រាជធានីភ្នំពេញ ៖ មីក្រូហិរញ្ញវត្ថុកម្ពុជា តាំងពីដើមរៀងមកគឺផ្ដោតសំខាន់ទៅលើប្រជាកសិករក្នុងការផ្ដល់កម្ចីសម្រាប់ប្រកបរបរកសិកម្ម ការចិញ្ចឹមសត្វ និងការដាំដុះដំណាំផ្សេងៗ ហើយក្រៅពីនោះ មីក្រូហិរញ្ញវត្ថុក៏ផ្ដល់កម្ចីសម្រាប់ម្ចាស់អាជីវកម្មខ្នាតតូចៗមួយចំនួនផងដែរ តែសម្រាប់កម្ចីខ្នាតធំ មីក្រូហិរញ្ញវត្ថុកម្ពុជាមិនទាន់មានលទ្ធភាពនៅឡើយទេ ដូចជាកម្ចីសម្រាប់ទិញផ្ទះ និងអចលនទ្រព្យផ្សេងៗជាដើម។ ជាមួយគ្នានេះ វិស័យមីក្រូហិរញ្ញវត្ថុកម្ពុជា ក៏បាននិងកំពុងមានការរីកចម្រើនគួឲ្យកត់សម្គាល់ផងដែរក្នុងរយៈពេលប៉ុន្មានឆ្នាំចុងក្រោយនេះដែលអាចឆ្លុះបញ្ចាំងបានតាមរយៈការពង្រីកបណ្តាញប្រតិបត្តិការគ្របដណ្តប់នៅទូទាំងប្រទេស ។
តាមប្រសាសន៍ លោក ប៊ុន មុន្នី ប្រធានសមាគមមីក្រូហិរញ្ញវត្ថុកម្ពុជា និងជានាយកប្រតិបត្តិនៃមីក្រូហិរញ្ញវត្ថុស្ថាបនាលីមីតធីត បានមានប្រសាសន៍ថា ៖ « មីក្រូហិរញ្ញវត្ថុកម្ពុជាភាគច្រើនទាក់ទងនឹងវិស័យកសិកម្ម ដែលអតិថិជនរបស់យើងប្រមាណ៥០ទៅ៦០ភាគរយជាកសិករ ហើយក្រៅពីនោះ ទាក់ទងនឹងវិស័យជំនួញខ្នាតតូចនិងវិស័យសេវាកម្មផ្សេងៗទៀត » ។
នៅក្នុងវិស័យមីក្រូហិរញ្ញវត្ថុកម្ពុជា នៅមិនទាន់ឃើញមានមីក្រូហិរញ្ញវត្ថុណាមួយមានគោលការណ៍ផ្ដល់កម្ចីសម្រាប់ទិញផ្ទះ ឬអចលនទ្រព្យផ្សេងៗនៅឡើយទេ ស្របពេលវិស័យអចលនទ្រព្យនៅកម្ពុជាកំពុងស្ទុះងើបឡើងក្នុងរយៈពេលប៉ុន្មានឆ្នាំចុងក្រោយនេះ ។
ទាក់ទិននឹងបញ្ហានេះដែរ លោក ប៊ុន មុន្នី ប្រធានសមាគមមីក្រូហិរញ្ញវត្ថុកម្ពុជា បានលើកឡើងយ៉ាងដូច្នេះថា ៖ « យើងអត់មានសម្រាប់ជាកម្ចីទិញផ្ទះ ឬ អចលនទ្រព្យផ្សេងៗទេ ព្រោះមីក្រូហិរញ្ញវត្ថុយើងឲ្យតែសម្រាប់អាជីវកម្មខ្នាតតូចៗទេ ហើយយើងក៏អត់មានផែនការសម្រាប់ផ្ដល់កម្ចីទិញផ្ទះ ឬកម្ចីសម្រាប់វិស័យអចលន ទ្រព្យដែរ »។
លោកបញ្ជាក់ថា៖« តទៅមុខទៀត មីក្រូហិរញ្ញវត្ថុនឹងបង្កើតផលិតផលថ្មីៗថែមទៀត ដើម្បីបម្រើសេចក្តីត្រូវការរបស់ប្រជាពលរដ្ឋ ដូចជាយើងនឹងខិតខំឲ្យចេញអេធីអឹមខាត (ATM CARD) សម្រួលដល់ការប្រើប្រាស់ និងការផ្ទេរប្រាក់រហ័សជាដើម ជាពិសេសនោះ មីក្រូហិរញ្ញវត្ថុបានពង្រីកសាខារបស់ខ្លួនពាសពេញផ្ទៃប្រទេសបានផងដែរ » ។
លោក តាន់ យូហៃ ប្រធាននាយកដ្ឋានផ្នែកលក់ឥណទាននៃមីក្រូហិរញ្ញវត្ថុអម្រឹត ក៏បានមានប្រសាសន៍ដែរថា អតិថិជនឥណទានរបស់អម្រឹតភាគច្រើន ជាអ្នកនៅតាមជនបទ និងប្រកបរបរកសិកម្ម ហើយបើនៅទីក្រុងវិញ អម្រឹតបានផ្ដល់ឥណទានដល់អតិថិជនជំនួញមធ្យម ឬកណ្ដាល ដូចជាអាជីវករ និងសហគ្រាសខ្នាតតូច ប៉ុណ្ណោះ ។
