រាជធានីភ្នំពេញ ៖ មកទល់ពេលនេះ ជម្លោះរវាងកីឡាករល្បីឈ្មោះ ឡុង សុភី និងលោក នាង ស៊ីវត្ថា ជាអ្នករៀបចំការប្រដាល់ប្រចាំស្ថានីយទូរទស្សន៍បាយ័នកាន់តែឡើងកម្ដៅទ្វេដងបន្ទាប់ពីភាគីទាំងពីរប្រកាសជំហរមិនព្រមសម្រុះសម្រួលគ្នាបញ្ចប់រឿង ។ អ្នកទាំងពីរបានទាំងបញ្ចេញកំហឹងដាក់គ្នាពាក់ព័ន្ធនឹងរឿងចម្រូងចម្រាសមួយនេះទៀតផង ។
ក្នុងប៉ុន្មានថ្ងៃនេះ រឿងរ៉ាវបែកផ្សែងរវាងកីឡាករឡុង សុភី និងលោក នាង ស៊ីវត្ថា កាន់តែឡើងកម្តៅ ។ ភាគី ឡុង សុភី បានប្រកាសជំហរទាត់ចោលការប្រដាល់ដែលគ្រោងធ្វើឡើងនៅលើសង្វៀនទូរទស្សន៍បាយ័នក្នុងពេលដែលលោក នាង ស៊ីវត្ថា ក៏បានត្រៀមខ្លួនចាត់ការផ្លូវច្បាប់តបនឹង ឡុង សុភី ព្រមជាមួយការបោះសម្ដីថា ឡុង សុភី ជាកីឡាករភ្លេចធាតុដើម ។ ជម្លោះដែលបានកើតឡើងបណ្ដាលមកពីលោក នាង ស៊ីវត្ថា តម្រូវឲ្យ ឡុង សុភី ដែលជាម្ចាស់ខ្សែក្រវាត់ខារ៉ាបាវវគ្គ១ ឡើងប្រកួតការពារខ្សែក្រវាត់របស់ខ្លួនដោយទទួលបានតែតម្លៃខ្លួន១ពាន់ដុល្លារ ប្រសិនបើឈ្នះការប្រកួត។ ឡុង សុភី ប្រកាសមិនព្រមឡើងប្រកួតដាច់ខាត ព្រមជាមួយនឹងការចោទថានេះជាតម្លៃខ្លួនបន្ទាបបន្ថោកដែលកាន់តែធ្វើឲ្យកីឡាករនៅក្នុងប្រទេសកម្ពុជាទៅមុខមិនរួច ហើយឆ្លងមិនផុតពីភាពក្រីក្រ បើគ្មានកំណែទម្រង់ ។
គួរបញ្ជាក់ផងដែរថា កីឡាករឡុង សុភី គឺជាម្ចាស់ខ្សែក្រវាត់ខារ៉ាបាវជំនាន់ទី១ កាលពីថ្ងៃទី២១ មិថុនា ឆ្នាំ២០១៥ របស់ស្ថានីយទូរទស្សន៍បាយ័ន ។ ការប្រកួតនោះមានកីឡាករថៃ៤រូប និងកីឡាករកម្ពុជា៤រូប ចែកពូលគ្នាប្រកួតសន្សំពិន្ទុរហូតរកឃើញអ្នកខ្លាំងពីរនាក់ឡើងប្រកួតដណ្ដើមយកខ្សែក្រវាត់ ។ កីឡាករឡុង សុភី វាយកីឡាករជើងខ្លាំង កែវ រំចង់ ឲ្យសន្លប់ក្នុងទឹកទី៤ បន្ទាប់ពីឈ្នះកីឡាករថៃក្នុងវគ្គខ្វែងទើបទទួលបានខ្សែក្រវាត់ដ៏លំបាក និងទឹកប្រាក់៥ពាន់ដុល្លារ ។ ក្រោយបញ្ចប់កុងត្រាស៊ីប្រាក់ខែពីក្រុមហ៊ុនខារ៉ាបាវរយៈពេល៣ខែ ឡុង សុភី ត្រូវបានទូរទស្សន៍បាយ័នដាក់ថ្ងៃឲ្យឡើងប្រកួតការពារខ្សែក្រវាត់នៅថ្ងៃទី៨ ខែវិច្ឆិកាខាងមុខនៅស្ដាតអូឡាំពិក ។ កីឡាករថៃ Rareung Lukchampachai ដែលកាលពីវគ្គដណ្ដើមជើងឯកខារ៉ាបាវទទួលបានចំណាត់ថ្នាក់លេខ៣ នឹងត្រូវគេដាក់ឲ្យឡើងប្រកួតដណ្ដើមខ្សែក្រវាត់ជាមួយ ឡុង សុភី ។ ទោះជាយ៉ាងណា ហេតុផលយកលេខ៣ មកប្រកួតដណ្ដើមខ្សែក្រវាត់ពីលេខ១ មិនមែនជាបញ្ហាចោទនោះទេបើទោះជាមានការរិះគន់ ប៉ុន្តែអ្វីដែលបង្កឲ្យផ្ទុះចម្រូងចម្រាស គឺបញ្ហាតម្លៃខ្លួន ។
