហើយដោយសារមិនមានតម្រូវការទៅមុខខ្លាំង ដូច្នេះឈ្នួលរថយន្តក៏មិនដំឡើងថ្លៃដែរ ៕
ចែករំលែកព័តមាននេះ