ខេត្តបាត់ដំបង៖ ជនក្លែងបន្លំចំនួន០២នាក់ ដែលម្នាក់ពាក់ផ្កាយ៣យោធាសេះហោះ និងម្នាក់ទៀតជាអ្នកបើកបររថយន្ត ត្រូវបានកម្លាំងការិយាល័យជំនាញនៃបញ្ជាការកងរាជអាវុធហត្ថខេត្ធ្វើការឃាត់ខ្លួន កាលពីវេលាម៉ោង១និង៤៥នាទីរសៀលថ្ងៃទី២១ មេសា ខណៈលោកផ្កាយ៣សេះហោះរូបនេះ និង អ្នកបើកបររថយន្តរបស់ខ្លួនកំពុងស្នាក់នៅផ្ទះអនាគតឪពុកម្ដាយក្មេក…
ខេត្តបាត់ដំបង៖ ជនក្លែងបន្លំចំនួន០២នាក់ ដែលម្នាក់ពាក់ផ្កាយ៣យោធាសេះហោះ និងម្នាក់ទៀតជាអ្នកបើកបររថយន្ត ត្រូវបានកម្លាំងការិយាល័យជំនាញនៃបញ្ជាការកងរាជអាវុធហត្ថខេត្ធ្វើការឃាត់ខ្លួន កាលពីវេលាម៉ោង១និង៤៥នាទីរសៀលថ្ងៃទី២១ មេសា ខណៈលោកផ្កាយ៣សេះហោះរូបនេះ និង អ្នកបើកបររថយន្តរបស់ខ្លួនកំពុងស្នាក់នៅផ្ទះអនាគតឪពុកម្ដាយក្មេក ដែលស្ថិតនៅក្នុងភូមិស្ដៅ ឃុំបាយដំរាំ ស្រុកបាណន់ ។
លោក សូ ឌី ប្រធានមន្ទីរយុត្តិធម៌នៃបញ្ជាការដ្ឋានកងរាជអាវិធហត្ថខេត្តបានឲ្យដឹងថា ជនក្លែងបន្លំទាំង០២នាក់នោះ ម្នាក់ឈ្មោះ រស់ វណ្ណៈ អាយុ៣៣ឆ្នាំ មុខរបរមិនពិតប្រាកដ តែបានប្រើប្រាស់ឯកសណ្ឋានយោធា និងពាក់ផ្កាយ៣ក្លែងក្លាយ រស់នៅភូមិតាងួន សង្កាត់កាកាប ខណ្ឌពោធិសែនជ័យ រាជធានីភ្នំពេញ និងម្នាក់ទៀតឈ្មោះ រៃ វណ្ណសី អាយុ៤០ឆ្នាំ អ្នកបើកបររថយន្តឲ្យលោកផ្កាយ៣សេះហោះ រស់នៅភូមិវាល សង្កាត់គោកចក ក្រុង និង ខេត្តសៀមរាប។
លោក សូ ឌី បានប្រាប់ថា លោកផ្កាយ៣យោធាសេះហោះ និងតៃកុងឡានរបស់ខ្លួនទាំង០២នាក់ខាងលើនេះ ត្រូវកម្លាំងការិយាល័យជំនាញ ចុះទៅសួរនាំ ហើយធ្វើការឃាត់ខ្លួន ក្រោយពីគេបានឃើញសកម្មភាពមនុស្សនានារបស់ជននេះហាក់មិនប្រក្រតី នៅតាមមូលដ្ឋានក្នុងទឹកដីស្រុកបាណន់ នៅពេលជននេះបានស្នាក់នៅផ្ទះលោក រឿម រាំង អធិការរងស្រុកបាណន់ ម្ដងម្កាល។ ហើយជាមួយនឹងការឃាត់ខ្លួន មន្ត្រីជំនាញដកហូតបាននូវវត្ថុតាងមួយចំនួន ដែលភាគច្រើនវត្ថុតាងទាំងនោះ សុទ្ធតែជាការក្លែងបន្លំ។
