ជាងមួយឆ្នាំកន្លងទៅហើយ បានធ្វើឱ្យប្រជាជនអាមេរិករាប់លាននាក់ ស្ថិតក្នុងភាពតានតឹងនៃផ្នែកហិរញ្ញវត្ថុ ដោយសារតែពួកគេខ្លះបានបាត់បង់ការងារ និងអ្នកខ្លះទៀតត្រូវបានកាត់បន្ថយប្រាក់ខែ ព្រោះតែការរីករាលដាលនៃជំងឺ Covid-19 ហើយវាក៏បានបង្ហាញយ៉ាងច្បាស់ផងដែរថា ការសន្សំប្រាក់ទុកពិតជាមានសារៈសំខាន់ណាស់សម្រាប់យើងម្នាក់ៗ ដែលអាចពឹងពាក់លើប្រាក់សន្សំនេះ នាពេលណាមួយដែលយើងមិនអាចដឹងមុន ឬហេតុការណ៍ណាមួយដែលយើងមិនអាចនឹកស្មានដល់ ។ ក្រោយមានហេតុការណ៍នេះកើតឡើង មនុស្សជាច្រើនដែលកំពុងមានភាពតានតឹងផ្នែកហិរញ្ញវត្ថុនោះ បាននាំលើកជាសំណួរជាច្រើន អំពីរបៀបគ្រប់គ្រងលុយ និងការរៀបចំសម្រាប់ពេលអនាគតផងដែរ ។
ជាមួយគ្នានេះដែរ អ្នកជំនាញម្នាក់ លោកស្រី Lorna Kapusta ប្រធានផ្នែកស្ត្រី និងជាអ្នកទំនាក់ទំនងផ្ទាល់ជាមួយអតិថិជន នៅក្រុមហ៊ុនវិនិយោគ ហ្វីដិនមេន បានចែករំលែកសំណួរ ៣ ដែលអតិថិជនរបស់គាត់តែងតែសួរ ហើយនិងចំលើយដែលគាត់តែងតែឆ្លើយទៅអតិថិជនរបស់គាត់វិញផងដែរ ។
សំណួរទី ១ ៖ តើខ្ញុំគួរសន្សំប្រាក់សម្រាប់គ្រាបន្ទាន់ ឬគ្រាមានអាសន្ន (emergency savings) ប៉ុន្មាន ? លោកស្រី Kapustaបានឆ្លើយថា ច្បាប់ទូទៅគឺត្រូវសន្សំរយៈពេលពី ៣ ទៅ ៦ ខែ ក្នុងការសន្សំសម្រាប់គ្រាបន្ទាន់អាសន្ន ។ ត្រង់ចំណុចនេះ វាជាការសន្សំមានកាលកំណត់ មានន័យថា រយៈពេលប៉ុន្មានខែនឹង អ្នកមិនអាចដកប្រាក់សន្សំនោះបានទេ ។ លោកស្រីបន្ថែមថា ផែនការហិរញ្ញវត្ថុវាពិតសំខាន់ណាស់អ្នក និងតម្រូវការរបស់អ្នក ។ ហើយប្រសិនជាអ្នកមានលទ្ធភាព អ្នកគួរតែសន្សំប្រាក់បានកាន់តែច្រើនរឹតតែល្អ តួរយ៉ាងដូចព្រឹត្តិការនេះកើតឡើងអុីចឹង គ្មាននរណាម្នាក់ដឹងមុននោះទេ ដូចនេះអ្នកសន្សំបានកាន់តែច្រើននោះអ្នកក៏ទទួលបានវិញកាន់តែច្រើនផងដែរ ។ Kapusta មានប្រសាសន៍ថា ៖ «អ្វីដែលយើងតែងតែនិយាយ គឺក្តីបារម្ភដែលវាពិតជារំខានអារម្មណ៍របស់អ្នក ជាពិសេសវាធ្វើឱ្យអ្នកគេងមិនលក់ ព្រោះអ្នកខ្លះបារម្ភក្នុងកំឡុងពេលនេះ អ្នកមិនបានសន្សំប្រាក់សម្រាប់គ្រាអាសន្ន ហើយព្រឹត្តិការបានកើតឡើងយ៉ាងឆាប់រហ័ស ដែលវាបានធ្វើឱ្យអ្នកពិបាករកមធ្យោបាយក្នុងការដោះស្រាយបញ្ហាផ្នែកហិរញ្ញវត្ថុ» ។
