ខេត្តបន្ទាយមានជ័យ ៖ ចំនួនពលករបញ្ជូនពីថៃតាមរថយន្តទ្រុងតាមច្រកទ្វារអន្តរជាតិប៉ោយប៉ែតសំរាប់ខែកញ្ញាមានការធ្លាក់ចុះជាងខែសីហា ២០១៥ដូចគ្នា ចំណែកពលករវិលត្រឡប់ពីថៃដោយខ្លួនឯងតាមច្រកទ្វារដដែលនេះក៏មានការធ្លាក់ចុះជាងបណ្ដាឆ្នាំមុនៗផងដែរ។
បើតាមការឲ្យដឹងពីមន្ត្រីនៅទីតាំងទទួលពលករបញ្ជូនពីថៃក្នុងភូមិ និងសង្កាត់ប៉ោយប៉ែតប្រាប់ថា ពលករសរុបក្នុងខែកញ្ញា ២០១៥ មានចំនួន៦.៧០៦នាក់ ហើយក្នុងចំណោមនេះមានស្ត្រី២២៥៩នាក់ និងកុមារ៥៣៧នាក់។
មន្ត្រីខាងលើប្រាប់ថា ចំនួនពលករសរុបក្នុងខែកញ្ញានេះ បើប្រៀបធៀបទៅនឹងខែសីហា ២០១៥ដូចគ្នា មានការធ្លាក់ចុះ ព្រោះចំនួនពលករសរុបក្នុងខែសីហាមានរហូតដល់ ៧២៨១នាក់ ហើយក្នុងចំនួននោះមានស្ត្រី២៥៩៤នាក់ និងកុមារ៥៥១នាក់។
ថ្វីត្បិតតែចំនួនពលករក្នុងខែកញ្ញាមានការធ្លាក់ចុះជាងខែសីហា ប៉ុន្តែមន្ត្រីខាងលើប្រាប់ថា មានការកើនឡើងជាងខែកក្កដា ២០១៥ដូចគ្នា ដោយចំនួនពលករសរុបក្នុងខែកក្កដាមានចំនួន ៥១៥៤នាក់ ហើយមានស្ត្រី1803នាក់ និងកុមារ378នាក់។
ដោយឡែកចំនួនពលករវិលត្រឡប់ពីថៃដោយស្របច្បាប់តាមច្រកទ្វារអន្តរជាតិប៉ោយប៉ែតដដែលមុនពិធីបុណ្យជាតិ(បុណ្យភ្ជុំបិណ្យ)ឆ្នាំនេះមានការធ្លាក់ចុះខ្លាំងជាងបណ្តាឆ្នាំមុនៗ។ ការធ្លាក់ចុះចំនួនពលករស្របច្បាប់វិលត្រឡប់ពីថៃតាមច្រកទ្វារអន្តរជាតិប៉ោយប៉ែតមុនពិធីបុណ្យជាតិឆ្នាំនេះ ប្រភពខ្លះថា បណ្ដាលមកពីពលករបច្ចុប្បន្នងាកទៅឆ្លងព្រំដែនទៅមកដីថៃតាមច្រកទ្វារអន្តរជាតិដូងក្នុងស្រុកកំរៀងខេត្តបាត់ដំបងច្រើនជាងច្រកទ្វារអន្តរជាតិប៉ោយប៉ែត។
ប្រភពភាគច្រើនថា បណ្តាលមកពីសមត្ថកិច្ចថៃចាប់ពលករវិលត្រឡប់កាន់បណ្ណស៊ីជម្ពូដែលគ្មានឯកសារបញ្ជាក់ឲ្យវិលត្រឡប់ពីថៅកែថៃនៅតាមបារ៉ាស់ត្រួតពិនិត្យក្នុងស្រុកមួយក្នុងខេត្តស្រះកែវខ្លាំងពេក។
ទោះជាយ៉ាងណាមន្ត្រី និងសមត្ថកិច្ចកម្ពុជានៅមាត់ច្រកទ្វារអន្តរជាតិប៉ោយប៉ែទទួលស្គាល់ថា ចំនួនពលករស្របច្បាប់វិលត្រឡប់ពីថៃមុនពិធីបុណ្យជាតិ(បុណ្យភ្ជុំបិណ្ឌ)ឆ្នាំនេះមានការធ្លាក់ចុះខ្លាំងមែន៕
ចែករំលែកព័តមាននេះ