ពាក់ព័ន្ធនឹងដំណើររឿងលោកផ្កាយ៣យោធាក្លែងក្លាយ ដែលបានមកស្នាក់នៅផ្ទះលោក រឿម រាំង អធិការរងស្រុកបាណន់ខាងលើនេះ បើតាមប្រភពព័ត៌មានដោយឡែកពីអាជ្ញាធរមូលដ្ឋាន បានឲ្យដឹងថា លោកផ្កាយ៣ សេះហោះ ឈ្មោះ រស់ វណ្ណៈ នេះ ទើបតែបញ្ចប់ពិធីភ្ជាប់ពាក្យជាមួយកូនស្រី លោក រឿម រាំង កាលពីជិត២សប្ដាហ៍មុននេះ ហើយគ្មាននរណាម្នាក់ បានស្គាល់ប្រវត្តិជននេះពិតប្រាកដទេ។ ពោល គឺអ្នកភូមិ និង លោករឿម រាំង ស្គាល់ជនក្លែងបន្លំនេះតាមរយៈមនុស្សមួយចំនួន ដែលស្គាល់ជននេះព្រាលៗដែរ។ ដូច្នេះហើយទើប គេឃើញលោកផ្កាយ៣ គ្មានអង្គភាព គ្មានស្ថាប័នរូបនេះ តែងចេញចូលស្នាក់នៅជាញឹកញ៉ាប់នៅផ្ទះអនាគត់លោកឪពុកក្មេកខាងលើ។
ប្រភពបានឲ្យដឹងទៀតថា សកម្មភាពចុងក្រោយដែលធ្វើឲ្យមហាជន និងអាជ្ញាធរមូលដ្ឋានមានការសង្ស័យថា នៅពេលលោកផ្កាយ៣ សេះហោះរូបនេះ បានយកខោអាវសម្រាប់បំពាក់ឲ្យកម្លាំង «ប្រជាការពារភូមិ» ចំនួនជាង៥០កំភ្លេ និង អាកូមចំនួន២២គ្រឿង យកមកប្រគល់ឲ្យអនាគត់ឪពុកក្មេក គឺលោក រឿម រាំង អធិការរងស្រុកបាណន់ ដែលលោកអធិការរងរូបនេះបានស្នើសុំ។ ការធ្វើអំណោយបែបមនុស្សធម៏នានា របស់លោកផ្កាយ៣ នេះហាក់ធ្វើឡើងយ៉ាងសោះកក្រោះ ដែលធ្វើឲ្យគេមានការសង្ស័យពីភាពមិនប្រក្រតី ជាមួយនឹងរថយន្តម៉ាកព្រូសស៊េរី២០០៥មួយគ្រឿង និង តៃកុងឡានរបស់ខ្លួនតែម្នាក់ប៉ុណ្ណោះ ដោយពុំមានមន្ត្រីតូចតាចដទៃទៀតហែរហមឡើយ។
ដោយឡែក ជុំវិញការពាក់ព័ន្ធរវាងលោកផ្កាយ៣សេះហោះ ជាមួយលោករឿម រាំង អធិការរងស្រុកបាណន់កោះសន្តិភាព មិនអាចស្វែងរកការទំនាក់ទំនង ដើម្បីសុំការបញ្ជាក់បន្ថែមពីលោក រឿម រាំង បានភ្លាមៗទេជុំវិញករណីនេះ នៅព្រឹកថ្ងៃទី ២២ មេសា នេះ។ ប៉ុន្តែបើតាមមន្ត្រីកងរាជអាវុធហត្ថ បានបញ្ជាក់ថា លោក រឿម រាំង ក៏ត្រូវបានអញ្ជើញឲ្យទៅបំភ្លឺផងដែរពាក់ព័ន្ធនឹងដំណើររឿងជនក្លែងបន្លំខាងលើនេះ។