សម្រាប់មនុស្សមួយចំនួនវិញ គាត់បានដាក់ប្រាក់សន្សំយូរហើយ និងច្រើនៗទៀត ដូចនេះពួកគាត់មានសាច់ប្រាក់គ្រប់គ្រាន់សម្រាប់ចំណាយ រហូតដល់មួយឆ្នាំឯនោះ ។ ប៉ុន្តែពេលខ្លះប្រសិនជាអ្នកមានសាច់ប្រាក់ច្រើនក្នុងគណនេយ្យ ក៏មិនគួរទុកច្រើនលើសលុបនោះទេ អ្នកអាចមានវិធីសាស្ត្រមួយទៀត ដោយប្រើប្រាស់សាច់ប្រាក់យ៉ាងសន្ធឹកសន្ធាប់នោះ យកទៅវិនិយោគក៏ជាវិធីល្អដែរ ព្រោះវាអាចជួយអ្នកចំណេញប្រាក់ច្រើនមកវិញ ។
សំណួរទី ២ ៖ តើខ្ញុំត្រូវធ្វើដូចម្តេច ដើម្បីសល់ប្រាក់ក្នុងការដាក់សន្សំបាន ? លោកស្រី Kapusta បានឆ្លើុយថា វាពិតជាងាយស្រួលណាស់ អ្នកប្រើក្បាច់នេះ ៥០-១៥-៥ អ្នកត្រូវបែងចែកប្រាក់ខែ ឬប្រាក់ចំណូលភ្លាមៗរាល់ពេលអ្នកទទួលបានវា (ពេលបើកប្រាក់ខែភ្លាម បែងចែកភ្លាម) ។ តោះខាងក្រោមនេះជាការបែងចែក ប្រាក់ចំណាយ និងប្រាក់សន្សំ ៖
-៥០% នៃប្រាក់ខែរបស់អ្នក គួរតែទៅចំណាយសំខាន់ៗ រួមមានថ្លៃផ្ទះ ស្បៀងអាហារ ការថែរក្សាសុខភាព ការទូទាត់បំណុល និងការថែទាំកុមារ (សម្រាប់អ្នកមានគ្រួសារនិងកូនៗ) ។ ត្រង់ចំណុចនេះ អ្នកអាចចំណាយ ៥០ភាគរយ សម្រាប់ប្រទេសទូទៅ ប៉ុន្តែសម្រាប់ប្រទេសជឿនលឿនខ្លាំង ឬសេដ្ឋកិច្ចខ្លាំងអាចត្រូវចំណាយលើសពី ៥០ភាគរយ តួរយ៉ាងដូចជាអ្នករស់នៅទីក្រុងថ្លៃៗ ដូចជាញូវយ៉ក សាន់ហ្វ្រាន់ស៊ីស្កូ ឬបូស្តុន ក្នុងប្រទេសសហរដ្ឋអាមេរិក គឺត្រូវចំណាយច្រើនជាងនេះ ។ (ដូចនេះអ្នកត្រូវបែងចែកប្រាក់ខែរបស់អ្នកទៅតាមស្ថានភាពគ្រួសារនិងប្រទេសរបស់អ្នក)
