ខេត្តកំពង់ឆ្នាំង ៖ សាលាដំបូងខេត្តកំពង់ឆ្នាំងបានសម្រេចឃុំខ្លួនជនសង្ស័យចំនួន៣នាក់ ដាក់ពន្ឋនាគារ នៅព្រឹកថ្ងៃទី០៥ តុលា ២០១៥ នេះ ពាក់ពន្ឋ័នឹងការជួញដូថ្នាំញៀនដ៏ធំមួយដែលមិនធ្លាប់មានពីមុនមក
នៅខេត្តមួយនេះ ។
ការឃុំខ្លួនជនសង្ស័យខាងលើ គឺបន្ទាប់ពីសមត្ថកិច្ចអគ្គស្នងការនគរបាលជាតិ និងកម្លាំងសមត្ថកិច្ចនគរបាលខេត្តកំពង់ឆ្នាំងបានស្ទាក់ចាប់គ្រឿងញៀន ប្រភេទមេតំវីតាមីន ជិតមួយគីឡូក្រាម កាលពីរសៀលថ្ងៃទី៣ តុលា ២០១៥ នៅលើផ្លូវជាតិលេខ៥ ក្នុងស្រុកបរិបូរណ៌។
មន្ត្រីនគរបាលការិយាល័យប្រឆាំងគ្រឿងញៀនរបស់ស្នងការខេត្តបាននិយាយថា អ្វីជាការកត់សំគាល់ ជនសង្ស័យម្នាក់ឈ្មោះ សំ សារឿន អាយុ៥៩ឆ្នាំ ជាអ្នកបើកបររថយន្តម៉ាកទូរីស ពណ៌ស ពាក់ស្លាកលេខ ភ្នំពេញ 2D.1371 ដឹកថ្នាំញៀនខាងលើ គឺជាអ្នកកាសែត ជ័យជំនះ៧មករា មាននាទីជាជំនួយការចាងហ្វាងការផ្សាយ ។
ឈ្មោះនេះក៏ជាប្រធានប្រតិបត្តិការ២៥ខេត្ត-ក្រុងរបស់អង្គការការពារធនធានធម្មជាតិ និងអភិរក្សជីវចម្រុះផងដែរ ។ អ្នកកាសែត និងជាមន្ត្រីអង្គការមួយនេះត្រូវបានចាប់ខ្លួនជាមួយប្រពន្ធឈ្មោះ យ័ន្ត មុំ អាយុ៣៦ឆ្នាំ និងបុរសម្នាក់ទៀតឈ្មោះ មី រ៉ែម អាយុ៤៥ឆ្នាំ មានទីលំនៅភូមិកណ្តាល ឃុំពាន្តរោង ស្រុកស្វាយអន្ទរ ខេត្តព្រៃវែង ។
ជនសង្ស័យទាំង៣នាក់ត្រូវបានសមត្ថកិច្ចដកហូតបានថ្នាំញៀនប្រភេទមេតំវីតាមីន ( WY ) ឬហៅថាយ៉ាម៉ា ចំនួន១កញ្ចប់ធំ ស្មើនឹង៥០កញ្ចប់ ឬស្មើនឹង១០.១០០គ្រាប់ ឬ០,៩៣៨ គីឡូក្រាម ទូរស័ព្ទដៃ៣គ្រឿង និងរថយន្តម៉ាកទូរីសមួយគ្រឿង៕
ចែករំលែកព័តមាននេះ