ខេត្តពោធិ៍សាត់ ៖ បន្ទាប់ពីចូលរួមកាន់បិណ្ឌវេនទី៩នៅវត្តហង្សាបីតិ ហៅវត្តព្រែកស្ដី កាលពីរសៀលថ្ងៃទី៦ តុលា ២០១៥ លោកជំទាវ ជា ខេង ស៊ុយ សែម បានអញ្ជើញទៅពិនិត្យមើលការសាងសង់ផ្ទះជូនលោកយាយ ភី ចាប អាយុ៨៩ឆ្នាំ រស់នៅភូមិបឹងចក ឃុំស្យា ស្រុកកណ្ដៀង ដែលលោកយាយជាទុរគតជនរស់នៅឯកោម្នាក់ឯងគ្មានទីពឹង ។ ដោយឃើញលោកយាយរស់នៅក្នុងខ្ទមលិចធ្លុះធ្លាយនោះ លោករដ្ឋមន្ត្រី ស៊ុយ សែម និងជំទាវ មានការខ្លោចចិត្តអាណិតយ៉ាងខ្លាំង ក៏បានសាងសង់ផ្ទះជូន និងឧបត្ថម្ភអង្ករ៥០គីឡូក្រាម ទឹកប្រាក់១០ម៉ឺនរៀលក្នុងមួយខែ ចាប់តាំងពីខែកក្កដា ឆ្នាំ២០១៥មក រហូតដល់ជីវិតចុងក្រោយរបស់លោកយាយ ។
ជាងសាងសង់ផ្ទះឲ្យដឹងថា ផ្ទះនេះធ្វើអំពីឥដ្ឋ មានទំហំ៦ម៉ែត្រគុណនឹង៦ម៉ែត្រ ចែកចេញជាបន្ទប់ដេកមួយ បន្ទប់ទឹកមួយ ផ្ទះបាយ កន្លែងទទួលភ្ញៀវ និងរានហាលពីមុខមួយសម្រាប់លោកយាយអង្គុយលេង ។ ផ្ទះនេះក្រាលការ៉ូ ប្រក់ក្បឿង ចាប់សាងសង់ពីដើមខែកញ្ញា ២០១៥មក ដែលមកដល់ពេលនេះសម្រេចបានប្រមាណ៦០%ហើយ ហើយនឹងបញ្ចប់នៅចុងខែវិច្ឆិកា ២០១៥ ខាងមុខ ។
លោកជំទាវ ជា ខេង ស៊ុយ សែម បានជំរុញឲ្យជាងជួយសាងសង់ផ្ទះឲ្យបានលឿនប្រកបដោយគុណភាព និងសោភ័ណភាព ដើម្បីឲ្យលោកយាយឆាប់បានស្នាក់នៅ ។ ទាក់ទិននឹងការជួយចិញ្ចឹមនិងសង់ផ្ទះជូនលោកយាយ ភី ចាប នៅភូមិបឹងចក ឃុំស្យា ស្រុកកណ្ដៀង នេះ លោកជំទាវឲ្យដឹងថា កាលពីខែមិថុនាកន្លងទៅថ្មីៗនេះ លោកជំទាវ និងលោករដ្ឋមន្ត្រី ស៊ុយ សែម បានរៀបចំអាហារជូនបងប្អូនប្រជាពលរដ្ឋជាង១០០០នាក់ហូបដោយក្ដីស្រឡាញ់រាប់អាន ក្នុងនាមជាអ្នកស្រុកកំណើតជាមួយគ្នា ។ ខណៈនោះលោកមេភូមិ និងអ្នកជិតខាងចង្អុលប្រាប់ថា លោកយាយ ភី ចាប មានអាយុ៨៩ឆ្នាំ រស់នៅម្នាក់ឯងក្នុងខ្ទមទុរគត ។ ពីមុនគាត់ដើរបោកខោអាវ និងកោសខ្យល់ឲ្យគេ ដើម្បីបានលុយយកមកទិញអង្ករហូប ប៉ុន្តែប៉ុន្មានឆ្នាំនេះលោកយាយមានសភាពទ្រុឌទ្រោមខ្លាំង មិនអាចបន្តមុខរបរនេះបានទៀតទេ គឺរស់បានដោយសារអ្នកជិតខាងជួយផ្ដល់បាយសម្លឲ្យ ។
ក្រោយពេលទទួលបានព័ត៌មាននេះ លោកជំទាវ និងលោករដ្ឋមន្ត្រី ស៊ុយ សែម បានទៅមើលឃើញជាក់ស្ដែង មានការអាណិតអាសូរប្រៀបដូចជាម្ដាយហើយនោះ ក៏ធ្វើផ្ទះជូន និងជួយចិញ្ចឹមអស់មួយជីវិតតែម្ដង ។ ក្រៅពីនាំយកអង្ករ៥០គីឡូក្រាម និងប្រាក់១០ម៉ឺនរៀលជូនលោកយាយ ភី ចាប សម្រាប់ខែតុលានេះ លោកជំទាវ ជា ខេង បានជូនយាយៗចំនួន៥នាក់ដែលនៅក្បែរៗនោះ ក្នុងម្នាក់ៗ២០.០០០រៀល សម្រាប់បុណ្យភ្ជុំបិណ្ឌ ។
នៅថ្ងៃដដែលនោះ លោកជំទាវ ជា ខេង ស៊ុយ សែម បានបន្តដំណើរទៅសួរសុខទុក្ខក្មួយៗ ដែលរស់នៅក្នុងមណ្ឌលកុមារកំព្រាពោធិ៍សាត់ចំនួន៣៥នាក់ និងអ្នកមើលថែ១២នាក់ទៀត ដោយបានជូននំសែនព្រះខែចំនួន២ ទឹកក្រូចមួយកំប៉ុង និងប្រាក់២០.០០០រៀលក្នុងម្នាក់ៗ ។
គួររំលឹកថា កាលពី២សប្ដាហ៍មុននេះ លោករដ្ឋមន្ត្រី ស៊ុយ សែម និងលោកជំទាវ ក៏បានធ្វើម្ហូបអាហារយកមកជូនកុមារកំព្រាក្នុងមណ្ឌលហូបផងដែរ ៕
ចែករំលែកព័តមាននេះ