ខេត្តកំពង់ឆ្នាំង ៖ បុរសម្នាក់បានស្លាប់យ៉ាងអាណោចអាធ័មក្នុងថ្លុកឈាម ដោយសារតែជនដៃដល់ចាក់ប្រហារ កាលពីវេលាម៉ោង១រំលងអាធ្រាត្រឈានចូលថ្ងៃទី០៤ តុលា ២០១៥ នៅចំណុចព្រៃគោកខ្មោច ខាងកើតភូមិរលុង ឃុំទួលខ្ពស់ ស្រុកទឹកផុស ខណៈដែលជនរងគ្រោះត្រឡប់មកពីមើលគេលេងរាំងវង់វិញ ។
ទោះជាយ៉ាងណាក្រោយពេលកើតហេតុ ជនសង្ស័យម្នាក់ក្នុងចំណោម២នាក់ត្រូវបានសមត្ថកិច្ចចាប់ឃាត់ខ្លួនផងដែរ ។
លោក ឌុច ចំរើន នាយការិយាល័យព្រហ្មទណ្ឌកំរិតធ្ងន់នៃស្នងការដ្ឋាននគរបាលខេត្តបាននិយាយថា ជនរងគ្រោះមានឈ្មោះ សែម ណេត អាយុ៣០ឆ្នាំ មានទីលំនៅភូមិ-ឃុំកើតហេតុខាងលើ ។
ចំណែកជនសង្ស័យម្នាក់ដែលសមត្ថកិច្ចចាប់ខ្លួនមានឈ្មោះសម្បត្តិ ភី អាយុ១៧ឆ្នាំ មានទីលំនៅជាមួយជនរងគ្រោះ និងជនដៃដល់ម្នាក់ទៀត ដែលរត់រួចមានឈ្មោះ មាន តាក់ អាយុ១៩ឆ្នាំ មានទីលំនៅភូមិ
រការទង ឃុំទួលខ្ពស់ ស្រុកទឹកផុស ។
សមត្ថកិច្ចនគរបាលក្រោយពេលធ្វើកោសល្យវច័យលើសពជនរងគ្រោះបានឱ្យដឹងថា ជនរងគ្រោះត្រូវជនដៃដល់ចាក់នឹងកាំបិតចុងស្រួចជាច្រើនកាំបិត មានដើមទ្រូង ខ្នង និងចង្កា ។ ក្រោយពីពិនិត្យសពជនរងគ្រោះហើយ សមត្ថកិច្ចបានប្រគល់សពទៅក្រុមគ្រួសារតាមប្រពៃណី ។
នៅចំពោះមុខសមត្ថកិច្ចជនសង្ស័យឈ្មោះ សម្បតិ ភី បានសារភាពថា រូបគេគ្រាន់តែជាអ្នកដឹកជនដៃដល់ឈ្មោះ មាន តាក់ តែប៉ុណ្ណោះមិនបានចូលរួមធ្វើសកម្មភាពចាក់សម្លាប់ជនរងគ្រោះឡើយ ហើយករណីនេះ គឺកើតឡើងដោយសារមានទំនាស់ជាមួយគ្នានៅកន្លែងរាំវង់៕
ចែករំលែកព័តមាននេះ