យុវជនវ័យក្មេងម្នាក់កំពុងនិយាយបណ្តើរ ញញឹមបណ្តើរ បានរៀបរាប់ពីទំនុកចិត្តរបស់ខ្លួនក្នុងការបោះបង់ការងារ មកបង្កើតជំនួញផ្ទាល់ខ្លួនក្នុងវិស័យគ្រប់គ្រងធនធានមនុស្សដែលកំពុងដំណើរការក្នុងពេលបច្ចុប្បន្ន ។
លោក សោម សុធា ជាស្ថាបនិកក្រុមហ៊ុន CVer Agency ដែលទើបនឹងបង្កើតឡើងកាលពីខែកញ្ញាកន្លងទៅនេះ និងជាយុវជនម្នាក់ដែលបានសម្រេចចិត្តចាកចេញពីភាពជានិយោជិតទៅជាអ្នកបង្កើតការងារសម្រាប់ខ្លួនឯង និងយុវជនផ្សេងទៀត ។
លោកសុធា មានស្រុកកំណើតនៅក្នុងភូមិសួនថ្មី ឃុំព្រៃឆ្លាក់ ស្រុកស្វាយរៀង ខេត្តស្វាយរៀង កើតនៅឆ្នាំ១៩៩០ មានបងប្អូន៣នាក់ និងជាកូនទី១ក្នុងគ្រួសារ ដែលមានឪពុកជាមន្ត្រីកងរាជអាវុធហត្ថ និងម្តាយជាអាជីវករ ។ លោកបានរៀនចប់សញ្ញាបត្រទុតិយភូមិនៅឆ្នាំ២០០៩ និងបន្តរៀនថ្នាក់បរិញ្ញាបត្រផ្នែកអក្សរសាស្ត្រអង់គ្លេសនៅសាកវិទ្យាល័យបញ្ញាសាស្ត្រជាតិកម្ពុជា ដែលបានបញ្ចប់នៅក្នុងឆ្នាំ២០១៥នេះ ។
លោកសុធាបាននិយាយថា ៖ « ខណៈដែលខ្ញុំបានចូលរៀននៅសាកលវិទ្យាល័យ ខ្ញុំបានកត់សម្គាល់ឃើញថា មានមិត្តភក្តិរួមជំនាន់ខ្ញុំតិចតួចបំផុតដែលបានមករៀននៅសាកលវិទ្យាល័យល្អៗ ពិសេសសាកលវិទ្យាល័យដែលប្រើប្រាស់ភាសាអង់គ្លេស ។ ពេលនោះធ្វើឲ្យខ្ញុំឆ្ងល់តែឯងថា តើរឿងនេះនឹងបន្តដល់ពេលណាទៀត ដូចនេះហើយធ្វើឲ្យខ្ញុំមានក្តីស្រមៃថា នឹងធ្វើយ៉ាងណាដើម្បីបណ្តុះបណ្តាលធនធានមនុស្ស និងបង្កើតសាលាភាសាអង់គ្លេសដែលមានគុណភាពមួយនៅឯខេត្តរបស់ខ្ញុំ បន្ទាប់ពីខ្ញុំបញ្ចប់ថ្នាក់បរិញ្ញាបត្រអក្សរសាស្ត្រអង់គ្លេសនេះទៅ ។ ខ្ញុំតែងចងចាំ និងឲ្យតម្លៃទៅលើពាក្យចាស់បុរាណមួយឃ្លាថា ផឹកទឹក ឲ្យនឹកដល់ប្រភព ។ ខ្ញុំកើតនៅខេត្តស្វាយរៀង ដូច្នេះខ្ញុំនឹងផ្តល់អ្វីមួយដែលខ្ញុំមានឲ្យទៅប្រភពរបស់ខ្ញុំវិញ ប្រាកដណាស់យើងនឹងឃើញថ្នាលបណ្តុះបណ្តាលចំណេះដឹងនៅខេត្តស្វាយរៀង នៅគ្រាណាមួយមិនខាន »។
ការបន្តសិក្សានៅទីក្រុងភ្នំពេញហាក់មានការរើសអើង និងបញ្ចើចបញ្ចើពីសំណាក់មិត្តភក្តិ រីឯក្រុមគ្រួសារធ្លាប់មានការបន្ទច់បង្អាក់ខ្លះទៅលើការតាំងចិត្តក្នុងដំណើរជីវិតថ្មីក្នុងការសិក្សានៅទីក្រុងរបស់លោក ។
លោកសុធា មិនដែលត្រូវបានរំខានដោយទស្សនៈរបស់មជ្ឈដ្ឋានជុំវិញដែលធ្វើឲ្យបាក់ទឹកចិត្តទេ ។ ផ្ទុយទៅវិញ លោកតែងតែប្រកាន់ជំហរខ្លួនឯងថា ត្រូវតែមានសង្ឃឹមក្នុងជីវិត និងសម្រេចក្តីស្រមៃរបស់ខ្លួនឲ្យបាន ។
