បន្ទាយមានជ័យ៖ ប្រធានក្រុមប្រឹក្សាខេត្ត បាន​ដឹកនាំមន្ត្រី ចុះពិនិត្យស្ថានព្រំដែន ដើម្បីពង្រឹងការទប់ស្កាត់ពលករចំណាកស្រុក និងបទល្មើសតាមបន្ទាត់ព្រំដែន កាលពីថ្ងៃទី២០ ខែមេសា ឆ្នាំ២០២១ ក្នុងភូមិសាស្ត្រក្រុងប៉ោយប៉ែត។

ឯកឧត្តម ខេង ស៊ុម ប្រធានក្រុមប្រឹក្សាខេត្តបន្ទាយមានជ័យ បានលើកឡើងថា ជាការណែនាំពីឯកឧត្តម កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារថ្នាក់ជាតិចុះជួយមូលដ្ឋានខេត្តបន្ទាយមានជ័យ ក្រោយបុណ្យចូលឆ្នាំថ្មីប្រពៃណីយ៍ខ្មែររួចរាល់ រួមជាមួយឯកឧត្តម អ៊ុំ​ រាត្រី អភិបាលខេត្តបន្ទាយមានជ័យ និងមន្ត្រីក្រោមឱវាទ បានចុះពិនិត្យស្ថានភាពព្រំដែន ដើម្បីពង្រឹងការទប់ស្កាត់នូវ​ពលករចំណាកស្រុក ដែលលួចឆ្លងដែនខុសច្បាប់​គេចវេះធ្វើចត្តាឡីស័ក និងទប់ស្កាត់បទល្មើសឆ្លងដែន។

ឯកឧត្តម បានបញ្ជាក់ថា ក្រោយពេលដឹកនាំមន្ត្រីក្រោមឱវាទ​ចុះពិនិត្យតាមបន្ទាត់ព្រំដែនក្នុងភូមិសាស្ត្រ​ក្រុងប៉ោយប៉ែត ឃើញជាក់ស្តែងឃើញថា កម្លាំង ដែលកំពុងឈរ​ជើងតាមបន្ទាត់ព្រំដែន បានខិតខំប្រឹងប្រែងការពារទប់ស្កាត់​បានល្អ ហើយមានស្នាដៃ ដោយបង្ក្រាបឃាត់ខ្លួនមេខ្យល់ បញ្ជូនទៅ​ចាត់ការតាមច្បាប់ និងពលករ ត្រូវបានបញ្ជូនទៅដាក់មណ្ឌល​ធ្វើចត្តាឡីស័ករយៈពេល ១៤ថ្ងៃ។

ឯកឧត្តម ខេង ស៊ុម បានផ្តាំផ្ញើ និង​ណែនាំដល់កងកម្លាំង ត្រូវតែបន្ត​អនុវត្តអោយបានតាមការណែនាំរបស់រាជរដ្ឋាភិបាលកម្ពុជា និងក្រសួងសុខាភិបាលនូវ​វិធានការបង្ការទប់ស្កាត់ជំងឺកូវីដ១៩ ៣កាពារ ៣កុំ ដើម្បីបង្ការទប់ស្កាត់កូវីដ១៩ មិនអោយរាតត្បាតក្នុងសហគមន៍។

ឆ្លៀតក្នុងឱកាសនោះ ឯកឧត្តមប្រធានក្រុមប្រឹក្សាខេត្ត ​បាននាំយកអំណោយជូនដល់កងកម្លាំង ដែលកំពុង​អនុវត្តការងារ រួមមាន៖ កម្លាំងយោធា កងរាជអាវុធហត្ថ និងនគរបាល ទទួលបានមាន មី ទឹកបរិសុទ្ធ និង​ទឹកក្រូច៕ ដោយ៖ ប៊ុន ធឿន​