រាជធានីភ្នំពេញ ៖ ជនសង្ស័យជំនាញខាងលួចមាន់ម្នាក់ត្រូវបានប្រជាពលរដ្ឋចាប់ឃាត់ខ្លួនប្រគល់ឱ្យសមត្ថកិច្ចប៉ុស្តិ៍នគរបាលរដ្ឋបាលទឹកថ្លា ដើម្បីចាត់ការទៅតាមផ្លូវច្បាប់ ក្រោយពីធ្វើសកម្មភាពប៉ងលួចមាន់របស់ប្រជាពលរដ្ឋ ។ ហេតុការណ៍ឃាត់ខ្លួនជនសង្ស័យខាងលើកាលពីម៉ោង២ និង៣០នាទីទាបភ្លឺ ថ្ងៃទី៤ តុលា ២០១៥ នៅចំណុចក្រុម៦ ភូមិអូរបែកក្អម សង្កាត់ទឹកថ្លា ខណ្ឌសែនសុខ ។
ជនសង្ស័យដែលត្រូវចាប់ឃាត់ខ្លួនឈ្មោះ ផាច់ សុផាត ហៅកុមារទេព អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះជួលនៅភូមិប៉ប្រកខាងត្បូង សង្កាត់កាកាប ខណ្ឌពោធិ៍សែនជ័យ និងមានស្រុកកំណើតនៅភូមិថ្លុកព្រាល ឃុំព្រះនិព្វាន ស្រុកគងពិសី ខេត្តកំពង់ស្ពឺ ។ ចំណែកដើមបណ្តឹងឈ្មោះ ពេជ្រ សារ៉ន ភេទប្រុស អាយុ៥១ឆ្នាំ មុខរបរមេការសំណង់ ស្នាក់នៅផ្ទះលេខ៤៣០ ផ្លូវលំ ភូមិអូរបែកក្អម សង្កាត់ទឹកថ្លា ខណ្ឌសែនសុខ ។
ប្រភពព័ត៌មានពីដើមបណ្តឹងបានប្រាប់ឱ្យដឹងថា មុនពេលឃាត់ខ្លួនជនសង្ស័យ ខណៈពេលដែលគាត់ងើបពីដំណេកស្រាប់តែបានឃើញជនសង្ស័យបានជិះម៉ូតូមួយគ្រឿងម៉ាកស្មាស់ ពណ៌ក្រហម ស៊េរីឆ្នាំ២០១២ ពាក់ស្លាកលេខ ភ្នំពេញ 1CA-0961 បានមកឈប់មុខផ្ទះរួចអើតអើមៗមុខផ្ទះគាត់ គាត់ក៏សម្ងំក្នុងផ្ទះតាមដានសកម្មភាពជនសង្ស័យខាងលើ មួយសន្ទុះក្រោយមកជនសង្ស័យបានជិះម៉ូតូចេញឃ្លាតពីផ្ទះគាត់បន្តិចក៏ដើរសំដៅមកទ្រុងមាន់របស់គាត់ ហើយបម្រុងធ្វើសកម្មភាពលួចមាន់ក៏ត្រូវគាត់ជាម្ចាស់ផ្ទះបានហៅសន្តិសុខមកឃាត់បានភ្លាមៗយកមកប្រគល់ឱ្យសមត្ថកិច្ចតែម្តង ។ ប្រភពបានប្រាប់ទៀតថា ក្រោយពីឃាត់ខ្លួនជនសង្ស័យខាងលើយកមកប្រគល់ឱ្យសមត្ថកិច្ច បានឃើញនៅលើម៉ូតូជនសង្ស័យមានមាន់គគ២ក្បាល់នៅក្នុងកាបូបខ្មៅមិនដឹងថា ជនសង្ស័យទើបលួចមកពីណាឡើយ ។
តាមសំដីសមត្ថកិច្ចបានប្រាប់ឱ្យដឹងថា ក្រោយពីធ្វើការសាកសួរ ជនសង្ស័យបានសារភាពថា មាន់២ក្បាលខាងលើខ្លួនបានធ្វើសកម្មភាពលួចមកពីម្តុំផ្សារពោធិ៍ចិនតុង ក្នុងសង្កាត់កាកាប ខណ្ឌពោធិ៍សែនជ័យ ។ ប្រភពពីសមត្ថកិច្ចដដែលបានប្រាប់ទៀតថា ជនសង្ស័យខាងលើគឺជាមុខសញ្ញាលួចមាន់យ៉ាងសកម្ម ហើយធ្លាប់ជាប់ពន្ធនាគារយៈពេល៤ខែកាលពីឆ្នាំ២១០៤ពីបទលួចមាន់ដូចគ្នា ហើយត្រូវបានប៉ុស្តិ៍នគរបាលភ្នំពេញថ្មីឃាត់ខ្លួន៣ដងពីបទលួចមាន់ដូចគ្នា តែត្រូវបានសមត្ថកិច្ចគ្រាន់តែធ្វើការអប់រំ និងហៅម្តាយមកធានាប៉ុណ្ណោះ ។
បច្ចុប្បន្នជនសង្ស័យខាងលើ និងវត្ថុតាង ត្រូវបានសមត្ថកិច្ចកសាងសំណុំរឿងបញ្ជូនបន្តទៅកាន់អធិការដ្ឋាននគរបាលខណ្ឌសែនសុខ ដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