លោកសុធាបាននិយាយថា ៖ « ទាំងមិត្តរួមថ្នាក់ក្តី ក្រុមគ្រួសារក្តី បាននិយាយថា ខ្ញុំមុជមិនជ្រៅទៅមិនឆ្ងាយទេ ប៉ុន្តែខ្ញុំមានការតាំងចិត្តខ្ពស់ថា នឹងជម្នះរាល់ឧបសគ្គ ។ រហូតដល់ពេលដែលខ្ញុំមកភ្នំពេញ ខ្ញុំបានមកធ្វើការងារស្ម័គ្រចិត្តនៅតាមអង្គការសមាគមក្នុងស្រុកមួយចំនួនយ៉ាងសកម្ម ហើយខ្ញុំចូលរួមច្រើនជាងគេគឺកម្មវិធីDebate (ការជជែកដេញដោលលើប្រធានបទណាមួយ) និងទទួលបានពាន់រង្វាន់ស្ទើរជារៀងរាល់ការប្រកួត »។
ជាក់ស្តែងលោក និងក្រុមរបស់លោកធ្លាប់ទទួលបានចំណាត់ថ្នាក់លេខ១ក្នុងការជជែកដេញដោលមួយទាក់ទងនឹងសិទ្ធិនារីស្តីពី «អ្នកម្តាយមានតួនាទីយ៉ាងសំខាន់ក្នុងគ្រួសារ និងសង្គមជាតិ» ដែលរៀបចំឡើងដោយក្រសួងកិច្ចការនារីនៅឆ្នាំ២០១៣ និងការប្រកួតប្រជែងវែកញែកលើប្រធានបទជាច្រើនពាក់ព័ន្ធនឹងទិសដៅអភិវឌ្ឍន៍សហស្សវត្សរ៍របស់អង្គការសហប្រជាជាតិ ដែលរៀបចំឡើងដោយសភាយុវពាណិជ្ជករកម្ពុជា (JCI Cambodia) នៅឆ្នាំ២០១៤ ។
ការខិតខំប្រឹងប្រែង និងយកចិត្តទុកដាក់ក្នុងការសិក្សា និងការងារស្ម័គ្រចិត្តត្រូវបានសមាជិកជាង៣០០នាក់ បោះឆ្នោតជ្រើសតាំងលោកក្លាយជាប្រធានសភានិស្សិតនៅក្នុងសាកលវិទ្យាល័យបញ្ញាសាស្ត្រកម្ពុជា ជំនាន់ទី៧ (ឆ្នាំ២០១២-២០១៣) ។ ទាំងនេះសបញ្ជាក់ឲ្យឃើញថា លោកមានការទទួលស្គាល់ពីសាធារណជន ទាំងចំណេះដឹង បទពិសោធន៍ និងភាពជាអ្នកដឹកនាំ ។
នាយកក្រុមហ៊ុនវ័យ២៥ឆ្នាំរូបនេះ បាននិយាយថា «ខ្ញុំបានបម្រើការងារឲ្យក្រុមហ៊ុនឯកជនមួយអស់រយៈពេល១ឆ្នាំ ដោយបានឃើញនូវរបៀបរៀបចំពាក្យស្វែងរកការងារធ្វើជាច្រើនមានភាពធ្វេសប្រហែស និងភាពខ្វះខាត ។ បើខ្ញុំនៅតែបន្តធ្វើការឲ្យក្រុមហ៊ុនឯកជននោះទៀត ខ្ញុំមិនអាចមានពេលគ្រប់គ្រាន់ក្នុងការជួយដោះស្រាយបញ្ហាការត្រៀមខ្លួនស្វែងរកការងារធ្វើរបស់ពួកគាត់បានច្រើននោះទេ ។ ដូច្នេះហើយដំណោះស្រាយ គឺទាល់តែយើងបើកជាភ្នាក់ងារផ្តល់សេវាកម្មនេះឡើង »។
CVer Agency គឺជាក្រុមហ៊ុនដែលផ្តល់សេវាកម្មលើការជួយអ្នករកការងារក្នុងការសរសេរប្រវត្តិរូបសង្ខេប (CV) និងសំបុត្រស្នើសុំធ្វើការងារ(Cover) ប្រឹក្សាយោបល់សម្រាប់ការសម្ភាសន៍រកការងារធ្វើ និងរៀបចំជាមេរៀនចុះធ្វើបទបង្ហាញតាមអង្គការ ឬសមាគមនិស្សិតនានា ។ ក្រុមហ៊ុនមានបុគ្គលិកចំនួន១១នាក់ ជាអ្នកដែលមានជំនាញ និងបទពិសោន៍ការងារជាក់លាក់ក្នុងការបណ្តុះបណ្តាល និងអភិវឌ្ឍន៍ធនធានមនុស្ស ។
