ជប៉ុន ៖ មន្ត្រីប៉ូលិសម្នាក់ដែលចូលរួមក្នុងពិធីរត់ភ្លើងគប់ព្រឹត្តិការណ៍កីឡាអូឡាំពិកទីក្រុងតូក្យូរបស់ជប៉ុន បានក្លាយជាអ្នកចូលរួមដំបូងគេសម្រាប់ព្រឹត្តិការណ៍ដ៏ធំនេះ ដែលត្រូវបានរកឃើញថា វិជ្ជមានវីរុសកូវីដ១៩ ។ នេះបើតាមការចេញផ្សាយពីសារព័ត៌មាន Reuters។ នៅក្នុងសេចក្តីថ្លែងការណ៍មួយបានឱ្យដឹងថា…
ជប៉ុន ៖ មន្ត្រីប៉ូលិសម្នាក់ដែលចូលរួមក្នុងពិធីរត់ភ្លើងគប់ព្រឹត្តិការណ៍កីឡាអូឡាំពិកទីក្រុងតូក្យូរបស់ជប៉ុន បានក្លាយជាអ្នកចូលរួមដំបូងគេសម្រាប់ព្រឹត្តិការណ៍ដ៏ធំនេះ ដែលត្រូវបានរកឃើញថា វិជ្ជមានវីរុសកូវីដ១៩ ។ នេះបើតាមការចេញផ្សាយពីសារព័ត៌មាន Reuters។
នៅក្នុងសេចក្តីថ្លែងការណ៍មួយបានឱ្យដឹងថា មន្ត្រីប៉ូលិសម្នាក់ដែលមានអាយុខ្ទង់៣០ឆ្នាំបានធ្វើតេស្តរកឃើញវិជ្ជមានកូវីដ បន្ទាប់ពីគាត់បានចូលរួមសម្រួលក្នុងពិធីរត់ភ្លើងគប់នៅក្នុងតំបន់ Kagawa លើកោះ Shikoku ភាគខាងត្បូងប្រទេសជប៉ុន។
បច្ចុប្បន្នអាជ្ញាធរសុខាភិបាលមូលដ្ឋានកំពុងស៊ើបអង្កេត និងបន្តតាមដានលើករណីនេះ។
នេះគឺជាការធ្វើតេស្តវិជ្ជមានលើកដំបូងចាប់តាំងពីកម្មវិធីរត់ភ្លើងគប់បានចាប់ផ្តើមកាលពីថ្ងៃទី២៥ ខែមីនា កន្លងទៅ ដែលរត់ចេញដំបូងពីមជ្ឈមណ្ឌលជាតិបណ្តុះបណ្តាល J-Village នៅក្នុងខេត្ត Fukushima។
យោងតាមទីភ្នាក់ងារសារព័ត៌មាន Asahi បានរាយការណ៍ដោយដកស្រង់សម្តីអ្នករៀបចំ និងប៉ូលិសប្រចាំតំបន់ថា មន្ត្រីរូបនេះកំពុងសម្រួលចរាចរណ៍កាលពីថ្ងៃសៅរ៍ និងបានធ្លាក់ខ្លួនឈឺ (ក្តៅខ្លួន) កាលពីថ្ងៃអាទិត្យ។ បើទោះបីជាប៉ូលិសរូបនោះបានពាក់ម៉ាស់ និងគោរពតាមវិធានគម្លាតសង្គម និងវិធានការផ្សេងៗយ៉ាងណាក៏ដោយ។
បច្ចុប្បន្នការគាំទ្រជាសាធារណៈសម្រាប់ព្រឹត្តិការណ៍កីឡាអូឡាំពិកទីក្រុងតូក្យូ បានថយចុះគួរឱ្យកត់សំគាល់ ចំពេលមានការព្រួយបារម្ភថាព្រឹត្តិការណ៍នេះ នឹងធ្វើឱ្យការឆ្លងរីករាលដាលកូវីដ១៩ កាន់តែធ្ងន់ធ្ងរក្នុងប្រទេសនេះ។
គូសបញ្ជាក់ថា ព្រឹត្តិការណ៍កីឡាអូឡាំពិកទីក្រុងតូក្យូនឹងចាប់ផ្តើមនាថ្ងៃទី ២៣ ខែ កក្កដា និងពិធីបិទនាថ្ងៃទី ៨ ខែ សីហា ឆ្នាំ ២០២១ ខាងមុខនេះ។ ស្របពេលដែលប្រទេសជប៉ុន មានករណីឆ្លងវីរុសកូវីដ១៩សរុបចំនួនជាង ៥៤ម៉ឺនករណី និងមានអ្នកស្លា.ប់សរុបចំនួន ៩,៧៦៤នាក់ គិតត្រឹមថ្ងៃទី២៣ ខែមេសា នេះ៕
ចែករំលែកព័តមាននេះ