រាជធានីភ្នំពេញ ៖ ក្លិបប្រដាល់ច័ន្ទបុរីវង្ស សំរោងខាងត្បូង មានទីតាំងនៅក្នុងសង្កាត់ស្វាយប៉ាក ខណ្ឌឫស្សីកែវ ដែលមានលោក រ៉ុង ប៊ុនរ៉ាក់ ជាគ្រូបង្ហាត់កំពុងជួបប្រទះការលំបាកខ្លាំងនោះ បានអំពាវនាវសុំជំនួយពីសប្បុរសជនមកទ្រទ្រង់ក្លិប ។
លោក រ៉ុង ប៊ុនរ៉ាក់ គឺជាអតីតកីឡាករប្រដាល់មួយរូបនៅក្នុងក្លិបសម្រែករាជសីហ៍បង្ក្រាបគ្រឿងញៀន និងជាសិស្សច្បងរបស់លោកឡុង សាលវ័ន្ត ។ លោកកម្រលេចមុខនៅលើសង្វៀនភ្នំពេញណាស់ទើបទស្សនិកជនភាគតិចណាស់ដែលស្គាល់លោក បើនៅសង្វៀនជាយដែនវិញនោះ នរណាក៏ស្គាល់លោកថាជាអ្នកប្រដាល់ជើងខ្លាំងមួយរូបគួរឱ្យកត់សម្គាល់ដែរ។ លោកបានឈានជើងឡើងសង្វៀនប្រកួតតាំងពីឆ្នាំ១៩៩៣មកម្ល៉េះ និងបានលាឈប់ពីអាជីពប្រដាល់នៅឆ្នាំ១៩៩៦។
ជួបអ្នកយកព័ត៌មានកោះសន្តិភាពលោក រ៉ុង ប៊ុនរ៉ាក់ និយាយថា ដោយសារតែមានចិត្តស្រឡាញ់វិស័យកីឡាប្រដាល់ ទោះបីលោកមានជីវភាពខ្វះខាតយ៉ាងណាក៏ដោយ ក៏លោកសម្រេចចិត្តបង្កើតក្លិបប្រដាល់មួយនៅឆ្នាំ២០១០ដែរ ។ ក្លិបដែលលោកបង្កើតនោះមានឈ្មោះថា ក្លិបប្រដាល់រ៉ាហាប់ស្វាយប៉ាក ប៉ុន្តែក្លិបនេះពុំមានអ្នកជួយជ្រោមជ្រែងទេទើបលោកសម្រេចចិត្តប្ដូរឈ្មោះមកជាក្លិបច័ន្ទបុរីវង្ស សំរោងក្រោមវិញ ដោយសារមានការជួយឧបត្ថម្ភជាអង្ករ និងម្ហូបអាហារខ្លះៗជារៀងរាល់ខែពីសំណាក់សម្ដេចព្រះវនរ័ត ណយ ច្រឹក សម្ដេចសង្ឃនាយករងទី៣នៃព្រះរាជាណាចក្រកម្ពុជា និងជាព្រះចៅអធិការវត្តច័ន្ទបុរីវង្ស ។ ប៉ុន្តែការជួយឧបត្ថម្ភនេះមិនគ្រប់គ្រាន់ទេ ព្រោះសិស្សដែលស្នាក់នៅនិងហ្វឹកហាត់ជាមួយលោកមានគ្នាដល់ទៅ៨នាក់ដែលសុទ្ធតែអ្នកទីទ័លក្រមកសុំផ្ញើខ្លួនជាមួយលោកប៉ុណ្ណោះ ។ ម្យ៉ាងទៀតក្លិបលោកជួបការលំបាកសព្វបែបយ៉ាងដូចជាគ្មានកន្លែងហ្វឹកហាត់ត្រឹមត្រូវគឺហាត់នៅផ្ទះតូចចង្អៀត សម្ភារបម្រើឱ្យការហ្វឹកហាត់ក៏មានតិចតួចដែរ។
លោក រ៉ុង ប៊ុនរ៉ាក់ បន្តថា បច្ចុប្បន្នដោយសារតែមានការអាណិតស្រឡាញ់ពីស្ថានីយទូរទស្សន៍មួយចំនួនដូចជាទូរទស្សន៍ប៉ុស្តិ៍លេខ៥ និងទូរទស្សន៍អាស៊ីអាគ្នេយ៍ជាដើម សិស្សរបស់លោកត្រូវបានចាប់គូឱ្យឡើងប្រដាល់មិនសូវទំនេរឡើយ ហើយពេលនេះបានលោក ម៉ា សេរី អ្នករៀបចំកម្មវិធីប្រដាល់ប្រចាំស្ថានីយទូរទស្សន៍ស៊ីធីអិន ចាប់គូឱ្យឡើងប្រដាល់នៅសប្ដាហ៍ក្រោយនេះទៀតផង ។ លោកមិនភ្លេចគុណអ្នកដែលជួយសិស្សលោកទេ ប៉ុន្តែអ្វីដែលសំខាន់នោះ គឺលោកត្រូវការសម្ភារនិងទីកន្លែងហ្វឹកហាត់ត្រឹមត្រូវដើម្បីបង្វឹកសិស្សឱ្យក្លាយជាធនធានកីឡាករដ៏មានសក្តានុពលក្នុងវិស័យប្រដាល់ ក៏ដូចជាជួយថែរក្សាមរតកក្បាច់គុនបុរាណខ្មែរឱ្យស្ថិតនៅគង់វង្សដែរ ។ សព្វថ្ងៃលោកត្រូវបានសហព័ន្ធកីឡាប្រដាល់ចាត់តាំងឱ្យធ្វើជាអ្នកវាយជួងក្នុងកម្មវិធីប្រដាល់នៅប៉ុស្តិ៍ស៊ីធីអិន និងពេលទំនេរឆ្លៀតរត់រ៉ឺម៉កម៉ូតូកង់៣ដើម្បីរកកម្រៃបន្ថែមយកមកដោះស្រាយជីវភាពប្រចាំថ្ងៃនៅក្នុងក្លិបយ៉ាងត្រដាបត្រដួសបំផុត ។
ជាចុងក្រោយលោក រ៉ុង ប៊ុនរ៉ាក់ សង្ឃឹមជឿជាក់ថា តាមរយៈការអំពាវនាវនេះនឹងមានសប្បុរសជនដែលស្រឡាញ់វិស័យកីឡាប្រដាល់ច្បាស់ជាជួយឧបត្ថម្ភដល់ក្លិបលោក
មិនខាន ៕
ចែករំលែកព័តមាននេះ