យោងតាមស៊ីនហួថា អ្នកនេសាទម្នាក់ស្លាប់ និង១៦នាក់ទៀតបាត់ខ្លួនពេលខ្យល់ព្យុះទីហ្វុង MUJIGAE ជាព្យុះទី២២ ប្រចាំឆ្នាំ វាយប្រហារកាលពីថ្ងៃទី៤ តុលា លើខេត្តក្វាងទុងភាគខាងត្បូងចិន ។
យោងតាមមជ្ឈមណ្ឌលជួយសង្គ្រោះសមុទ្រក្រុង ZHANJIANG ថា រហូតមកដល់ម៉ោង៧និង៣០នាទីព្រឹក ម៉ោងក្នុងស្រុកមាននាវានេសាទដល់ទៅ៣៥គ្រឿង ខ្លះលិច ខ្លះរសាត់ក្នុងដែនទឹកក្រុង ZHANJIANG ជាមួយអ្នកនេសាទ១១៧នាក់ត្រូវបានជួយសង្គ្រោះ ហើយ១៦នាក់នៅតែបាត់ខ្លួន ។ ចំណែកមនុស្ស៣នាក់ទៀតស្លាប់ និង៨០នាក់រងរបួសពេលព្យុះវាយប្រហារលើស្រុក SHUNDE នៃទីក្រុងហ្វូសាន កាលពីរសៀលថ្ងៃទី៤ តុលា ។
ព្យុះ MUJIGAE មានខ្យល់បោកបក់យ៉ាងខ្លាំង និងភ្លៀងធ្លាក់ខ្លាំងនៅទីក្រុងឆ្នេរសមុទ្រ ZHANJIANG កាលពីថ្ងៃទី៤ តុលា វេលាម៉ោង១៤និង១០នាទី ជាមួយកម្លាំងខ្យល់មានល្បឿនដល់៥០ម៉ែត្រក្នុង១វិនាទី ។ ព្យុះនេះបោកបក់សំដៅភាគពាយ័ព្យ ហើយនឹងមកដល់តំបន់ស្វយ័ត ZHUANG ខេត្តក្វាងស៊ី នាពេលល្ងាច។ ព្យុះនោះនឹងបន្តបោកបក់រហូតដល់ថ្ងៃទី៥ តុលា នៅភាគខាងលិចខេត្តក្វាងទុង និងតំបន់ដីសណ្តនៃស្ទឹង PERLES ។
ខាងផ្នែកត្រួតពិនិត្យទឹកជំនន់ និងតស៊ូប្រឆាំងគ្រោះរាំងស្ងួតខេត្តក្វាងទុង បានខិតខំទប់ទល់ចំពោះព្យុះនេះដោយកាលពីថ្ងៃទី៤ តុលា បានដំឡើងការប្រកាសអាសន្នដល់កម្រិតខ្ពស់បំផុត។ អ្នកទេសចរជាង៥០០នាក់ជាប់គាំងលើកោះ FANGJI ជាទីតាំងទេសចរណ៍មួយគ្រប់គ្រងដោយក្រុង MAOMING ។ អាជ្ញាធរមូលដ្ឋាន កាលពីថ្ងៃទី៣ តុលា ចាប់ផ្តើមជម្លៀសពួកអ្នកទេសចរចេញពីកោះនោះ ក៏បុ៉ន្តែប្រតិបត្តិការត្រូវកាត់ផ្តាច់ ព្រោះតែមានខ្យល់បោកបក់ខ្លាំង ៕
ចែករំលែកព័តមាននេះ