រាជធានីភ្នំពេញ ៖ គំនរដុំបេតុងដែលគេបានដាក់តម្រៀបគរលើគ្នាដែលមានទម្ងន់រាប់រយតោន និងមានកំពស់យ៉ាងខ្ពស់ដូចកូនភ្នំទុកសំរាប់ប្រើប្រាស់នៅក្នុងការសង្កត់គ្រឹះនៅក្នុងដ្ឋានសំណង់មួយកន្លែងដែលជាអតីតដីផ្សារលក់ត្រីបឹងត្របែកនោះ បានដួលរលំធ្វើឱ្យញ័ររញ្ជួយដីប្រៀបដូចជាការបាក់កូនភ្នំមួយយ៉ាងដូច្នេះដែរ តែសំណាងល្អមិនបានធ្លាក់ ឬរមៀលមកលើផ្លូវ និងមិនបណ្តាលឱ្យមនុស្សណាម្នាក់រងគ្រោះថ្នាក់ឡើយ ដែលហេតុការណ៍នេះបានកើតឡើងកាលពីវេលាម៉ោង៥ និង២៥នាទីល្ងាច ថ្ងៃទី៥ តុលា ២០១៥ នៅខាងក្នុងការដ្ឋានសំណង់អតីតផ្សារត្រីបឹងត្របែក ដែលមានទីតាំងនៅខាងមុខផ្សារទំនើបបឹងត្របែកផ្លាហ្សា ផ្លូវលេខ៤៣៦ ក្នុងសង្កាត់បឹងត្របែក ខណ្ឌចំការមន ។
តាមប្រភពព័ត៌មានពីកន្លែងកើតហេតុបានប្រាប់ឱ្យដឹងថា មុនពេលកើតហេតុគេបានឮសំឡេងគ្រាំងៗយ៉ាងខ្លាំង ព្រមទាំងការញ័ររញ្ជួយដីចេញពីក្នុងការដ្ឋានសំណង់ខាងលើ ក៏ស្រាប់តែនាំគ្នាក្រឡេកមើលទៅបានឃើញគំនរដុំបេតុងដែលគេបានគរទុកយ៉ាងខ្ពស់ក្នុងការដ្ឋានក្បែរផ្លូវនោះ បានចាប់ផ្តើមទ្រេត និងធ្លាក់ដុំបេតុងមកដី ។ ភ្លាមៗនោះគេក៏បានឃើញបុរសជាជាងសំណង់ជនជាតិចិនម្នាក់រត់ចេញមកខាងក្រៅការដ្ឋានលើផ្លូវ ប្រាប់ឱ្យអ្នកដំណើរតាមផ្លូវ និងអ្នកដែលលក់ដូរនៅខាងមុខផ្សារបឹងត្របែកផ្លាហ្សានោះឱ្យមានការប្រុងប្រយ័ត្នផងដែរ ។ សំឡេង និងកំទេចបេតុងហុយទ្រលោមងងឹតពេញមេឃ និងបង្កឱ្យមានការភ្ញាក់ផ្អើលយ៉ាងខ្លាំង ។
ក្រោយពេលកើតហេតុភ្លាមៗនោះ គេក៏ឃើញមានមន្ត្រីនគរបាលប៉ុស្តិ៍បឹងត្របែកចុះមកដល់កន្លែងកើតហេតុផងដែរ ដោយបានឃើញថា ការដួលរលំគំនរដុំបេតុងដែលមានទម្ងន់រាប់រយតោននៅលើទម្រដែកនេះគឺមកពីការដាក់នេះវាធ្ងន់ពេក ដោយក្នុងដុំបេតុងមួយគឺមានទម្ងន់រហូតទៅដល់ជាង២តោនឯណោះ ទើបបណ្តាលឱ្យស្រុតដី ផ្អៀង និងរលំបែបនេះ ៕
ចែករំលែកព័តមាននេះ