ខេត្តសៀមរាប៖ ថ្លែងក្នុងពិធីសំណេះសំណាលជាមួយអ្នកសារព័ត៌មានជិត ២០រូប មកពីជាង ១០ស្ថាប័ន នៅសាលាខេត្តសៀមរាប ក្នុងឱកាសផ្តល់គ្រឿងឧបភោគបរិភោគជូនអ្នកសារព័ត៌មាន កាលពីរសៀលថ្ងៃទី២១ ខែមេសា ឆ្នាំ២០២១…
ខេត្តសៀមរាប៖ ថ្លែងក្នុងពិធីសំណេះសំណាលជាមួយអ្នកសារព័ត៌មានជិត ២០រូប មកពីជាង ១០ស្ថាប័ន នៅសាលាខេត្តសៀមរាប ក្នុងឱកាសផ្តល់គ្រឿងឧបភោគបរិភោគជូនអ្នកសារព័ត៌មាន កាលពីរសៀលថ្ងៃទី២១ ខែមេសា ឆ្នាំ២០២១ លោក ពិន ប្រាកដ អភិបាលរងខេត្ត បានមាន ប្រសាសន៍ថា បងប្អូនអ្នកសារព័ត៌មានទាំងរដ្ឋ និងឯកជន ដែលពុំទាន់បានទទួលការចាក់វ៉ាក់សាំង (រាប់ទាំងគ្រួសារផង) ហើយបើស្ម័គ្រចិត្ត ចង់ចាក់ សូមរួសរាន់ទៅទទួលការចុះឈ្មោះ នៅមន្ទីរព័ត៌មានខេត្ត។
លោកអភិបាលរង បន្តថា ដោយឡែក សម្រាប់បងប្អូនអ្នកសារព័ត៌មាន ដែលកំពុងបំពេញភារកិច្ច ហើយជួបបញ្ហាពិបាក ក្នុងការចេញចូលក្នុងភូមិសាស្ត្រតំបន់បិទខ្ទប់ ដើម្បីការពារការឆ្លងជំងឺកូវីដ-១៩ នៅ ខេត្តសៀមរាប រដ្ឋបាលខេត្ត កំពុងសម្របសម្រួលធ្វើប័ណ្ណសម្គាល់ សម្រាប់ចេញចូល ក្នុងការចុះយកព័ត៌មាន ក្នុងតំបន់ទាំងនោះ ដោយរង់ចាំប្រមាណជា ២ ឬ ៣ថ្ងៃទៀត ទើបរួចរាល់។ ចំពោះ សម្ភារៈអំណោយដែលផ្តល់ជូននៅពេលនេះ ជាមួយគ្នានោះ លោក ពិន ប្រាកដ បានថ្លែងកោតសរសើរដល់បងប្អូនអ្នកសារព័ត៌មានគ្រប់អង្គភាពស្ថាប័ន ក្នុងខេត្តសៀមរាបថា កន្លងមក និងរហូតមកដល់ពេលនេះ បងប្អូនបានចូលរួមយ៉ាងសកម្ម ក្នុងការផលិតព័ត៌មាន ក្នុងនោះ បងប្អូនអ្នកសរព័ត៌មានមួយចំនួនធំ បានសហការល្អ ក្នុងការទំនាក់ទំនងជាមួយអាជ្ញាធរខេត្ត អង្គភាពមន្ទីរនានា បំរើឱ្យវិស័យព័ត៌មាន ក្នុងខេត្ត ប្រកបដោយក្រមសីលធម៌ និងវិជ្ជាជីវៈ ស្របទៅតាមបរិបទនៃការវីវត្តរីកចម្រើនផ្នែកប្រព័ន្ធព័ត៌មានវិទ្យា។
ក្នុងនាមអភិបាលនៃគណៈអភិបាលខេត្ត លោក ពិន ប្រាកដ មានប្រសាសន៍ថា គ្រឿងឧបភោគបរិភោគ ដែលផ្តល់ជូននៅពេលនេះ ថ្វីត្បិតតែមិនអាចឆ្លើយតបបានទៅនឹងតម្រូវការរបស់បងប្អូនបានក៏ពិតមែន តែនេះបង្ហាញនូវការគិតគូរយកចិត្តទុកដាក់របស់ថ្នាក់ដឹកនាំខេត្ត ចំពោះសុខទុក្ខ និងការលំបាករបស់បងប្អូនអ្នកសារព័ត៌មាន ក្នុងដំណាក់កាលវិបត្តិជំងឺកូវីដ-១៩ កំពុងឆ្លងរីករាលដាលជា សាកល។
លោកអភិបាលរងខេត្ត ក៏បានសុំការយោគយល់ និងអធ្យាស្រ័យពីសំណាក់បងប្អូនអ្នកសារព័ត៌មាននៃអង្គភាព ស្ថាប័នព័ត៌មានមួយចំនួនទៀត ដែលមិនទាន់បានទទួល សូមរង់ចាំនៅវគ្គបន្ទាប់ រដ្ឋបាលខេត្ត នឹងចាត់ចែងលៃលកជាជំហានៗ ទៅតាមលទ្ធភាព ដែលអាចធ្វើបាន។
សូមជំរាបថា រដ្ឋបាលខេត្តបានឧបត្ថម្ភដល់អ្នកសារព័ត៌មាន ចំនួន ១៩ នាក់ មកពីជាង ១០ អង្គភាពស្ថាប័ន ទាំងផ្នែករដ្ឋ និងឯកជន។ ក្នុងម្នាក់ៗ ទទួលបានអង្ករ ២០គ.ក្រ មី ១កេស ទឹកស៊ីអ៊ីវ ១យួរ ត្រីខ ១យួរ ម៉ាស់ ២ដុំ និងអាល់កុលផងដែរ៕ ដោយ៖ ច័ន្ទ រស្មី
ចែករំលែកព័តមាននេះ