រាជធានីភ្នំពេញ ៖ គណៈកម្មាធិការប្រយុទ្ធប្រឆាំងផលិតផលក្លែងក្លាយបានរៀបចំពិធីដុតកំទេចឱសថក្លែងក្លាយចំនួន៥៤ការុងស្មើនឹង១.៩៦៧,២គីឡូក្រាម នៅទីលានចាក់សំរាមស្ថិតក្នុងសង្កាត់ដង្កោ ខណ្ឌដង្កោ រាជធានីភ្នំពេញ កាលពីវេលាម៉ោង០៩ព្រឹក ថ្ងៃទី០៥ តុលា ២០១៥ ក្រោមអធិបតីភាពលោកអង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ តំណាងដ៏ខ្ពង់ខ្ពស់សម្តេចក្រឡាហោមស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ដោយមានការអញ្ជើញចូលរួមពីលោកម៉ម ប៊ុនហេង រដ្ឋមន្ត្រីក្រសួងសុខាភិបាល លោក H.E jean claude POIMBOEUF ឯកអគ្គរដ្ឋទូតសាធារណរដ្ឋបារាំងប្រចាំកម្ពុជា ព្រមទាំងមន្ត្រីពាក់ព័ន្ធជាច្រើននាក់ទៀត។
លោកមៀច សុផាន់ណា អនុរដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយបានថ្លែងរំលឹកក្នុងឱកាសដុតកំទេចឱសថនោះថា កាលពីថ្ងៃទី២៥ ធ្នូ ២០១១ សមត្ថកិច្ចនគរបាលនៃស្នងការដ្ឋាននគរបាលខេត្តបន្ទាយមានជ័យបានចាប់ឃាត់ឱសថក្លែងក្លាយចំនួន៥៤ការុងស្មើនិង១.៩៦៧,២គីឡូក្រាមដែលអញ្ញត្តិជនបានធ្វើការដឹកជញ្ជូនដោយគ្មានអាជ្ញាប័ណ្ណអនុញ្ញាតឲ្យនាំចូលក្នុងកម្ពុជា បន្ទាប់មកសមត្ថកិច្ចបានបញ្ជូនវត្ថុតាងទាំងអស់នេះជូនទៅសាលាដំបូងខេត្តបន្ទាយមានជ័យដើម្បីបើកការស៊ើបអង្កេតស្វែងរកអ្នកទទួលខុសត្រូវពិតប្រាកដមកដាក់ទោស ។
ដោយការរក្សាទុកវត្ថុតាងមានរយៈពេលជិត៥ឆ្នាំ ហើយវត្ថុតាងទាំងអស់នេះអាចធ្វើឲ្យមានហានិភ័យខ្ពស់ដល់សង្គម និងថែមទាំងប៉ះពាល់ដល់សុខភាពរបស់ប្រជាពលរដ្ឋយ៉ាងធ្ងន់ធ្ងរ ទើបគណៈកម្មាធិការប្រយុទ្ធប្រឆាំងផលិតផលក្លែងក្លាយបានសហការជាមួយក្រសួងយុត្តិធម៌ និងសាលាដំបូងខេត្តបន្ទាយមានជ័យដើម្បីទទួលយកនូវឱសថក្លែងក្លាយចំនួន៥៤ការុងស្មើនឹង១.៩៦៧,២គីឡូក្រាមនេះមកធ្វើការកំទេចចោលឲ្យបានឆាប់តាមដែលអាចធ្វើទៅបាន៕
ព័ត៌មានលម្អិតនឹងផ្សាយជូនលើទំព័រកាសែតកោះសន្តិភាព
ចែករំលែកព័តមាននេះ