សង្គ្រាមអ៊ុយក្រែន ៖ រុស្ស៊ីបានវាយប្រហារទ្រង់ទ្រាយធំ កាលពីយប់ថ្ងៃទី៨ មកទី៩ មករាលើអ៊ុយក្រែន ដែលអាជ្ញាធររាយការណ៍ពីមនុស្សស្លាប់យ៉ាងតិច៤នាក់នៅក្រុងគៀវ និងពីការវាយប្រហារដោយមីស៊ីលលឿនជាងសំឡេងនៅភាគខាងលិចអ៊ុយក្រែន ។ ប្រធានាធិបតីអ៊ុយក្រែន…
សង្គ្រាមអ៊ុយក្រែន ៖ រុស្ស៊ីបានវាយប្រហារទ្រង់ទ្រាយធំ កាលពីយប់ថ្ងៃទី៨ មកទី៩ មករាលើអ៊ុយក្រែន ដែលអាជ្ញាធររាយការណ៍ពីមនុស្សស្លាប់យ៉ាងតិច៤នាក់នៅក្រុងគៀវ និងពីការវាយប្រហារដោយមីស៊ីលលឿនជាងសំឡេងនៅភាគខាងលិចអ៊ុយក្រែន ។
ប្រធានាធិបតីអ៊ុយក្រែន លោកវ៉ូឡូឌីមៀរ ហ្សេឡេនស្គី បានព្រមានកាលពីយប់ថ្ងៃទី៨ មករា ពីគ្រោះថ្នាក់នៃការវាយប្រហារខ្លាំងក្លាក្នុងពេលដ៏ឆាប់ ក្រោយរុស្ស៊ីបដិសេធផែនការអឺរ៉ុបដាក់ពង្រាយកងកម្លាំងពហុជាតិនៅអ៊ុយក្រែន ក្រោយបញ្ចប់សង្គ្រាមជាយថាហេតុ ។
នៅក្រុងគៀវ អភិបាលក្រុងនេះ លោកវីតាលីគ្លីតស្កូ រៀបរាប់តាមតេឡេក្រាមពីអគាររស់នៅជាច្រើនរងការវាយប្រហារដោយដ្រូន ហើយមនុស្ស៤នាក់បានត្រូវស្លាប់ និង១០នាក់ទៀតរងរបួស ។ លោកក៏បញ្ជាក់ដែរ ពីបណ្ដាហេដ្ឋារចនាសម្ព័ន្ធរងការខូចខាត និងការដាច់ភ្លើង។ រុស្ស៊ីវាយប្រហារខ្លាំងក្លាលើក្រុងគៀវ ពិសេសដោយដ្រូនបំពាក់គ្រឿងផ្ទុះ ។
ក្នុងកម្រិតជាតិកងទ័ពអាកាសអ៊ុយក្រែន បានចេញការប្រកាសអាសន្នគ្រាប់មីស៊ីលទូទាំងប្រទេស ដោយលើកឡើងពីបណ្ដាមីស៊ីលបាលីស្ទិក បាញ់មកពីមូលដ្ឋានកាស្ពូទីនឡា ស្ថិតនៅចម្ងាយប្រមាណជា៤០០គីឡូម៉ែត្រពីព្រំដែនខាងកើតអ៊ុយក្រែន ។ នៅភាគខាងលិចប្រទេសទីក្រុង LVIV ជាកម្មវត្ថុនៃការវាយប្រហារនាពេលយប់ដោយគ្រាប់មីស៊ីល ។ រួចនៅក្រុងអានឌ្រីវសាដូវយីហេដ្ឋារចនាសម្ព័ន្ធមួយរងការប៉ះពាល់ ។
ការវាយប្រហារលើក្រុងLVIV ជាប់ព្រំដែនជាមួយប៉ូឡូញដោយមីស៊ីលលឿនជាងសំឡេង រត់ក្នុងល្បឿនដល់១៣.០០០គូឡូម៉ែត្រក្នុង១ម៉ោង ពេលដែលអាជ្ញាធរអ៊ុយក្រែនសង្ស័យពីការវាយប្រហារថ្មី ដោយមីស៊ីលលឿនជាងសំឡេងធុនORECHNIK ។ មីស៊ីលនោះ បើតាមលោកពូទីនថា អាចហោះហើរក្នុងល្បឿនដល់ជាង១២.០០០គីឡូម៉ែត្រក្នុង១ម៉ោង ។
បន្ទាប់់ពីកិច្ចព្រមព្រៀងរវាងអ៊ុយក្រែន និងបណ្ដាសម្ព័ន្ធមិត្តអឹរ៉ុប ដាក់ពង្រាយកងកម្លាំងពហុជាតិមួយនៅអ៊ុយក្រែនក្រោយចប់ជម្លោះ រុស្ស៊ីបានបរិហារកាលពីថ្ងៃទី៨ មករា ថា នោះជាគំំនិតយោធានិយមមួយ ហើយព្រមានថា រាល់វត្តមានយោធានបរទេសនៅប្រទេសនោះ នឹងចាត់ទុកជាគោលដៅវាយប្រហារដោយស្របច្បាប់ ។
ប្រតិកម្មដំបូងនោះរបស់រុស្ស៊ី តាំងពីមានកិច្ចប្រជុំកំពូលនៅក្រុងប៉ារីស កាលពីថ្ងៃទី៦ មករា រវាងក្រុងគៀវ និងបណ្ដាសម្ព័ន្ធមិត្ត លើការធានាសន្តិសុខអ៊ុយក្រែន ធ្វើឲ្យក្ដីសង្ឃឹមលើជោគជ័យនៃការខិតខំប្រឹងប្រែងខាងការទូតដែលកំពុងបង្កើនកាន់តែឃ្លាតឆ្ងាយ ។
អ្នកពាក្យក្រសួងការបរទេសរុស្ស៊ី លោកស្រីម៉ារីយ៉ា ហ្សាខារ៉ូវ៉ា គូសបញ្ជាក់ថា សេចក្ដីថ្លែងការណ៍ថ្មីមានចរិតយោធានិយមនៃរបស់ហៅថា ក្រុមចម្រុះអ្នកស្ម័គ្រចិត្តដែលមានជាពិសេស បណ្ដាប្រទេសនៅអឺរ៉ុប និងក្រុងគៀវ វាពិតជាអំពើនៃសង្ក្រាមមួយ។
ប្រទេស៤៥ ជាសមាជិកក្រុមចម្រុះអ្នកស្ម័គ្រចិត្ត ដែលមានប្រទេសអឹរ៉ុបភាគច្រើន បានព្រមព្រៀងគ្នាកាលពីថ្ងៃទី៦ មករា ដាក់ពង្រាយកងកម្លាំងពហុជាតិមួយនៅអ៊ុយក្រែន ហើយចូលរួមត្រួតពិនិត្យបទឈប់បាញ់គ្នា ក្រោមការនាំមុខរបស់អាមេរិក ក្រោយមានកិច្ចព្រមព្រៀងឈប់បាញ់គ្នាជាមួយរុស្ស៊ី ។
បារាំងនិងអង់គ្លេសបានចុះហត្ថលេខានាឱកាសនោះ លើសេចក្ដីថ្លែងការណ៍មួយដែលប្រាប់ទៅអ៊ុយក្រែនថា ពួកគេត្រៀមដាក់ពង្រាយកងទាហានបារាំងនិងអង់គ្លេស ដើម្បីថែរក្សាសន្តិភាពក្នុងករណីមានបទឈប់បាញ់គ្នា ៕
ចែករំលែកព័តមាននេះ