-១៥% នៃប្រាក់ខែរបស់អ្នក គួរតែដាក់ប្រាក់សន្សំសម្រាប់ការចូលនិវត្តន៍ ។ លោកស្រី Kapusta មានប្រសាសន៍ថា ៖ «ប្រសិនបើអ្នកធ្វើការឱ្យគេ នោះអ្នកត្រូវការប្រាក់សន្សំខ្លួនឯង សម្រាប់ពេលអ្នកចូលនិវត្តន៍» ។ មានក្រុមហ៊ុនខ្លះគេមានប្រាក់ខ្លះៗសម្រាប់អ្នកចូលនិវត្តន៍ ចុះបើអត់ ? ត្រង់ចំណុចនេះ យើងសូមបញ្ជាក់ថា មានប្រទេសខ្លះកាត់ប្រាក់ខែប្រជាជនដោយស្វ័យប្រវត្តិ (ប៉ុន្មានភាគរយអាស្រ័យលើរដ្ឋាភិបាលប្រទេសនីមួយៗ) ហើយគេនឹងផ្តល់ឱ្យប្រជាជនគេវិញ នៅពេលអ្នកនោះចូលនិវត្តន៍ ។ (គួរបញ្ជាក់ផងដែរថា រដ្ឋកាត់ប្រាក់ខែរបស់អ្នកគ្រប់គ្នាមានច្រើនប្រភេទ យើងសូមមិនបកស្រាយលំអិតនោះទេ ចំពោះបញ្ហានេះ) ។
-៥% នៃប្រាក់ខែរបស់អ្នក គួរតែដាក់ទៅក្នុងការសន្សំសម្រាប់គ្រាបន្ទាន់ឬគ្រាអាសន្ន ។ លោកស្រី Kapustaបាននិយាយថា ប្រសិនជាអ្នកបូកដកគុណចែក នោះប្រាក់ខែសរុបឬប្រាក់ចំណូលសរុបរបស់អ្នក នៅសល់ ៣០ភាគរយទៀត តើយើងគួរយកទៅធ្វើអ្វី ? ។ ៣០ភាគរយនោះអ្នកអាចយកទៅប្រើប្រាស់លើការចំណាយបន្ថែម ដូចជារបស់របរអ្វីមួយដែលអ្នកចង់បាន ។ល។ តែសូមធ្វើការចំណាយលើរបស់របរទាំងនេះដោយមានការគិតពិចារណាខ្ពស់ ឬអ្នកអាចសន្សំ ៣០ភាគរយនោះ នៅពេលអ្នកចង់បានរបស់សំខាន់ៗណាមួយ (យក ៣០ ភាគរយ សន្សំសម្រាប់គោលដៅរយៈពេលខ្លីរបស់អ្នក) ។
សំណួរទី ៣ ៖ តើខ្ញុំត្រូវធ្វើអ្វីជាមួយនឹងប្រាក់ដែលខ្ញុំរកក្រៅបាន ត្រូវដាក់ទៅក្នុងការចំណាយចាំបាច់ ឬក៏ដាក់ទៅក្នុងការសន្សំសម្រាប់ការចូលនិវត្តន៍ ?
លោកស្រី Kapusta បានឆ្លើយថា វាជាសំណួរដែលពិកបាកនឹងតម្រូវឱ្យធ្វើណាស់ ប៉ុន្តែអ្វីដែលលោកស្រីណែនាំ គឺប្រាក់ចំណូលបន្ថែម (រកក្រៅ) របស់អ្នក អ្នកត្រូវគិតទៅលើអ្វីដែលអ្នកចង់បានមុន ចាំបាច់មុន ។ អ្នកអាចគិតទៅលើគម្រោងណាមួយដែលអ្នកត្រូវមុនគេ នោះអ្នកអាចដាក់ទៅលើគម្រោងនោះមុន ជាអាទិភាព ។ ឧទារហណ៍ថា អ្នកមានគម្រោងទិញផ្ទះរយៈពេល ៥ឆ្នាំក្រោយ ឬរៀបអាពាហ៍ពិពាហ៍ និងការបង់សាលាឱ្យកូនរៀនមហាវិទ្យាល័យ ។ល។ ប៉ុន្តែអ្នកក៏អាចប្រើប្រាក់ចំណូលបន្ថែមនេះដើម្បីការកម្សាន្តរបស់អ្នកផងដែរ ៕ ប្រភព ៖ cnbc
ចែករំលែកព័តមាននេះ