ខេត្តកំពង់ស្ពឺ ៖ សពនារីម្នាក់ដែលគេប្រទះឃើញ ព្រមទាំងមានដង្កូវចោះផងនោះ សមត្ថកិច្ចជំនាញបានចុះទៅធ្វើការត្រួតពិនិត្យហើយ ជាលទ្ធផលបញ្ជាក់ថា នាងស្លាប់ដោយសារមនុស្សស្គាល់គ្នានាំយកមកសម្លាប់ ព្រោះតែរឿងខាងប្រុសចង់ដោះដៃ និងនាងមានផ្ទៃពោះ ដែលករណីស្នេហាត្រីកោណដោយសារតែមានស្នាមកាប់ជាច្រើនពូថៅលើខ្លួន ។
ដែលហេតុការណ៍ប្រទះឃើញសពគឺនៅក្បែរផ្លូវចូលទៅទឹកធ្លាក់ទី១ លើភ្នំគិរីរម្យ កាលពីវេលាម៉ោង០៦ និង១៥នាទីយប់ថ្ងៃទី០៣តុលា កន្លងមក តាមផ្លូវប៉េសេ១លើភ្នំគិរីរម្យ ក្នុងភូមិថ្មី ឃុំចំបក់ ស្រុកភ្នំស្រួច ខេត្តកំពង់ស្ពឺ ។
មន្ត្រីនគរបាលស្រុកភ្នំស្រួចបានឱ្យដឹងទៀតរសៀលថ្ងៃទី៥ តុលា ២០១៥ នេះថា បន្ទាប់ពីមានសេចក្តីរាយការណ៍ពីមន្ត្រីបរិស្ថានម្នាក់ ដែលដើរល្បាតក្នុងភូមិសាស្ត្រខាងលើ សមត្ថកិច្ចជំនាញបានចុះទៅធ្វើការត្រួតពិនិត្យតដល់កន្លែងកើតហេតុ ដោយពិនិត្យឃើញថា សពត្រូវជនសង្ស័យកាប់នឹងពូថៅត្រូវក្បាល និងស្មាជាច្រើនកន្លែង ។
ក្រោយពីធ្វើការត្រួតពិនិត្យយ៉ាងល្អិតល្អន់រួចមក សមត្ថកិច្ចដាក់ការសន្និដ្ឋានថា អ្នកដែលសម្លាប់នារីរងគ្រោះ អាចជាមនុស្សស្គាល់គ្នា ឬក៏ជាសង្សារ ដែលប្រុងដោះដៃទៅរកអ្នកថ្មី ព្រោះនាងមានផ្ទៃពោះផង ហើយពេលនាងរករឿង ក៏ល្បួងយកមកសម្លាប់តែម្តង ។ បើមិនអ៊ីចឹង ទំនងជានារីរងគ្រោះមានពាក់ព័ន្ធនឹងល្បែងស្នេហ៍ត្រីកោណណាមួយ ទើបជួបគ្រោះអកុសលបែបនេះ។ នៅលើខ្លួនសព មិនមានលិខិតអ្វីគួរឱ្យសម្គាល់ថា នាងមកពីណា ហើយរស់នៅឯណានោះទេ។
ក្រោយធ្វើការត្រួតពិនិត្យរួច សមត្ថកិច្ចសម្រេចកប់នៅកន្លែងដែលប្រទះឃើញតែម្តង ដើម្បីរង់ចាំធ្វើការស្រាវជ្រាវរកសាច់ញាតិជាក្រោយទៀត ។
ចែករំលែកព័តមាននេះ