ខេត្តប៉ៃលិន ៖ បើយោងតាមលិខិតរបស់រដ្ឋបាលខេត្តប៉ៃលិន បានចេញសេចក្តីសម្រេចធ្វើការហាមឃាត់ការធ្វើដំណើរ និងបិទរមណីយដ្ឋានទេសចរណ៍នៅទូទាំងខេត្តប៉ៃលិនជាបណ្តោះអាសន្នរយៈពេលខ្លីបន្តទៀត ដោយបានចុះនៅថ្ងៃចន្ទ ទី១៩ ខែមេសា ឆ្នាំ២០២១ ហើយត្រូវមានអនុភាពអនុវត្ត រហូតដល់ថ្ងៃទី២៨ ខែមេសា ឆ្នាំ២០២១ ក្នុងការចូលរួមទប់ស្កាត់ការរីករាលដាល នៃជំងឺកូវីដ-១៩ ។
សូមបញ្ជាក់ផងដែរថា ដើម្បីចូលរួមទប់ស្កាត់ការឆ្លងរីករាលដាលនៃជំងឺកូវីដ-១៩ រដ្ឋបាលខេត្តប៉ៃលិន បានចេញសេចក្តីសម្រេចដោយហាមឃាត់ប្រជាពលរដ្ឋក្នុងការធ្វើដំណើរឆ្លងកាត់ចេញ-ចូលពីខេត្តផ្សេងចូលមកខេត្តប៉ៃលិន ឬចេញពីប៉ៃលិនឆ្ពោះទៅបណ្តាខេត្តនានាជាបណ្តោះអាសន្ន សម្រាប់រយៈពេល១៤ថ្ងៃ ដោយគិតចាប់ពីម៉ោង០ (សូន្យ) កាលពីថ្ងៃទី០៧ ខែមេសា ឆ្នាំ២០២១ រហូតដល់ថ្ងៃទី២០ ខែមេសា ឆ្នាំ២០២១ ទើបបើកឱ្យដំណើរការឡើងវិញ ក្នុងគោលបំណងប្រយុទ្ធ និងទប់ស្កាត់ការឆ្លងរាលដាលនៃជំងឺកូដ-១៩ ។
តែរហូតមកដល់ពេលនេះ ដោយសារសភាពនៃការឆ្លងជំងឺកូវីដ-១៩ នៅតែមិនព្រមថមថយចុះវិញ ទើបរដ្ឋបាលខេត្តប៉ៃលិន បានសម្រេច និងបន្តបិទការធ្វើដំណើរចេញ-ចូលក្នុងខេត្តរយៈពេល០៨ថ្ងៃទៀត ។
លើសពីនេះ រដ្ឋបាលខេត្ត ក៏បានដាក់កងកម្លាំងសមត្ថកិច្ចទាំង៣ប្រភេទឱ្យឈរជើងយាមកាមប្រចាំការនៅតាមគោលដៅនីមួយៗនៃព្រំប្រទល់ខេត្តប៉ៃលិន ជាប់នឹងខេត្តបាត់ដំបង ដើម្បីឆែកឆេររកអត្តសញ្ញាណប័ណ្ណ ឬលិខិតបញ្ជាក់ភាពចាំបាច់ពីអាជ្ញាធរមូលដ្ឋាន និងធ្វើការណែនាំប្រជាពលរដ្ឋទាំងអស់ឱ្យស្តាប់តាមសេចក្តីសម្រេចខាងលើ គឺត្រូវស្នាក់នៅក្នុងខេត្តប៉ៃលិន រយ:ពេលខ្លីទៀតសិន ៕
ចែករំលែកព័តមាននេះ