ជំងឺរហែករន្ធទ្វារបាត ដែលអ្នកមិនគួរធ្វេសប្រហែសឡើយ ព្រោះឈានដល់ការវះកាត់!
- ភ្នំពេញ
រាជធានីភ្នំពេញ ៖ អ្វីទៅជាជំងឺរហែករន្ធទ្វារបាត? ជំងឺរហែករន្ធទ្វារបាត គឺជាជំងឺដែលមានការដាច់រលាត់បាត ដែលអាចជួបជាញឹកញាប់ដែរ ចំពោះបញ្ហាជំងឺនៅរន្ធទ្វារបាតធ្វើអោយអ្នកជំងឺមានការឈឺចាប់នៅបាត និងបន្ទោរបង់លាមកមានឈាម ។ នេះជាការលើកឡើងរបស់លោកវេជ្ជបណ្ឌិត ម៉ក់ សុភក្ដិ៍ ឯកទេស ថ្លើម ក្រពះ ពោះវៀននៃមន្ទីរពេទ្យកាល់ម៉ែត ។
លោកវេជ្ជបណ្ឌិត ម៉ក់ សុភក្ដិ៍ បានឲ្យដឹងទៀតថា ៖ ជំងឺនេះ អាចជួបប្រទះនៅលើមនុស្សគ្រប់ភេទ និងគ្រប់វ័យ ។ ជំងឺរហែករន្ធទ្វារបាត អាចជាជំងឺស្រួចស្រាវ ឬរ៉ាំរ៉ៃ។
មូលហេតុនៃជំងឺ?
ជំងឺនេះកើតមានឡើងដោយសារតែការប៉ះទង្គិចនៃដុំលាមក ទៅលើស្បែក នៃរន្ធបាត ដែលធ្វើអោយមានការដាច់រលាត់ ឬដោយការកន្ត្រាក់នៃសាច់ដុំរន្ធទ្វារបាតខ្លាំង ។ ជំងឺនេះ អាចមានចំពោះអ្នកជំងឺ ៖
- ទល់លាមក (លាមករឹងខ្លាំង)
- ការរាគរូសរ៉ាំរ៉ៃ
- ការប្រឹងបន្ទោរបង់លាមកខ្លាំង
- ក្រោយការសម្រាល
- ការរួមភេទតាមរន្ធទ្វារបាត។
រោគសញ្ញានៃជំងឺ?
អ្នកជំងឺអាចមានរោគសញ្ញាដូចជា ៖
- ឈឺនៅរន្ធទ្វារបាត ជាពិសេសនៅពេលបន្ទោរបង់លាមក
- មានឈាមជាប់លាមក ឬតក់ក្នុងចានបង្គន់
- ជួនមានសាច់នៅបាត ដែលអ្នកជំងឺច្រើនគិតថាជាជំងឺឫសដូងបាត នៅពេលដែលមានមេរោគនៅលើកន្លែងរហែកនោះ វាអាចធ្វើអោយកើតមានបូសអន្ទង់នៅរន្ធទ្វារបាត ដែលធ្វើអោយមានការជ្រាបសើមដោយខ្ទុះ និងរមាស់នៅបាត ។
វិធីសាស្ត្រក្នុងការព្យាបាល ?
មុននឹងព្យាបាល យើងត្រូវដឹងអំពីមូលហេតុ និងរយៈពេលនៃជំងឺនេះ ។ ការព្យាបាលមានដូចជា ៖
- ប្រើថ្នាំបន្ទន់លាមក បើអ្នកជំងឺពិបាកក្នុងការបន្ទោរបង់
- ប្រើថ្នាំបំបាត់រាគ បើអ្នកជំងឺមានការរាគរូសខ្លាំង
- ប្រើថ្នាំ Cream លាបទៅលើទ្វារបាត
- ប្រើថ្នាំបំបាត់ការឈឺចាប់
- ត្រាំទឹកក្តៅឧណ្ណៗអាចជួយកាត់បន្ថយការឈឺចាប់ ។
បើជំងឺនេះ វិវត្តទៅជារ៉ាំរ៉ៃ ឬមានមេរោគក្លាយនៅកន្លែងរហែកនោះ ការព្យាបាលដែលមានប្រសិទ្ធភាព គឺការវះកាត់យកផ្នែកដែលរហែកចេញ និងសំអាតនូវមេរោគនៅកន្លែងនោះ ។ ការប្រើថ្នាំផ្សះ (Antibiotic) តែមួយមុខ មិនមានប្រសិទ្ធភាពក្នុងការព្យាបាលទេ ។
លោកវេជ្ជបណ្ឌិត ម៉ក់ សុភក្ដិ៍ ឯកទេស ថ្លើម ក្រពះ ពោះវៀននៃមន្ទីរពេទ្យកាល់ម៉ែតបានរំលឹកថា ៖ ការបរិភោគបន្លែ ផ្លែឈើច្រើន អាចបង្ការនូវជំងឺរហែករន្ធទ្វារបាត។ ជំងឺនេះ អាចព្យាបាលជាសះស្បើយ បើការព្យាបាលនោះត្រឹមត្រូវតាមបច្ចេកទេស ។ សូមបងប្អូន ស្វែងរកជួបពិគ្រោះជាមួយគ្រូពេទ្យឯកទេសជំនាញ ដើម្បីទទួលបានការព្យាបាលមួយ ដែលមានប្រសិទ្ធភាព ៕
ចែករំលែកព័តមាននេះ