ឡុង សុភី និយាយថា ទោះជាមានវិធានការពីខាងអ្នករៀបចំកម្មវិធីបែបណា ក៏មិនព្រមទទួលយកការប្រកួតដែរ ដោយសារតែការផ្ដល់តម្លៃខ្លួន១ពាន់ដុល្លារ គឺជាអ្វីដែលលោកក្នុងនាមជាម្ចាស់ខ្សែក្រវាត់មួយរូបទទួលយកមិនបាន។ កីឡាករវ័យ២៧ឆ្នាំរូបនេះនិយាយថា ៖ «ការប្រកួតហ្នឹង វាអាក្រក់មើលតាំងពីយកលេខ៣ (កីឡាករថៃ) ឲ្យមកប្រកួតដណ្ដើម ប៉ុន្តែដែលខ្ញុំអន់ចិត្តបំផុត គឺគាត់ឱ្យតែ១ពាន់ដុល្លារបើខ្ញុំឈ្នះ និងឲ្យតែ៤០០ ឬ៤៥០ដុល្លារបើខ្ញុំចាញ់។ ការប្រកួតការពារខ្សែក្រវាត់បើគេធ្វើតែអញ្ចឹង តើឱ្យកីឡាករម្នាក់ៗអាចរស់បានទេ ព្រោះការប្រកួតអញ្ចឹងមិនមែនមានច្រើនដងឯណា!» ។ លោកថា អត់ឡើងប្រកួតដាច់ខាត បើទោះជាត្រូវបាត់បង់អាជីពដោយសារតែលោកនាង ស៊ីវត្ថា ប្រើឥទ្ធិពលបិទខ្លួនមិនឲ្យមានឱកាសឡើងប្រដាល់ក៏ដោយ ។
លោក នាង ស៊ីវត្ថា អ្នករៀបចំការប្រដាល់ប្រចាំព្រឹត្តិការណ៍នោះ បានថ្លែងប្រាប់ថា បើ ឡុង សុភី មិនព្រមឡើងប្រកួត នោះលោកនឹងប្រើវិធានការដោះស្រាយតាមរយៈសហព័ន្ធ ឬតាមផ្លូវច្បាប់ បើកម្មវិធីទាំងមូលត្រូវខូចដោយសារតែបង្ហាញរោងការទៅហើយ តែមិនមានកូនកំលោះ ។ លោកថា អត់មានវិធានការដំឡើងតម្លៃខ្លួនលើសពី១ពាន់ដុល្លារតាមការចង់បានរបស់ ឡុង សុភី នោះទេ ហើយក៏ទាមទារឲ្យឡុង សុភី ធ្វើលិខិតផ្លូវការពាក់ព័ន្ធនឹងជំហរមិនឡើងប្រកួតនេះដែរ ។ លោកមានប្រសាសន៍ថា ៖ «គាត់ទារដល់៥ពាន់ដុល្លារខាងណាគេមានលុយឲ្យ ! អត់អីទេបើគាត់អត់ឡើងប្រកួត ខ្ញុំមានវិធីរបស់ខ្ញុំ តែខ្ញុំអាចដូរគាត់ចោលក៏បានចាត់ទុកថាខ្សែក្រវាត់ខារ៉ាបាវវគ្គ១ហ្នឹងដូចបោះចោល ព្រោះមិនមែនមានតែ ឡុង សុភី ឯណា បើគាត់ភ្លេចធាតុដើមឲ្យគាត់ធ្វើទៅ ខ្ញុំក៏មានមធ្យោបាយរបស់ខ្ញុំដែរ!»។ លោកមិនទាន់ច្បាស់ថា នឹងត្រូវចាត់ការឡុង សុភី ដោយមធ្យោបាយផ្លូវច្បាប់ ឬធីបកីឡាកររូបនេះចេញពីស្ថាប័នបាយ័ននៅឡើយទេ ដោយគ្រាន់តែអះអាងវិធានការតតាំងគឺមានដូចគ្នាបើ ឡុង សុភី ធ្វើឲ្យលោកឈឺក្បាល ។
ឡុង សុភី អះអាងថា មិនខ្លាចបាត់បង់អាជីពឬបាត់បង់ការប្រដាល់នៅក្នុងស្ថាប័នទូរទស្សន៍បាយ័នទេ បើការប្រដាល់ដែលគ្រោងតម្រូវឲ្យលោកឡើងការពារខ្សែក្រវាត់មួយនេះ កំណត់តម្លៃខ្លួនដោយការបន្ទាបបន្ថោកបែបនេះ។ លោកថា លោកមិនបានទាមទារឲ្យផ្ដល់តម្លៃកីឡាករដល់រាប់រយរាប់ពាន់ដុល្លារដូចករណី វង្ស ណយ កាលពីមុននោះទេ គឺគ្រាន់តែសុំឲ្យមន្ត្រីថ្នាក់លើគិតគូរឡើងវិញថា ការប្រកួតការពារខ្សែក្រវាត់ដែលហ៊ានចំណាយធ្វើឡើងដល់ទៅស្ដាតអូឡាំពិករបស់ទូរទស្សន៍បាយ័ន