ខេត្តសៀមរាប ៖ ក្រុមប្រជាពលរដ្ឋប្រមាណជាង៥០នាក់ មកពីភូមិពាក់ស្នែងថ្មី ឃុំពាក់ស្នែង ស្រុកអង្គរធំ កាលពីព្រឹកថ្ងៃទី៨ តុលា ២០១៥ នេះ បានលើកគ្នាមកតវ៉ាទាមទារឱ្យលោកអភិបាលខេត្ត ជួយអន្តរាគមន៍ដោះលែងស្ត្រីម្នាក់ ដែលត្រូវបានឃាត់ខ្លួនពាក់ព័ន្ធករណីកាប់រានដីព្រៃរបស់រដ្ឋ កាលពីថ្ងៃទី០៦ តុលា ស្ថិតនៅចំណុចភូមិឆ្កែកូន ឃុំពាក់ស្នែង ស្រុកអង្គរធំ ។
ប្រភពបានឱ្យដឹងថា ស្ត្រីដែលឃាត់ខ្លួនឈ្មោះកី ប៉ិប អាយុ៤៦ឆ្នាំ មានទីលំនៅភូមិសណ្តាន់ ឃុំពាក់ស្នែង ស្រុកអង្គរធំ ។ រហូតមកទល់ថ្ងៃទី០៨ តុលា នេះ អាជ្ញាធរខេត្តមិនទាន់មានវិធានការយ៉ាងណានោះទេ តែអាជ្ញាធរខេត្តបានហៅក្រុមអ្នកតវ៉ាទាំងនោះ ឱ្យចូលទៅពិភាក្សាគ្នានៅក្នុងរដ្ឋបាលសាលាខេត្តសៀមរាប ដើម្បីរកដំណោះស្រាយណាមួយសមរម្យជូនពួកគាត់ ។
គួរបញ្ជាក់ថា កាលពីថ្ងៃទី០៦ តុលា ២០១៥ នៅចំណុចភូមិឆ្កែកូន ឃុំពាក់ស្នែង ស្រុកអង្គរធំ កម្លាំងចម្រុះបានធ្វើការឃាត់ខ្លួនសកម្មជនដីធ្លីចំនួន២នាក់ ម្នាក់ឈ្មោះកី ប៉ិប អាយុ៤៦ឆ្នាំ មានទីលំនៅភូមិសណ្តាន់ ឃុំពាក់ស្នែង ស្រុកអង្គរធំ និងម្នាក់ទៀតឈ្មោះ ពុត កុស៊ាប ភេទប្រុស អាយុ២៧ឆ្នាំ មានស្រុកកំណើតនៅភូមិសាលារៀន ឃុំបាសាក់ ស្រុកស្វាយជ្រុំខេត្តស្វាយរៀង ។
ចែករំលែកព័តមាននេះ