លោកសុធាបាននិយាយថា «ក្រុមការងាររបស់យើងផ្តល់សេវាកម្មសរសេរCVនិង Cover Letter ទាំងជាភាសាខ្មែរ និងអង់គ្លេស ប៉ុន្តែជាទូទៅគឺធ្វើជាភាសាអង់គ្លេស » ។
CVer Agency បង្កើតក្នុងទិសដៅដើម្បីជួយជ្រោមជ្រែងដល់យុវជនខ្មែរក្នុងការទទួលបានការងារធ្វើល្អ តាមរយៈភាពឥតខ្ចោះក្នុងការបង្ហាញនូវជីវប្រវត្តិសង្ខេប សំបុត្រសុំធ្វើការងារ និងការសម្ភាសន៍ ។ មិនតែប៉ុណ្ណោះទេ ក្រុមហ៊ុននេះបានផ្តល់នូវព័ត៌មានទាក់ទងនឹងការស្វែងរកការងារដែលទទួលបានប្រាក់បៀវត្សរ៍ និងការងារស្ម័គ្រចិត្ត ដែលយុវជនអាចរកបានដើម្បីមានឱកាសធ្វើការងារ និងជាអំណះអំណាងក្នុងការដាក់ពាក់ធ្វើការងារបន្ត ។
លោកសុធា បានឲ្យដឹងថា « ក្នុងរយៈប្រមាណជាមួយខែដែលក្រុមហ៊ុនយើងបានបង្កើតឡើងនេះ មានអ្នកស្វែងរកការងារធ្វើ បានទទួលយកសេវាកម្មរបស់យើងជាង៥០នាក់ហើយ ដែលពួកគេភាគច្រើនជានិស្សិតសិក្សានៅសាកលវិទ្យាល័យក្នុងរាជធានីភ្នំពេញ » ។
កន្លងមក លោក សុធា ធ្លាប់ជាអ្នកបណ្តុះបណ្តាល និងអភិវឌ្ឍន៍ធនធានមនុស្ស និងជ្រើសរើសបុគ្គលិកនៅក្នុងក្រុមហ៊ុនមួយចំនួនដែលធ្វើឲ្យលោកទទួលបានបទពិសោធន៍ក្នុងការងារ និងជំនាញក្នុងការគ្រប់គ្រងធនធានមនុស្ស និងបានធ្វើការបង្ហាត់បង្រៀនបន្តទៅដល់យុវជន់ជាហូរហែ ។
លោកបាននិយាយថា «បច្ចុប្បន្ននេះ ខ្ញុំបានបញ្ចេញនូវអ្វីដែលខ្ញុំមាន ហើយបានចែករំលែកឲ្យយុវជនផ្សេងទៀត ពិសេសតាមរយៈ CVer Agency ។ អីុចឹង ពួកយើងជាអ្នកមានបទពិសោធន៍លើរឿងហ្នឹងតែម្តង មិនមែនអង្គុយគិត អង្គុយអានសៀវភៅដើម្បីមកចែករំលែកទេ គឺមានការស្រាវជ្រាវ ហើយបានធ្វើទៀត ដូច្នេះទើបយើងយកអ្វីដែលមានទៅចែករំលែកដល់យុវជនផ្សេងទៀត » ។
លោកសុធា បានបង្ហាញនូវសុទិ្ធដ្ឋិនិយមទៅលើពន្លកថ្មីនៃអាជីវកម្មរបស់ខ្លួនដោយពឹងផ្អែកលើជំនញ បទពិសោធន៍ និងការទំនាក់ទំនងល្អ ដោយរំពឹងថា នឹងមានការរីកចម្រើន និងដំណើរការយ៉ាងរលូន ពិសេសអាចជាវិភាគទានយ៉ាងសំខាន់សម្រាប់ជួយជ្រោមជ្រែងយុវជនក្នុងការស្វែងរកការងារ ធ្វើ ។ លោកថា ៖ «ក្នុងនាមខ្ញុំជាFounder (ស្ថាបនិក) ខ្ញុំមានក្តីសង្ឃឹមខ្ពស់ ហើយទិសដៅរបស់ខ្ញុំក្នុងរយៈពេលមួយឆ្នាំខាងមុខនេះ គឺធ្វើយ៉ាងណាឲ្យមានការកើនឡើង អ្នកធ្វើការងារឲ្យខ្ញុំដែលជាភ្នាក់ងារចំនួន១២០នាក់ និងពង្រីកទៅកាន់ខេត្តក្រុងផ្សេងទៀត » ៕
ចែករំលែកព័តមាននេះ