រាជធានីភ្នំពេញ ៖ គណៈសង្ឃនាយកនៃព្រះរាជាណាចក្រកម្ពុជាបានធ្វើការអំពាវនាវដល់ខេមរជនគ្រប់រូបទាំងបុព្វជិត និងគ្រហស្ថ ចូលរួមបុណ្យផ្កាប្រាក់មហាសាមគ្គី ដែលបានប្រព្រឹត្តទៅនៅថ្ងៃទី១៧ តុលា
រាជធានីភ្នំពេញ ៖ គណៈសង្ឃនាយកនៃព្រះរាជាណាចក្រកម្ពុជាបានធ្វើការអំពាវនាវដល់ខេមរជនគ្រប់រូបទាំងបុព្វជិត និងគ្រហស្ថ ចូលរួមបុណ្យផ្កាប្រាក់មហាសាមគ្គី ដែលបានប្រព្រឹត្តទៅនៅថ្ងៃទី១៧ តុលា ២០១៥ នៅសាលាឆាន់ វត្តបទុមវតី សង្កាត់ចតុមុខ ខណ្ឌដូនពេញ ដើម្បីប្រមូលបច្ច័យឧបត្ថម្ភកម្មវិធីបុណ្យសូត្រស្វាធ្យាយគម្ពីរព្រះត្រៃបិដក អន្តរជាតិលើកទី១១ ដែលបានប្រព្រឹត្តទៅនៅភូមិពុទ្ធគយា ឃុំពុទ្ធគយា ស្រុកគយា រដ្ឋប៊ីហា ប្រទេសឥណ្ឌា។
ការអំពាវនេះបានធ្វើឡើងនៅក្នុងសន្និសីទកាសែតមួយកាលពីព្រឹកថ្ងៃទី៦ តុលា ២០១៥ នៅសាលាគណៈរាជធានីភ្នំពេញ ដែលស្ថិតនៅក្នុងវត្តបទុមវត្តី ស្តីពីពិធីបុណ្យសូត្រស្វាធ្យាយគម្ពីរព្រះត្រៃបិដក អន្តរជាតិលើកទី១១ និងជាលើកទី២ដែលព្រះរាជាណាចក្រកម្ពុជាត្រូវបានជ្រើសរើសជាប្រធានគណៈកម្មការនៃការរៀបចំនូវកម្មវិធីបុណ្យនេះ។
ព្រះទេវសត្ថា ពឿយ មេត្តា រាជាគណៈថ្នាក់កិត្តិយសប្រធានសមាគមសមណនិស្សិតកម្ពុជា ឥណ្ឌា និងជាចៅអធិការវត្តខ្មែរទាំង៨នៅដែនដីពុទ្ធភូមិ ប្រទេសឥណ្ឌា និងប្រទេសនេប៉ាល់ និងជាតំណាងគណៈសង្ឃនាយកនៃព្រះរាជាណាចក្រកម្ពុជា បានមានថេរដីកាក្នុងសន្និសីទកាសែតឱ្យដឹងថា ពិធីបុណ្យសូត្រស្វាធ្យាយគម្ពីរព្រះត្រៃបិដក អន្តរជាតិ បុព្វបុរសបានរៀបចំឡើងលើកទី១ ខណៈពេលដែលព្រះសម្មាសម្ពុទ្ធចូលព្រះរាជនិព្វានបាន៣ខែ , លើកទី២បាន១០០ឆ្នាំ , លើកទី៣ បាន២១៨ឆ្នាំ, លើកទី៤ បាន២២១ឆ្នាំ និងលើកទី៥ពេលដែលព្រះសម្មាសម្ពុទ្ធចូលព្រះរាជនិព្វានបាន៤៥០ឆ្នាំ ហើយរហូតមកដល់សម័យនេះទើបចាប់ផ្តើមឆ្នាំ២០០៥រហូតដល់ឆ្នាំ២០១៣ព្រះសង្ឃកម្ពុជាគ្រាន់តែជាសមាជិកតែប៉ុណ្ណោះ ហើយនៅឆ្នាំ២០១៤ និង២០១៥ គណៈសង្ឃកម្ពុជាបានធ្វើជាម្ចាស់ផ្ទះរៀបចំកម្មវិធីបុណ្យនេះដែលក្នុង១ឆ្នាំចំណាយអស់២៥ម៉ឺនដុល្លារ។
ព្រះទេវសត្ថា ពឿយ មេត្តា មានថេរដីកាឱ្យដឹងទៀតថា ពិធីបុណ្យនេះមានសារសំខាន់ណាស់សម្រាប់ប្រទេសជាតិកម្ពុជាយើងក្នុងការបង្ហាញមុខមាត់លើឆាកអ្នកកាន់ព្រះពុទ្ធសាសនាអន្តរជាតិ និងឱ្យគេស្គាល់កម្ពុជាកាន់តែច្បាស់។ ម្យ៉ាងទៀតវាជាតិត្តិយសណាស់សម្រាប់គណៈសង្ឃកម្ពុជាដែលបានធ្វើជាម្ចាស់ផ្ទះ និងប្រធានដឹកនាំកម្មវិធីបុណ្យក្នុងចំណោមគណៈសង្ឃពុទ្ធសាសនាទាំង១៣ប្រទេស ។
កម្មវិធីបុណ្យនេះប្រព្រឹត្តទៅចាប់ពីថ្ងៃទី២ ដល់ថ្ងៃ១៣ ធ្នូ ២០១៥ នៅដែនដីពុទ្ធភូមិប្រទេសឥណ្ឌា ដោយមានព្រះសង្ឃ និងពុទ្ធបិរស័ទអ្នកកាន់ពុទ្ធសាសនាថេរវាទចំនួន១៣ប្រទេស ដោយមានសមាជិកចូលរួមប្រមាណជាង២០ម៉ឺនអង្គ និងនាក់។
ដើម្បីប្រមូលបច្ច័យក្នុងការចំណាយចាត់ចែងក្នុងកម្មវិធីបុណ្យសូត្រស្វាធ្យាយគម្ពីរព្រះត្រៃបិដក អន្តរជាតិលើកទី១១នេះគណៈសង្ឃព្រះពុទ្ធសាសនាកម្ពុជាក៏បានធ្វើពិធីបុណ្យផ្កាប្រាក់មហាសាមគ្គីមួយនៅរសៀលថ្ងៃទី១៧ តុលា នៅវត្តបទុមវត្តី។
ក្នុងនាមគណៈសង្ឃ ព្រះទេវសត្ថា ពឿយ មេត្តា រាជាគណៈថ្នាក់កិត្តិយស ក៏បានអំពាវនាវដល់ពុទ្ធបរិស័ទទូទាំងព្រះរាជាណាចក្រកម្ពុជា និងខេមរជន ទាំងក្នុង និងក្រៅប្រទេសមេត្តាចូលរួមចាប់មគ្គផលយកផល្លានិសង្ឃ និងអនុមោទនាក្នុងការឧបត្ថម្ភ ពីធីបុណ្យសូត្រស្វាធ្យាយគម្ពីរព្រះត្រៃបិដក អន្តរជាតិនេះក្នុងនាមជាម្ចាស់បុណ្យទាំងអស់គ្នា ៕
ចែករំលែកព័តមាននេះ