រាជធានីភ្នំពេញ ៖ ហ៊ុន ឈុនហេង មកពីក្លិបតាព្រហ្មមានជ័យបង្ក្រាបគ្រឿងញៀន និងសូត្រ ប៊ុនធី មកពីក្លិបបក្សីស្លាបដែកបានត្រៀមកណ្ដាប់ដៃស្វាគមន៍កីឡាករថៃនាថ្ងៃសៅរ៍ ទី១០ តុលា ខានស្អែកនេះ ក្នុងកម្មវិធីប្រកួតប្រដាល់ជាលក្ខណៈមិត្តភាពអន្តរជាតិនៅស្ថានីយទូរទស្សន៍ស៊ីធីអិន ។
ហ៊ុន ឈុនហេង ត្រូវជួបប្រកួតជាមួយកីឡាករថៃឈ្មោះលូកយ៉ត ស៊ីតផ្យាក់ ក្នុងប្រភេទទម្ងន់៦០គីឡូក្រាម ។ សម្រាប់ការប្រកួតលើកនេះលោកមាស សុខគ្រី ដែលជាគ្រូបង្ហាត់របស់ហ៊ុន ឈុនហេង មិនហ៊ានអះអាងទុកមុនពីលទ្ធផលចុងក្រោយថាយ៉ាងណានោះទេ គ្រាន់តែលោកប្រាប់ថាកូនសិស្សលោកមួយរយៈនេះប្រឹងប្រែងហ្វឹកហាត់ខ្លាំងណាស់ទើបលោកទុកចិត្តតែមិនដល់ថ្នាក់ទាំងស្រុងនោះទេ ។ តាមការសង្កេតការប្រកួតកន្លងមក ហ៊ុន ឈុនហេង មានល្បិចប្រយុទ្ធខ្ពស់ ផ្លែកែងនិងជង្គង់អាចប្រើការបានយ៉ាងស្ទាត់ជំនាញ ចិត្តក៏សឿង ឯចលនាវាយចេញក៏រហ័សរហួនទៀតផង។ លោកម៉ា សេរី អ្នកគ្រប់គ្រងកម្មវិធីប្រដាល់ប្រចាំស្ថានីយទូរទស្សន៍៍ស៊ីធីអិនប្រាប់ថា ដៃគូរបស់ហ៊ុន ឈុនហេង មិនមែនជាជើងអន់ទេសូមជ្រាប ។ កីឡាករថៃរូបនេះគឺជាជើងខ្លាំងមួយរូបដែលមានបទពិសោធន៍ប្រកួតនៅលើសង្វៀនយ៉ាងក្រាស់ក្រែល ។ ដូច្នេះសម្រាប់ការប្រកួតលើកនេះកីឡាករកម្ពុជាមិនអាចធ្វេសប្រហែសបានឡើយបើមិនដូច្នោះទេច្បាស់ជាស៊យធំមិនខាន ។
ចំណែកសូត្រ ប៊ុនធី ត្រូវជួបប្រកួតជាមួយកីឡាករថៃឈ្មោះភិតណយ ពៀកខាឃែរ ក្នុងប្រភេទទម្ងន់៦០គីឡូក្រាមដូចគ្នា ។ កីឡាករថៃរូបនេះធ្លាប់មកប្រកួតនៅស្រុកខ្មែរជាច្រើនលើករួចមកហើយ ប៉ុន្តែមិនដែលជួបសូត្រ ប៊ុនធី ម្ដងណាទេ ទើបគេពិបាកព្យាករណ៍ទុកមុនពីលទ្ធផលចុងក្រោយ ។ ម្យ៉ាងសូត្រ ប៊ុនធី មួយរយៈមកនេះបានបាត់មុខពីលើសង្វៀនទៀតផងមិនដឹងថាថ្វីដៃប្រកួតរបស់គេនៅខ្លាំងដូចមុនឬយ៉ាងណា ។ រីឯកីឡាករថៃមានផ្លែកែងនិងជង្គង់ល្អគ្រាន់បើ ចលនាវាយចេញក៏រហ័សកណ្ដាប់ដៃក៏ធ្ងន់ ដូច្នេះចាំមើលសូត្រ ប៊ុនធី អាចទៅរួចអត់ជាមួយកីឡាករថៃរូបនេះ?
ក្រៅពីគូអន្តរជាតិ២គូនេះទៅនៅមានការប្រកួតរវាងកីឡាករកម្ពុជានិងកម្ពុជាចំនួន៣គូទៀត ។ កីឡាករជ័យ ប៊ុនសង់ មកពីក្លិបគីសែមានរិទ្ធ ត្រូវប្រកួតជាមួយកីឡាករញ៉េ សិទ្ធ មកពីក្លិបកងពលតូចលេខ៧០ ។ កីឡាករវ៉ន សាវី មកពីក្លិបឃ្លាំងមឿងកីឡា ប្រកួតជាមួយកីឡាករហេង វិឆ័យ មកពីក្លិបកងពលតូចលេខ៧០ និងកីឡាករសំអឿន សុផា មកពីក្លិបសាលវ័ន្តកីឡា ប្រកួតជាមួយកីឡាករគុជ វាសនា មកពីក្លិបគជសារកីឡា ៕
ចែករំលែកព័តមាននេះ