រាជធានីភ្នំពេញ ៖ ចោរប្លន់ប្រដាប់អាវុធម្នាក់ក្នុងចំណោមបក្សពួក២នាក់ ដែលម្នាក់ទៀតបានរត់គេចខ្លួនបាត់ស្រមោល ត្រូវបានកម្លាំងសមត្ថកិច្ចប៉ុស្តិ៍រដ្ឋបាលនគរបាលស្ទឹងមានជ័យ ឃាត់ខ្លួនបានភ្លាមៗ បន្ទាប់ពីជនសង្ស័យ
រាជធានីភ្នំពេញ ៖ ចោរប្លន់ប្រដាប់អាវុធម្នាក់ក្នុងចំណោមបក្សពួក២នាក់ ដែលម្នាក់ទៀតបានរត់គេចខ្លួនបាត់ស្រមោល ត្រូវបានកម្លាំងសមត្ថកិច្ចប៉ុស្តិ៍រដ្ឋបាលនគរបាលស្ទឹងមានជ័យ ឃាត់ខ្លួនបានភ្លាមៗ បន្ទាប់ពីជនសង្ស័យ និងបក្សពួកធ្វើសកម្មភាពភ្ជង់ប្លន់ម៉ូតូមួយគ្រឿង ម៉ាកឌ្រីម ធុនសេ១២៥ ស៊េរីឆ្នាំ២០០៩ ពីបុរសជាអ្នករត់ម៉ូតូម្នាក់ ដោយប្រើកាំភ្លើងខ្លីម៉ាកកា៥៤ បានសម្រេចដោយសុវត្ថិភាព កាលពីវេលាម៉ោង៦និង១៥នាទីព្រឹកថ្ងៃទី៨ តុលា ២០១៥ នៅចំណុចផ្លូវទី១ ស្ថិតក្នុងក្រុមទី៦ ភូមិដំណាក់ធំ២ សង្កាត់ស្ទឹងមានជ័យ ខណ្ឌមានជ័យ ។ ជនសង្ស័យឈ្មោះ ផៃ វ៉ាន់ ភេទប្រុស អាយុ២៣ឆ្នាំ មុខរបរនិងទីលំនៅមិនពិតប្រាកដ ។
ចំណែកបុរសរងគ្រោះ ឈ្មោះ អ៊ុន ថាន់ ភេទប្រុស អាយុ២២ឆ្នាំ ជាអ្នករត់ម៉ូតូឌុប ស្នាក់នៅបន្ទប់ជួល សង្កាត់ទំពាំងថ្លឹង សង្កាត់ចោមចៅ បានរៀបរាប់ថា ដំបូងឡើយ រូបគាត់បានឌុបម៉ូយមកក្បែរកន្លែងកើតហេតុខាងលើ រួចក៏ធ្វើដំណើរត្រឡប់ទៅវិញ ខណៈមកដល់ចំណុចកើតហេតុដែលជាកន្លែងស្ងាត់ជ្រងំនោះ ស្រាប់តែឃើញ យុវជន២នាក់ជិះម៉ូតូ មួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០០៨ មកអែប ហើយយុវជនជិះខាងក្រោយបានលោតចុះពីលើម៉ូតូ រួចទាញកាំភ្លើងខ្លីម៉ាកកា៥៤ ចេញពីចង្កេះធ្វើសកម្មភាពភ្ជង់ប្លន់យកម៉ូតូរបស់គាត់តែម្តង ដោយគំរាមថា «បើហ៊ានស្រែកគេនឹងបាញ់សម្លាប់ចោល» ហើយក៏យកម៉ូតូរបស់គាត់ជិះរត់គេចខ្លួនទាំង២នាក់ ។
ក្រោយកើតហេតុភ្លាមៗ បុរសរងគ្រោះ បានស្រែកឡើងឆោរឡោឡើងបង្កការផ្អើលប្រជាពលរដ្ឋ និងក្រុមអ្នករត់ម៉ូតូឌុបនៅក្បែរនោះនាំគ្នាជិះម៉ូតូដេញតាមក្រុមចោររហូតចាប់បានជនសង្ស័យម្នាក់ ទប់កំហឹងមិនបានដោយស្អប់ចោរលួច ចោរប្លន់ផងនោះ ក៏ព្រួតគ្នាស្វាគមន៍មួយដៃមួយជើងសល់តែដង្ហើមចង្រិត ។
កម្លាំងនគរបាលប៉ុស្តិ៍រដ្ឋបាលស្ទឹងមានជ័យចុះអន្តរាគមន៍ដល់កន្លែងកើតហេតុ និងនាំខ្លួនមុខសញ្ញាភ្ជង់ប្លន់ប្រដាប់អាវុធម្នាក់នេះទៅប៉ុស្តិ៍នគរបាលដើម្បីសួរនាំ ។ ចំណែកបុរសរងគ្រោះក៏បានដាក់ពាក្យបណ្តឹងដល់សមត្ថកិច្ចដើម្បីឱ្យធ្វើការស្រាវជ្រាវវែកមុខបក្សពួកមកផ្តន្ទាទោសតាមច្បាប់ ៕
ចែករំលែកព័តមាននេះ