រាជធានីភ្នំពេញ ៖ ដោយសារតែរយៈពេលប៉ុន្មានថ្ងៃចុងក្រោយនេះមានបងប្អូនអាជីវករ និងប្រជាពលរដ្ឋនៅផ្សារពោធិ៍ចិនតុងបានឆ្លងជម្ងឺ COVID-19 រីករាលដាលយ៉ាងឆាប់រហ័សគួរឲ្យបារម្ភនោះ អាជ្ញាធរខណ្ឌពោធិ៍សែនជ័យបានចេញសេចក្ដីជូនដំណឹងផ្អាកដំណើរការជាបណ្ដោះអាសន្ននូវផ្សារនេះ ដើម្បីអនុវត្តនូវវិធានការសុខាភិបាលទប់ស្កាត់ការឆ្លងរាលដាលនៃជម្ងឺកាចសាហាវCOVID-19ជាបន្ទាន់ ។
ផ្សារពោធិ៍ចិនតុង មានទីតាំងស្ថិតនៅតាមបណ្ដោយមហាវិថីសហព័ន្ធរុស្ស៊ី ភូមិប៉ប្រកខាងជើង សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញហើយ គឺជាផ្សារទី៥ ហើយ ស្ថិតនៅក្នុងភូមិសាស្ត្រខណ្ឌពោធិ៍សែនជ័យ ដែលត្រូវបានអាជ្ញាធរសម្រេចការផ្អាកដំណើរការជាបណ្ដោះអាសន្ន ដើម្បីប្រយុទ្ធប្រឆាំងជាមួយជម្ងឺកាចសាហាវនេះ ។
យោងតាមខ្លឹមសារនៃសេចក្ដីជូនដំណឹងការផ្អាកមានរយៈពេល១៤ថ្ងៃ គឺចាប់ពីថ្ងៃទី២០ ខែមេសា ឆ្នាំ២០២១ រហូតដល់ថ្ងៃទី០៣ ខែឧសភា ឆ្នាំ២០២១ ទើបបើកឲ្យដំណើរការឡើងវិញ ។
ស្របពេលនេះដែរ រដ្ឋបាលខណ្ឌពោធិ៍សែនជ័យ ក៏បានធ្វើការអំពាវនាវឲ្យបងប្អូនអាជីវករ សន្តិសុខ បុគ្គលិក កម្មករ បម្រើការងារក្នុងផ្សារ និងក្រុមគ្រួសារអាជីវករពាក់ព័ន្ធ ព្រមទាំងប្រជាពលរដ្ឋដែលកន្លងមកធ្លាប់បានចេញចូលផ្សារពោធិចិនតុងចាប់ពីថ្ងៃទី១៥ ដល់ថ្ងៃទី១៩ ខែមេសា ឆ្នាំ២០២១ សូមអញ្ជើញមកយកសំណាកតេស្ត COVID-19 ជាបន្ទាន់ ព្រមទាំអនុវត្តវិធានការចត្តាឡីស័ក ស្របតាមការណែនាំ និងវិធានការរបស់ក្រសួងសុខាភិបាលឲ្យបានត្រឹមត្រូវ ។
គួររម្លឹកផងដែរថា នៅក្នុងកាលទេសៈដ៏លំបាកមួយនេះ កាលពីវេលាម៉ោង០០នាទីយប់ ថ្ងៃទី១៩ ខែមេសា ឆ្នាំ២០២១ អាជ្ញាធរខណ្ឌខាងលើបានបិទផ្សារចំនួន៤ រួចមកហើយ ក្នុងរួមមានរួមមាន១,ផ្សារទួលពង្រ ស្ថិតនៅក្នុងភូមិទួលពង្រ ២,ផ្សារត្រពាំងថ្លឹង ៣,ផ្សារឯករាជ្យ១ ស្ថិតនៅក្នុងភូមិត្រពាំងថ្លឹង សង្កាត់ចោមចៅទី១ ។ និង៤, ផ្សារស៊ីនជូរីផ្លាហ្សា បណ្ដោះអាសន្នស្ថិតនៅលើទីតាំងសួនកុមារពោធិ៍ចិនតុង ភូមិប៉ប្រកខាងជើង សង្កាត់កាកាបទី១ បន្ទាប់ពីបានរកឃើញមានការឆ្លងរាលដាលជម្ងឺCOVID-19 យ៉ាងឆាប់រហ័សគួរឲ្យបារម្ភ ៕
ចែករំលែកព័តមាននេះ