គួរនឹងផ្ដល់១ពាន់ដុល្លារឲ្យអ្នកឈ្នះសមឬមិនសមប៉ុណ្ណោះ ។ លោកថា កីឡាករកម្ពុជាមិនអាចទៅមុខបានទេ បើការរីកចម្រើនទៅរួចតែលើមន្ត្រីជាអ្នករៀបចំ ចំណែកឯកីឡាករនៅតែគ្មានការលើកកម្ពស់ ។ លោកនិយាយដោយសឿងថា ៖ «ខ្ញុំជឿថា អ្នកស្ពុនស័រមិនអត់ទេត្រឹម៤-៥ពាន់ដុល្លារសម្រាប់ឲ្យកីឡាករកម្ពុជាក្នុងការប្រកួតបែបហ្នឹង ប៉ុន្តែមកពីគេមិនឲ្យតែម្ដង! ដើរសួរគ្រប់ប្រទេសទៅ តើអ្នកណាឡើងប្រកួតការពារខ្សែក្រវាត់បានប្រាក់១ពាន់ដុល្លារដូចខ្ញុំ ! ខ្ញុំអត់ឡើងប្រកួតទេ គាត់ (នាង ស៊ីវត្ថា) យកទៅណាទៅទៅ!» ។
ជម្លោះលើបញ្ហានេះត្រូវបានមហាជនយល់ថា កើតឡើងដោយសារបញ្ហាតម្លៃខ្លួន មិនមានតុល្យភាពនឹងការរីកចម្រើននៅក្នុងវិស័យប្រដាល់នាពេលចុងក្រោយ ។ នេះជាករណីវិវាទរបស់កីឡាករ និងអ្នករៀបចំការប្រដាល់នៅក្នុងស្ថាប័នមួយដែលខាងមន្ត្រីពាក់ព័ន្ធមិនអាចប្រើមធ្យោបាយដាក់សម្ពាធកីឡាករដូចអ្វីដែលធ្វើឡើងទៀតទេ ។ អ្នកឃ្លាំមើលជាច្រើនកំពុងចាំមើល តើសហព័ន្ធប្រដាល់នឹងផ្ដល់ដំណោះស្រាយជួយដល់ភាគីណាមួយចំពោះករណីនេះ។ ឡុង សុភី និយាយថា បើត្រូវគេផ្អាកការផ្គូផ្គងដើម្បីដាក់សម្ពាធចំពោះការតបតបន្ទាប់ពីមានរឿងនេះជាមួយលោក នាង ស៊ីវត្ថា នោះលោកក៏សុខចិត្តទទួលដែរ ។ អ្នកតាមដានសាច់រឿងនេះ លើកឡើងថា បើខាងសហព័ន្ធពិតជាបំបាត់សំឡេង ឡុង សុភី នៅលើសង្វៀនប្រដាល់នៅតាមប៉ុស្ដិ៍ផ្សេងពិតមែន ការរិះគន់ចំពោះចំណាត់ការរបស់សហព័ន្ធប្រដាល់ពិតជាត្រូវសាយភាយ ដោយសារតែនោះគឺមិនខុសពីការដាក់សម្ពាធមិនឲ្យកីឡាករមានសិទ្ធិបញ្ចេញមតិ ឬតវ៉ាចំពោះអ្វីមួយដែលពួកគេយល់ថាមិនសមហេតុផល ។ មន្ត្រីសហព័ន្ធត្រូវគេមើលឃើញថា គឺជាភាគីទទួលខុសត្រូវធំបំផុតដែលត្រូវដោះស្រាយបញ្ហានេះដើម្បីលើកកម្ពស់ដល់តម្លៃកីឡាករ និងពង្រីកវិស័យប្រដាល់ឲ្យមាននិរន្តរភាពពិតប្រាកដ ។
លោក តែម ម៉ឺន ប្រធានសហព័ន្ធប្រដាល់នៅមិនទាន់សុំការស្រាបបំភ្លឺចំពោះជម្លោះនេះនៅឡើយទេ ប៉ុន្តែលោកធា្លប់អះអាងថា តម្លៃខ្លួនកីឡាករកម្ពុជាមិនអាចប្រៀបប្រដូចកីឡាករបរទេសបានទេ ដោយសារតែស្ថានភាពចំណូលពីអ្នកឧបត្ថម្ភមិនដូចគ្នា ។ យ៉ាងណាក៏ដោយកីឡាករភាគច្រើន និងអ្នកតាមដានអះអាងថា
សហព័ន្ធប្រដាល់ និងអ្នករៀបចំប្រចាំប៉ុស្ដិ៍ទូរទស្សន៍នឹងមានលទ្ធភាពដោះស្រាយលើកង្វល់ទាំងនេះរបស់កីឡាករ ប្រសិនបើពិតជាមានចេតនាចង់ដោះស្រាយលើបញ្ហានេះដើម្បីឲ្យកីឡាករទទួលយកបាន ៕
ចែករំលែកព័តមាននេះ