យើងងាកមកស្ដាប់ចម្លើយលោកផ្កាយ៣ អត់ក្រិត្យវិញម្ដង បើតាមការស្រង់សំដីរបស់ជនក្លែងបន្លំនេះ បានសារភាពប្រាប់សមត្ថកិច្ចថា ខ្លួនពិតជាមានចេតនាប្រើប្រាសឯកសណ្ឋានយោធាដោយខុសច្បាប់មែន ហើយឯកសារនានា ដែលសមត្ថកិច្ចបានដកហូតក៏ខ្លួនបានធ្វើក្លែងបន្លំដែរ។ ជននេះបាននិយាយពីមូលហេតុដែលខ្លួនមានចេតនាធ្វើដូច្នេះថា « ខ្ញុំបានផ្ដើមគំនិតបែបនេះ ចាប់តាំងពីអំឡុងខែមករា ឆ្នាំ២០២០ រហូតមកដល់សព្វថ្ងៃនេះ។ ខ្ញុំធ្វើបែបនេះគឺដើម្បីបង្អូតគេ និង ដើរបោកប្រាសជនស៊ីវិល ឬ ដើរគស់រកផលប្រយោជន៏ពីមន្ត្រីយោធា ឬ ថ្នាក់ដឹកនាំយោធាមួយចំនួនដែលមានឋនៈតូចតាចជាងខ្លួន»។
លោក សូ ឌី ប្រធានមន្ទីរយុត្តិធម៌បាននិយាយថា លោកមេបញ្ជាការកងរាជអាវុធហត្ថខេត្ត និង លោកព្រះរាជអាជ្ញាអមសាលាដំបូងខេត្ត បានចេញបញ្ជាភ្លាមៗ ឲ្យកម្លាំងការិយាល័យជំនាញ ចុះស្រាវជ្រាវតាមឃាត់ខ្លួនជននេះ និង បក្សពួក ដើម្បីនាំយកមកសាកសួរ ក្រោយពីទទូលបានព័ត៏មានអំពីសកម្មភាពដ៏គួឲ្យសង្ស័យរបស់ជននេះ នៅក្នុងស្រុកបាណន់ ។ លោកបានប្រាប់ថា បើតាមចម្លើយរបស់ជននេះ គឺអ្នកចាញ់បោកជននេះភាគច្រើនជាមន្ត្រីៗ ដែលជននេះបានដើរគោះរកផលប្រយោជន៍ដោយអះអាងថា ខ្លួនជាអគ្គលេខាធិការរងក្រសួងការពារជាតិ តែបើជននេះទៅគោះមន្ត្រីស្ថាប័នស៊ីវិលជននេះអះអាងថា ខ្លួនជារដ្ឋលេខាធិការក្រសួងនេះ ក្រសួងនោះ តាមស្ថាប័នដែលខ្លួនបោកប្រាស់គេ ។
ប៉ុន្តែជាមួយនឹងការឃាត់ខ្លួនលោកផ្កាយ៣ អត់ក្រិត្យខាងលើនេះ បើតាមលោក សូ ឌី បានបញ្ជាក់ថា វត្ថុតាងជាច្រើនត្រូវបានដកហូត ក្នុងនោះមានទាំងឯកសណ្ឋានយោធា ឯកសារពាក់ព័ន្ធ តែសុទ្ធសឹងជាឯកសារក្លែងបន្លំទាំងអស់ សូម្បីតែរូបថតរបស់ជននេះ ដែលមានជាប់ជាមួយថ្នាក់ដឹកនាំយោធាកំពូលៗ ក៏ជារូបថតដែលជននេះបានកាត់តដែរ ។ ទោះជាយ៉ាងណា ពេលនេះ ត្រូវបានកម្លាំងការិយាល័យជំនាញ រៀបចំសំណុំរឿងបញ្ជូនទៅកាន់តុលាការហើយ ដើម្បីចាត់ការតាមផ្លូវច្បាប់។ ប៉ុន្តែបើតាមលោក សូ ឌី បានផ្ដល់ព័ត៌មានចុងក្រោយថា ដោយមានការឯកភាពពីតំណាងអយ្យការ អ្នកបើកបររងយន្តអ្នកបើកបររថយន្តត្រូវបានដោះលែងឲ្យត្រឡប់ទៅផ្ទះវិញ លើកលេងតែលោកផ្កាយ៣សេះហោះម្នាក់ប៉ុណ្ណោះ ដែលប្រឈមនឹងការជាប់គុក ៕
ចែករំលែកព័តមាននេះ