ខេត្តព្រៃវែង ៖ រដ្ឋបាលខេត្តព្រៃវែង កាលពីល្ងាច ថ្ងៃទី២០ មេសា បានប្រកាសបិទឃុំពោធ៌ទី ក្នុងស្រុកស៊ីធរកណ្តាលជាបណ្តោះអាសន្ន រាប់ចាប់ពីម៉ោង០០ ថ្ងៃទី២១…
ខេត្តព្រៃវែង ៖ រដ្ឋបាលខេត្តព្រៃវែង កាលពីល្ងាច ថ្ងៃទី២០ មេសា បានប្រកាសបិទឃុំពោធ៌ទី ក្នុងស្រុកស៊ីធរកណ្តាលជាបណ្តោះអាសន្ន រាប់ចាប់ពីម៉ោង០០ ថ្ងៃទី២១ មេសានេះទៅ ដោយមិនអោយមានការធ្វើចរាចរណ៌ចេញចូលនោះទេ បន្ទាប់ពីបានរកឃើញមនុស្សប្រុសស្រីចំនួន៥នាក់ បានឆ្លងជម្ងឺកូវីដ១៩ ។
នៅក្នុងលិខិតរបស់រដ្ឋបាលខេត្តព្រៃវែង ឃុំពោធ៌ទី ត្រូវបានដាក់គោលដៅបិទផ្លូវចំនួន៣ទីតាំង ក្នុងនោះទី១ គឺនៅចំណុចផ្លូវក្រាលកៅស៊ូលេខ៣៨៥ ព្រំព្រទល់រវាងឃុំពោធ៌ទីស្រុកស៊ីធរកណ្តាល និងឃុំព្រៃព្នៅ ស្រុកពារាំង ។ ទី២ នៅចំណុចច្រមុះជ្រូក ព្រំព្រទល់រវាង ឃុំពោធ៌ទី និងឃុំព្រៃទឹង ស្រុកស៊ីធរកណ្តាល ។ និងទី៣ នៅចំណុចភូមិពោធ៌ទី ឃុំពោធ៌ទី និងឃុំឬស្សីសាញ់ ស្រុកស៊ីធរកណ្តាល ។ ហើយការបើកអោយដំណើរការឡើងវិញ រដ្ឋបាលខេត្ត និងជូនដំណឹងនៅពេលក្រោយ គឺនៅពេលដែលស្ថានភាពបានធូរស្រាលឡើងវិញ ។
ដោយឡែកនៅឯស្រុកពារាំងឯណោះវិញ នៅថ្ងៃទី២១ មេសា ក៏បានរកឃើញស្ត្រីម្នាក់ដែលជាកម្មការិនីរោងចក្រកាត់ដេរ នៅក្នុងតំបន់សេដ្ឋកិច្ចពិសេស 7NG បានឆ្លងជម្ងឺកូវីដ១៩ផងដែរ ហើយពាក់ពន្ធ័ជាមួយស្ត្រីម្នាក់នេះ គេបានរកឃើញមានអ្នកជាប់ពាក់ពន្ធ័ទាំងផ្ទាល់ និងប្រយោលសរុបចំនួន៩៣នាក់ ក្នុងនោះ៦៣នាក់ ដែលជាកម្មករកាត់ដេរជាមួយគ្នា ត្រូវបានប្រមូលយកដាក់ធ្វើចត្តាឡីស័កនៅតាមសាលារៀន និង៣០នាក់ទៀត ដែលជាសាច់ញាតិ និងអ្នកជិតខាងត្រូវបានដាក់អោយធ្វើចត្តាឡីស័កនៅតាមផ្ទះ ក្រោមការហ៊ុំពទ្ធ័ដោយសមត្ថកិច្ច ។
គួរបញ្ជាក់ផងដែរថា យោងតាមរបាយការណ៌របស់មន្ទីរសុខាភិបាលខេត្តព្រៃវែង គិតមកដល់ត្រឹមថ្ងៃទី២០ មេសា នៅទូទាំងខេត្តព្រៃវែង មានអ្នកជម្ងឺកូវីដ១៩សរុបចំនួន៨២នាក់ ក្នុងនោះបានព្យាបាលជាសះស្បើយចំនួន៥០នាក់ បញ្ជូនទៅរាជធានីភ្នំពេញ៣នាក់ ស្លាប់៣នាក់ លាប់ឡើងវិញ២នាក់ និងកំពុងសំរាកព្យាបាល២៨នាក់។ ចំណែកអ្នកកំពុងធ្វើចត្តាឡីស័កនៅទូទាំងខេត្តសរុបមានចំនួន៦៩០នាក់៕
ចែករំលែកព័តមាននេះ