លោកបញ្ជាក់ថា សព្វថ្ងៃនេះ អម្រឹតនៅតែដើរតួនាទីសំខាន់សម្រាប់ប្រជាជននៅតាមជនបទដដែល ហើយជាក់ស្ដែងពេលនេះ សាខារបស់មីក្រូហិរញ្ញវត្ថុនៅតាមជនបទច្រើនជាងនៅទីប្រជុំជន ដូចជាទីរួមខេត្ត និងទីក្រុងជាដើម ។
លោកមានប្រសាសន៍យ៉ាងដូច្នេះថា៖ «បេសកកម្មរបស់អម្រឹតធ្វើយ៉ាងម៉េច ដើម្បីបង្កើនកម្រិតជីវភាពប្រជាពលរដ្ឋនៅតាមទីជនបទតាមរយៈការផ្ដល់កម្ចី ហើយកម្ចីនោះអាចឲ្យគាត់បើកអាជីវកម្មថ្មី ឬមួយពង្រីកអាជីវកម្មរបស់គាត់ ។ ដូចយើងដឹងស្រាប់ហើយថា ប្រជាជនពិបាកយកលុយពីធនាគារ ឬពួកគាត់អត់សូវមានទម្លាប់ចូលធនាគារជាដើម ហើយម្យ៉ាងទៀត ធនាគារមួយចំនួន បើអតិថិជនខ្ចីតូចៗក៏គេអត់ឲ្យដែរ ហើយជាពិសេសធនាគារ គឺទាមទារឲ្យមានការដាក់បញ្ចាំប្លង់រឹង ។ សម្រាប់មីក្រូហិរញ្ញវត្ថុវិញ ដូចជាអម្រឹតជាដើម មិនតម្រូវការឲ្យមានប្លង់រឹងអីទេ គ្រាន់តែមានលិខិតបញ្ជាក់ពីអាជ្ញាធរមូលដ្ឋានបានហើយ ។ អ្វីដែលសំខាន់នោះ អតិថិជនអាចមកខ្ចីដល់កន្លែងក៏បាន ឬមន្ត្រីឥណទានចុះដល់ផ្ទះពួកគាត់ក៏បាន » ។
លោកបន្ថែមថា សព្វថ្ងៃនេះ មានមីក្រូហិរញ្ញវត្ថុតូចៗជាច្រើនបើកដំណើរការ តែវាមិនមែនជាការប្រកួតប្រជែងជាមួយមីក្រូហិរញ្ញវត្ថុធំៗនោះទេ ប៉ុន្តែមីក្រូហិរញ្ញវត្ថុតូចៗទាំងនោះនឹងរំខាន ឬធ្វើឲ្យខូចទីផ្សារជាដើម ព្រោះមីក្រូហិរញ្ញវត្ថុតូចៗមួយចំនួន ធ្វើហិរញ្ញវត្ថុដោយមិនមានវិជ្ជាជីវៈ តួយ៉ាងដូចជាអតិថិជនដែលខ្ចីប្រាក់ មិនមានគោលបំណងច្បាស់លាស់ ក៏ពួកគេឲ្យដែរ ។
បើតាមប្រសាសន៍លោកជំទាវ អ៊ុក ម៉ាលី ទេសាភិបាលរងធនាគារជាតិនៃកម្ពុជា បានឲ្យដឹងថា វិស័យមីក្រូហិរញ្ញវត្ថុបាននិងកំពុងពង្រីកបណ្តាញប្រតិបត្តិការគ្របដណ្តប់ទូទាំងប្រទេស ដែលក្នុងនោះការិយាល័យប្រតិបត្តិការថ្នាក់ស្រុកមានចំនួន២.៧២០ការិយាល័យ មានប៉ុស្តិ៍សេវានៅថ្នាក់ឃុំចំនួន១៨.០៨៦ និងនៅថ្នាក់ភូមិមានចំនួន១០៩.៧០០ប៉ុស្តិ៍សេវា ។
គួរបញ្ជាក់ថា គិតត្រឹមឆមាសទី១ ឆ្នាំ២០១៥ មីក្រូហិរញ្ញវត្ថុនៅក្នុងសមាគមមីក្រូហិរញ្ញវត្ថុកម្ពុជា ឥណទានដែលបានផ្ដល់ជូនអតិថិជនមានចំនួន២.៤៣៦លានដុល្លារអាមេរិក ខណៈនៅដំណាច់ឆ្នាំ២០១៤ មានចំនួន ២.០២៨លានដុល្លារអាមេរិក ។ ដោយឡែកប្រាក់បញ្ញើរបស់អតិថិជនមានចំនួន១.១២៣លានដុល្លារអាមេរិក ខណៈនៅដំណាច់ឆ្នាំ២០១៤ មានចំនួន៨៩៧លានដុល្លារអាមេរិក ។ នេះបើតាមរបាយការណ៍របស់សមាគមមីក្រូហិរញ្ញវត្ថុកម្ពុជា ៕
ចែករំលែកព័តមាននេះ